Read Tzeltal Apocalipsis 4 Bible Online

Apocalipsis 4 - Tzeltal bible

Apocalipsis 4

¹Patil la jquil, ay jamal ti'nahil ta ch'ulchan. Te c'op la jca'iy ta nahil te sjel ta yoq'uel corneta, hich la yal: Mohan tal li'i, ya ca'bat awil bintic ya xc'oht ta pasel ta patil, xchi.

²Ora la scuentahinon te Espíritu, la jquil ay muc'ul-huctajibal ta ch'ulchan soc ay Mach'a hucul tey a.

³Te Mach'a hucul tey a hich yilel te bin ut'il jaspe soc cornalina, soc ta sjoyobal te muc'ul-huctajibal ay xojob te hich yilel te bin ut'il esmeralda.

⁴Ta sjoyobal te muc'ul-huctajibal ay chaneb scha'winic (24) muc'ul huctajibaletic soc ay chaneb scha'winic (24) ta tuhl mamaletic huhcajtic tey a, slapojic sac sc'u' spaq'uic soc ay ta sjolic coronahetic pasbilic ta oro.

⁵Yac ta loq'uel ta muc'ul-huctajibal tsantsehwal, chahwuc, soc bayel c'op. Ay huqueb c'ahc' yac ta tihlel ta stojol te muc'ul-huctajibal, ha te huqueb espírituhetic yu'un Dios.

⁶Soc ta stojol te muc'ul-huctajibal ay sjel ta muc'ul mar yilel, sacliplip hich te bin ut'il cristal. Soc tec'ajtic ta sjoyobal te muc'ul-huctajibal ay chaneb bintic cuxajtic te scohtol ay sitic ta stahnic soc ta spatic.

⁷Te jun hich yilel te bin ut'il choj; te schebal hich yilel te bin ut'il jcolel-wacax; te yoxebal hich yilel sit yelaw te bin ut'il winic; te schanebal hich yilel te bin ut'il muc'ul jxic yac ta wihlel.

⁸Ta schanebal te bintic cuxajtic ay wacwaqueb xic' ta jujun, soc ay sitic ta scohtol soc ta yutil. C'ahc'al ahc'abal ma xquehchajic ta yalel: Ch'ul Dios, Ch'ul Dios, Ch'ul Dios te Cajwaltic Dios te spisil ya xhu' yu'un, te ay ta namey, ta ora ini, soc te ya xtale, xchihic.

⁹Te jujun buelta te ya yalbeyic yutsil sc'oblal, te ya yich'ic ta muc' soc te ya yalbeyic wocol te Mach'a hucul ta smuc'ul-huctajib soc te stalel cuxul sbahtel q'uinal,

¹⁰te chaneb scha'winic (24) ta tuhl mamaletic ya spahcan sbahic ta stojol te Mach'a hucul ta smuc'ul-huctajib, ya sch'uhuntayic te Mach'a stalel cuxul sbahtel q'uinal, ya xohtan scoronahic ta stojol te muc'ul-huctajibal soc hich ya yalic:

¹¹Cajwaltic Dios, hich ya sc'an te yac awich' awutsilal, ich'el ta muc', soc awu'el, como ha'at la apas spisil bintic ay, soc ta scuenta sc'anojel awo'tan cuxajtic soc la yich'ticlan pasel, xchihic.