Read Tzeltal Apocalipsis 7 Bible Online

Apocalipsis 7 - Tzeltal bible

Apocalipsis 7

¹Patil la jquil chaneb ch'ul a'batetic tec'ajtic ta schanxuhcul bahlumilal, scomojic te chaneb ic' te ya xbehenic ta bahlumilal scuenta yu'un ma ba ya xbehen ic' ta q'uinal, ta mar o ta te'etic.

²Soc la jquil yan ch'ul a'bat te mo tal ta banti ya xloc' tal c'ahc'al, yich'oj te sello yu'un te cuxul Dios. Tulan la yawtay te chaneb ch'ul a'batetic te yich'oj ya'telic ta sjinel te q'uinal soc te mar,

³hich la yal: Ma to me xajinic te q'uinal, te mar o te te'etic ha to teme la jcac'ticlambecotic sello ta sti'bahic te a'batetic yu'un te Dios cu'untique, xchi.

⁴La jca'iy jaytuhlic te ac'ticlambot yich'ic sello: ha waxaclajunpic (144,000) ta tuhl yu'un spisil ta chahp te yal-snich'nab Israel.

⁵Ta jchahp sts'umbal Judá j'ohlil scha'pic (12,000) ta tuhl, ta jchahp sts'umbal Rubén j'ohlil scha'pic (12,000) ta tuhl, ta jchahp sts'umbal Gad j'ohlil scha'pic (12,000) ta tuhl,

⁶ta jchahp sts'umbal Aser j'ohlil scha'pic (12,000) ta tuhl, ta jchahp sts'umbal Neftalí j'ohlil scha'pic (12,000) ta tuhl, ta jchahp sts'umbal Manasés j'ohlil scha'pic (12,000) ta tuhl,

⁷ta jchahp sts'umbal Simeón j'ohlil scha'pic (12,000) ta tuhl, ta jchahp sts'umbal Leví j'ohlil scha'pic (12,000) ta tuhl, ta jchahp sts'umbal Isacar j'ohlil scha'pic (12,000) ta tuhl,

⁸ta jchahp sts'umbal Zabulón j'ohlil scha'pic (12,000) ta tuhl, ta jchahp sts'umbal José j'ohlil scha'pic (12,000) ta tuhl, soc ta jchahp sts'umbal Benjamín j'ohlil scha'pic (12,000) ta tuhl ac'ticlambot sellohilic.

⁹Patil la jquil c'ax tsobolic, mayuc mach'a ya xhu' ya yahtay, talemic ta spisil ta chahp nacionetic, ts'umbaliletic, pueblohetic soc c'opiletic; tec'ajtic ta stojol te muc'ul-huctajibal soc ta stojol te Jcolel Tuminchij, slapojic sac sc'u' spaq'uic soc stuchticlanejic xahn ta sc'abic.

¹⁰Tulan hich yacalic ta c'op: Ay colel ta scuenta te Dios cu'untic te hucul ta muc'ul-huctajibal, soc ta scuenta te Jcolel Tuminchij, xchihic.

¹¹Spisil te ch'ul a'batetic, te mamaletic soc te chaneb bintic cuxajtic sjoytayejic ta tec'lej te muc'ul huctajibal, la spahcan sbahic ta stojol te muc'ul-huctajibal soc la sch'uhuntayic te Diose,

¹²hich yacalic ta yalel: ¡Hichuc! Ac'a yich' halbeyel yutsil sc'oblal, ac'a yich' yutsilal, p'ijil-o'tanil, halbeyel wocol, yich'el ta muc', yu'el soc yip te Dios cu'untic ta scuenta sbahtel q'uinal. ¡Hichuc! xchihic.

¹³Ay jtuhl te mamaletic la sjoc'obon: ¿Mach'atic a ini te sac sc'u' spac' slapojic soc banti talemic? xchi.

¹⁴La jcalbe: Tatil, ha'at yac ana', la jcut. Hich la yalbon: Ha'ic ini te c'axem yu'unic te tulan uts'inel; sac'ojiquix sc'u' spaq'uic, ha la sacubtesic te ta sch'ich'el te Jcolel Tuminchij.

¹⁵Ha yu'un te ayiquix ta stojol te smuc'ul-huctajib te Dios soc c'ahc'al ahc'abal ayic ta a'batinel ta templo yu'un. Te Mach'a hucul ta muc'ul huctajibal ya me smuc'ubtes te snahilpac' ta stojolic.

¹⁶Ma ba ya xwi'najiquix soc ma ba ya ya'iyiquix taquinti'il, ma ba ya ya'iyiquix sc'uxul c'ahc'al, o yan sq'uixnal,

¹⁷como te Jcolel Tuminchij te ay ta yohlil te muc'ul-huctajibal ha ya scanantay soc ya me stojobteslan bahel ta banti ay sloq'uib ha'etic scuenta cuxlejal. Soc ya me xcusticlambot ya'lel sitic yu'un te Diose, xchi.