Read Tzeltal Rut 2 Bible Online

Rut 2 - Tzeltal bible

Rut 2

¹Ay jtuhl winic te ma yanuc parte yu'un te smamalal Noemí, ha jc'ulej winic te jun sbihil soc Elimelec, Booz sbihil.

²Te Rut te moab-ants la yalbe te Noemí: Awocoluc, ac'awon bahel yu'un ya jtam cebada te hilem yu'un mach'ayuc a te lecon ta sit, xchi. Bahan hiche, cantsil-al, xchi te Noemí.

³Hich baht te Rut, hahch ta stamel bahel ta spat te jboj-cebadahetique. Tey c'oht a ta sq'uinal Booz, te jun sbihil soc Elimelec.

⁴Ha yorahil a te loc' tal ta Belén te Booz, hich la yalbe te j'a'teletic yu'une: Ac'a sjoquinex te Jehová, xchi. Ac'a ya'bat bendición te Jehová, xchihic.

⁵Te Booz la sjoc'obe te a'bat yu'un te scuentahinej te jboj-cebadahetic: ¿Ban talem te ach'ixe? xchi.

⁶Hich la sjac' te ya'bat: Ha moab-ach'ix te suht loq'uel tal soc Noemí ta sq'uinal Moab.

⁷Hich la yalbon: Awocoluc, a'bon jtam bahel ta spat te jboj-cebadahetic ta yohlil te jtohmotohm, xchi. Hich och ta stamel yalel ta sab c'alal ta ora ini, ma ba scuxoj yo'tan ts'ihnuc, xchi.

⁸Ha yu'un te Booz hich la yalbe te Rut: A'iya awa'iy, cantsil-nich'an, ma me xbahat ta stamel ta yan q'uinal, ma me xloc'at bahel; li' me yac ajoquin te criadahetic cu'une.

⁹Ilawil ta lec banti yaquic ta sbojel, tey me ya xbahat a; yu'un la jcalbe te a'batetic te ma me xyuts'inat. Te c'alal ya xtaquij awo'tan, bahan ta banti ay te yawil ha'etic, uch'a te ha' te ya sloq'uesic te a'batetique, xchi.

¹⁰Ha yu'un te Rut la snijan cohel sba ta lum, soc hich la yalbe: ¿Bin ut'il ay a te ay yutsil awo'tan ta jtojol, te yac ac'uxultayon te ho'on jyanlumon? xchi.

¹¹La sjac' te Booz: Yu'un ca'iyej spisil te bin la apasbe te awalibme'el te c'alal chamenix a te amamalal, soc te la awihquitay hilel te ame'atat soc alumal, te talat ta nahinel soc jun pueblo te ma ba la ana'be sbahe.

¹²Te Jehová ac'a stojat yu'un te bintic la apas, soc yacuc x'a'botat amahtan yu'un Jehová te Dios yu'un Israel, te tal awac' aba ta ye'tal xic' yu'une, xchi.

¹³La sjac' te Rut: Cajwal, bayel yutsil awo'tan ta jtojol soc la amuc'ubtesbon q'uinal ca'iy; la awutsil c'opon te a'bat awu'un aunque ma criadahucon awu'un, xchi.

¹⁴Ta yorahil we'el, te Booz la yalbe: La', we'an pan, soc mula ta vinagre te xuht' pan awu'une, xchi. Hich pajal la shuhcan sba soc te jboj-cebadahetic, te Booz la ya'be ch'ilbil trigo. La swe' ha to c'alal noj sch'uht, soc ay to hil yu'un.

¹⁵C'alal baht xan ta stamel, te Booz hich la spas ta mandar te a'batetic yu'un: A'beya stam ta banti tomajtic, ma me xaq'uexlaltesic.

¹⁶Ihquitayahic jtebuc te tomajtique, ac'a stamticlan, ma me xawutic, xchi.

¹⁷Hich te Rut la stam ha to c'alal mal c'ahc'al. La swuybe spat te jayeb stamoj, ay wan junuc efa[4] te cebada.

¹⁸La yich' bahel ta pueblo, te yalibme'el la yil te jayeb la stsob. Patil la sloq'ues te jayeb hil yu'un te c'alal we' soc noj sch'uht, la ya'be.

¹⁹Hich halbot yu'un te yalibme'el: ¿Banti c'ohat ta stamel cebada? ¿Banti a'tejat nax? ¡Bayel me yutsil te mach'a la sc'uxultayat! xchi yu'un. Hich te Rut la yalbe ya'iy te yalibme'el mach'a a te la sjoquin ta a'tel, soc la yal: Ha Booz sbihil te winic te banti a'tejon nax, xchi.

²⁰Te Noemí la yalbe te yalibe: ¡Ac'a a'botuc bendición yu'un Jehová! Ma ba quehchaj yu'un sc'uxultayel te mach'atic cuxulic soc te mach'atic chamenic. Te winic ini, ma yanuc parte cu'untic, ha nix te mach'a ay ta scuenta te ya scoltayotic, xchi.

²¹Hich la yal xan te Rut te moab-ants: Hich la yalbon xan te winique: Joquina te criadahetic cu'un ha to c'alal ya xlaj spisil ta bojel, xchi.

²²Te Noemí la sjac'be sc'op te Rut te yalibe: Cantsil-al, ha lec te yac ajoquin te criadahetic yu'un, hich ma ba yac ata uts'inel ta yan q'uinal a, xchi.

²³Hich la sjoquin ta stamel te criadahetic yu'un Booz ha to c'alal laj ta loq'uel te cebada soc te trigohe. Soc la sjoquin xan ta nahinel te yalibme'ele.