Read Tzeltal Apocalipsis 21 Bible Online

Apocalipsis 21 - Tzeltal bible

Apocalipsis 21

¹La jquil yach'il ch'ulchan soc yach'il bahlumilal, como c'axix te ch'ulchan soc te bahlumilal te ay ta nahil to, soc mayuquix mar.

²La jquil te ch'ul pueblo, te yach'il Jerusalén, yac ta cohel tal ta ch'ulchan ta stojol Dios, chahpambil hich te bin ut'il ya sch'ahl sba jtuhl ach'ix ta stojol te mach'a ya xnuhpun soque.

³Soc la jca'iy ay mach'a tulan c'opoj tal ta muc'ul-huctajibal, hich la yal: Ya xnahinix Dios ta yohlil te ants-winiquetic, ya me sjoquin ta nahinel, ha pueblo ya xc'oht yu'un, ha nix ya xjoquinot yu'un Dios soc ha Dios yu'unic ya xc'oht.

⁴Ya me xcusticlambot ya'lel sitic yu'un te Diose; mayuquix lajel, mel-o'tan, oq'uel o te bin c'ux, como c'axix spisil te bintic ay ta nahil to, xchi.

⁵Hich la yal te mach'a hucul ta muc'ul-huctajibal: Ya jpas ta yach'il spisil, xchi. Soc hich la yalbon: Ts'ihbaya ini, como te c'op ini ay ta ich'el ta cuenta soc smelelil, xchi.

⁶Soc hich la yalbon xan: Hu'ix. Ho'on te Alfa soc te Omega, te shahchibal soc te slajibal. Te mach'a taquin yo'tan, smahtan ya ca'be yuch' ha' ta sloq'uib-ha' scuenta cuxlejal.

⁷Te mach'a ya ya'iy tsalaw ya me x'a'bot yu'untay spisil ini, soc Ho'on Dioson yu'un ya xc'ohon soc ha cal-jnich'an ya xc'oht.

⁸Yan te mach'atic ay xiwel ta yo'tanic, te ma sch'uhunic, te chopolic, jmilawetic, j'antsiwejetic, j'antsineletic, j'ilojeletic, mach'atic sch'uhunejic loc'ombahetic soc spisil jlotetic ha yu'unic ya xc'oht te banti yac ta tihlel pamal c'ahc' soc azufre. Ha te schebal buelta lajel abi, xchi te Diose.

⁹Tal jtuhl te huqueb ch'ul a'batetic te yich'ojic te huqueb copahetic te nojel ta slajibal wocoletic, hich la yalbon: La', ya ca'bat awil te ach'ix te ya xnuhpun soc te Jcolel Tuminchij, xchi.

¹⁰Hich ta scuenta te Espíritu la yic'on bahel ta muc'ul toyol wits, la ya'bon quil te muc'ul ch'ul pueblo Jerusalén te yac ta cohel tal ta ch'ulchan ta stojol Dios.

¹¹Yich'beyej yutsilal te Diose, soc te sts'anabul hich yilel bin ut'il buen t'ujbil ton, sjel ta sts'aylajan-ton, sts'ayts'on hich te bin ut'il cristal.

¹²Joybil ta muc'ul toyol ts'ahc te ay lahchayeb ochibaletic yu'un, soc lahchaytuhl ch'ul a'batetic ta ochibaletic; soc ta jujun yochibal ts'ihbabil sbihil te lahchaychahp sts'umbal Israel.

¹³Ay oxeb yochibal ta stojol sloq'uib c'ahc'al, oxeb ta stojol norte, oxeb ta stojol sur, soc oxeb ta stojol smahlib c'ahc'al.

¹⁴Ay lahchayeb yich'o-ip te ts'ahc yu'un te muc'ul pueblo, tey ts'ihbalambil sbihilic a te lahchaytuhl jpuc-c'opetic yu'un te Jcolel Tuminchije.

¹⁵Te ch'ul a'bat te la sc'oponon yich'oj jun p'is pasbil ta oro, yu'un ya sp'is a te muc'ul pueblo, te ochibaletic soc te ts'ahc yu'une.

¹⁶Chanxuhc ay te muc'ul pueblo, pajal ay soc spehchal te xuhque. La sp'is te muc'ul pueblo, ha ohlil cha'pic (12,000) estadio,[11] pajal snahtil soc sjamalil soc stoyolil.

¹⁷La sp'isbe te sts'ahcul, ha chaneb swacwinic (144) xuhc'ubil,[12] scuenta xuhc'ub winic te la sp'is a te ch'ul a'bate.

¹⁸Te sts'ahcul pasbil ta sts'aylajan-ton, yan te muc'ul pueblo pasbil ta lequil oro, pajal soc cristal.

¹⁹Te yich'o-ip te sts'ahcul te muc'ul pueblo ch'albil ta spisil ta chahp buen t'ujbil tonetic: Te shahchibal yich'o-ip sts'aylajan-ton, te schebal yaxts'ajts'aj, te yoxebal xlup'lon ta c'an, te schanebal yaxal-ton,

²⁰te yo'ebal sacliplip, te swaquebal chicmulmul, te shuquebal yax-el'el, te swaxaquebal yaxcancan, te sbalunebal c'anmulmul, te slajunebal yaxjaljal, te sbuluchebal c'anch'abch'ab ta tsaj, te slahchayebal xlup'lon ta sac.

²¹Te lahchayeb yochibal te ts'ahc, ha lahchayeb perlahetic, jujun perla te jujun yochibale. Te calle yu'un ta muc'ul pueblo pasbil ta lequil oro, xlipet hich te bin ut'il cristal.

²²Mayuc templo la jquil tey a, como ha templo yu'un te Cajwaltic Dios te spisil ya xhu' yu'un, soc te Jcolel Tuminchij.

²³Te muc'ul pueblo ma xtuhun yu'un te sts'anabul te c'ahc'al o te u, como ha sacuben q'uinal yu'un te yutsilal te Diose, soc ha jsacubtesej q'uinal te Jcolel Tuminchij.

²⁴Te nacionetic ya xbehenic ta scuenta te sacal q'uinal yu'un, soc te ajwaliletic ayic ta bahlumilal ya me yich'ic tal yutsilalic tey a.

²⁵Mayuc bin ora ya xmacbot te ochibaletic yu'un ta c'ahc'alel, como mayuc ahc'abal tey a.

²⁶Ya me yich'ticlanic tal te sc'uhlejal soc te yutsilal te nacionetique.

²⁷Ma x'och tey a te bin bohloben sc'oblal o te mach'a ya spas bin ilobtic sba o te mach'a ya ya'iy lot; ha nax te mach'atic ts'ihbabil sbihilic ta libro scuenta cuxlejal yu'un te Jcolel Tuminchij.