Read Tzeltal Apocalipsis 18 Bible Online

Apocalipsis 18 - Tzeltal bible

Apocalipsis 18

¹Patil la jquil co tal ta ch'ulchan yan ch'ul a'bat te tulan ya'tel yich'oj, soc sacub q'uinal ta bahlumilal yu'un te sts'anabule.

²Hich tulan la yal ta aw: ¡Jihnemix, jihnemix te muc'ul Babilonia! Ha sna pucujetic c'ohem, ha yawil spisil ta chahp bohl pucujetic, soc sluhtstajibix spisil ta chahp bohl mutetic te ilobtic sbahe.

³Como spisil te nacionetic yuch'ojic te vino yu'un te yajmule. Te ajwaliletic ta bahlumilal spasojic mulil soc te antse, soc c'uhlejubenic te jchombajeletic ta bahlumilal yu'un te bayel bintic mulambil yu'une, xchi sc'oblal.

⁴La jca'iy yan mach'a c'opoj tal ta ch'ulchan, hich la yal: Loc'anic tal ta stojol, pueblo cu'un, scuenta yu'un ma pajaluc yac ata amulic soc, scuenta yu'un ma pajaluc yac awich'ic castigo soc a.

⁵Como c'alal ch'ulchan tohyemix te smule, soc ay ta cuenta yu'un Dios te bintic chopol spasoje.

⁶Sutbeyahic spacol hich te bin ut'il spasbeyej yantic; cheb buelta a'beya stoj te bintic spasoje. Tey nix ta copa banti la schahpan ta uch'el, chahpanahic cheb buelta te bin ya yuch'e.

⁷Te hich yipal te la stoy sba soc te la sta te bintic la smulan, hich nix yipal a'beyahic sc'uxul soc smel-o'tan, como hich ya yal ta yo'tan: ¡Ho'on hich huculon te bin ut'il ajwalil-ants, ma ba me'ba' antson, soc mayuc bin ora ya coq'uetay jba! xchi.

⁸Ha yu'un ta junax c'ahc'al ya me xc'oht ta stojol te swocole: ha te lajel, oq'uel, wi'nal, soc ya me yich' chiq'uel ta c'ahc'; como bayel yu'el te Cajwaltic Dios te ya yich'be sc'op, xchi sc'oblal.

⁹Te ajwaliletic ta bahlumilal te la yantsinic soc te pajal ay bin la smulanic soc, ya me smel yo'tanic soc ya me yoq'uetayic te c'alal ya yilic xtomet ta loq'uel sch'ahilel sc'ahc'al te ya yich' chiq'uele.

¹⁰Namal to ya me stehc'an sbahic yu'un ya xi'beyic te swocole, soc hich me ya yalic: ¡Obol sba, obol sba te muc'ul Babilonia, te muc'ul pueblo te bayel yip! ¡Como ta junax ora c'oht te castigo ta atojol! xchihic.

¹¹Te jchombajeletic ta bahlumilal ya me smel yo'tanic soc ya me yoq'uetayic, como mayuquix mach'a ya xmambotic yu'un te bintic ya schonic:

¹²ha te oro, plata, t'ujbil tonetic soc perlahetic; lequil lino-pac', chi'in-yax, seda-pac', soc tsajal pac'; spisil ta chahp te'etic te buen sumet yic', te bintic pasticlambil ta scolmillo elefante, soc te bintic pasticlambil ta t'ujbil te'etic, ta bronce, taq'uin, soc ta mármol-ton;

¹³canela, pimienta clavo, pom, mirra, perfume, vino, aceite, trigo soc lequil juch'bil trigo; wacaxetic, tuminchijetic, cawuhetic soc carretahetic; soc ants-winiquetic te ya yich'ic chonel yu'un mosohinel.

¹⁴Hich me ya yalbeyic te muc'ul pueblo: Ch'ayix te bintic sc'anoj te awo'tane; tup'ix spisil ac'uhlejal soc bintic bayel yutsil, ma xatahix xan, xchihic.

¹⁵Te jchombajeletic te ya schonic ini, te c'uhlejubenic yu'un, namal ya stehc'an sbahic yu'un xi'beyel te swocole; ya smel yo'tanic soc ya yoq'uetayic,

¹⁶hich me ya yalic yu'un: ¡Obol sba, obal sba te muc'ul pueblo, te slapoj lequil lino-pac', chi'in-yax soc tsajal pac', soc te sch'aloj sba ta oro, ta t'ujbil tonetic soc perlahetic!

¹⁷como ta junax ora laj hich yipal c'uhlejalil, xchihic. Spisil te mach'atic ya stijic barco soc te ya xbehenic ta barco, te mach'atic ya x'a'tejic ta barco, soc te mach'atic cuxajtic tey ta mar, namal ya stehc'an sbahic.

¹⁸C'alal ya yilic xtomet ta loq'uel sch'ahilel sc'ahc'al te chiq'uel yu'un, hich me ya xhahchic ta aw yu'un: ¿Bin muc'ul pueblohil te pajal soc te muc'ul pueblo ini? xchihic.

¹⁹Ya me sbuhquiylanic mohel ts'u'lum ta sjolic, ya me xhahchic ta oq'uel soc ta mel-o'tan, hich me ya yalic ta aw: ¡Obol sba, obol sba te muc'ul pueblo, te banti spisil mach'atic ay barcohetic ta mar la sta sc'uhlejalic ta scuenta te sc'uhlejale! ¡Ta junax ora jc'axel jihn! xchihic.

²⁰¡Tse'elucat me yu'un, ha'at ch'ulchan, soc ha'ex te ch'ultesbilex, jpuc-c'opex soc jalwanejex, como Dios la ya'be castigo ta acuentahic!

²¹Ay ch'ul a'bat te bayel yip, la sq'uech muc'ul ton te sjel ta muc'ul cha', la sch'oj ochel ta mar, hich la yal: Hich me ya yich' ch'ojel cohel te Babilonia, te muc'ul pueblo, ma ba ya xwehtix ta lehel.

²²Te sc'ayoj mach'atic ya stijic arpa, te j'oq'uesinej amay soc corneta, ma ba ya x'a'iyotix ta awohlil. Mayuquix j'a'teletic ta awohlil, soc mayuquix sc'op molino ta awohlil.

²³Mayuquix tsumbil c'ahc' ta awohlil, soc ma ba ya x'a'iybotix sc'op jnuhpuneletic ta awohlil; te jchombajeletic awu'un ha'ic te ich'bilic ta muc' ta bahlumilal ta nahilal, soc ta scuenta te ilojel awu'un lajic ta lo'loyel spisil te nacionetique.

²⁴Tey ta Babilonia chicnaj te sch'ich'el jalwanejetic soc te mach'atic ch'uhltesbilic soc spisil te lajemic ta milel ta bahlumilal, xchi sc'oblal.