Read Tzeltal Rut 3 Bible Online

Rut 3 - Tzeltal bible

Rut 3

¹Patil te Noemí hich la yalbe te Rut: Cantsil-al, ¿ma bal ha'uc lec te ya jlehbat banti ya xnahinat, scuenta yu'un lec ya xc'ohat a?

²Ma yanuc parte cu'untic te Booz, te ajoquinej te criadahetic yu'une. Yo'tic ta ahc'abal ya xbaht yic'ay spat cebada ta swuyojibal.

³Ha yu'un atinan, soc atina perfume, lapa te lec ac'u' apac', bahan ta swuyojibal spat cebada; pero ma me xawac' yilat te winic ha to c'alal lajix yo'tan ta we'el uch'el a.

⁴C'alal ya xbaht ta wayel, ya me awil te banti ya smehtsan sba; bahan tey a, jolbeya te smuhquil yoc, mehtsana aba tey a. Ha ya yalbat awa'iy te bin yac apase, xchi.

⁵Hich la sjac' te Rut: Ya jpas spisil te bintic yac awalbon, xchi.

⁶Hich co bahel ta swuyojibal trigo, la spas spisil te bin halbot yu'un te yalibme'ele.

⁷C'alal we' uch' te Booz soc ay yutsil q'uinal la ya'iy, baht ta wayel ta sti'il banti busajtic te cebada. Patil muquen tal te Rut, la sjolbe smuhquil yoc, la smehtsan sba tey a.

⁸Ta ohlil ahc'abal la xach' sba te winique, la sut sba, la yil jtuhl ants metsel ta yoc.

⁹¿Mach'ayat a? xchi. Ho'on te Rut, te a'bat awu'une. Muca ta sti'il amuc'ul c'u' te a'bat awu'un, como ma yanucat parte a, xchi.

¹⁰Hich la yal te Booz: Ac'a ya'bat bendición te Jehová, cantsil-nich'an. Te bin la apas ta ora ini c'ax hich yutsil a te bin ut'il la apas ta nahil to, te ma ha'uc baht ale jtuhl querem, chican teme pobre o jc'ulej.

¹¹Lec ay hiche, ma me xiwat, cantsil-nich'an; ya jpasbat te bin la awal, yu'un spisil jlumal ya sna'ic te lequil antsat.

¹²Aunque ma yanucon parte awu'un, ay yan te mach'a nopol xan awu'un.

¹³C'axuc ahc'abal awu'un li'i. C'alal ya sacub q'uinal, teme ha ya scoltayat, lec ay, ac'a scoltayat; pero teme ma sc'ane, ho'on ya cal ta stojol Jehová te ya jcoltayat. Cuxa awo'tan hiche ha to c'alal ya sacub q'uinal, xchi.

¹⁴Hich way te Rut ta banti yoc c'alal ta sab, pero hahch bahel te c'alal ma to chicanuc q'uinal a, yu'un hich yaloj te Booz: Ma me ayuc mach'a ya sna' te xtaluc ants ta swuyojibal spat cebada, xchi.

¹⁵Patil te Booz hich la yalbe: Loq'uesa te amehyil pac' alapoj, t'ima, xchi. Hich la spas te Rut. A'bot wacp'is[5] cebada yu'un te Booz, la slicbe mohel ta spat, hich baht ta pueblo.

¹⁶C'alal c'oht ta banti ay te yalibme'el, hich joc'obot yu'un: ¿Bin ut'il c'oht, cantsil-al? xchi. Te Rut la smelbe ya'iy spisil te bin pasbot yu'un te winique.

¹⁷Soc hich la yal: Ha la ya'bon te wacp'is cebada ini, yu'un la yalbon: Ma me jocholuc ac'ab ya suhtat bahel ta stojol te awalibme'el, xchi.

¹⁸Ha yu'un la yal te Noemí: Mahliya, cantsil-al, ha to c'alal yac awa'iy bin ut'il ya xc'oht te c'ope; como te winic ini ma ba ya scux yo'tan ha to teme chahpaj yu'un yo'tic te c'ope, xchi.