Read Tzeltal 1 Samuel 1 Bible Online

1 Samuel 1 - Tzeltal bible

1 Samuel 1

¹Ay jtuhl winic ta Ramataim, ha zuf-winic[1] te ay ta witsiltic yu'un Efraín, Elcana sbihil, ha snich'an Jeroham snich'an Eliú, snich'an Tohu, snich'an Zuf, sts'umbal Efraín.

²Ay cheb yihnam, Ana sbihil te jtuhle, Penina sbihil te yane. Te Penina ay yalatac, yan te Ana mayuc yal stuquel.

³Te winic jujun ha'bil ya xloc' hahchel ta pueblo yu'un, ya xbaht ta Silo ta sch'uhuntayel soc ta ya'beyel milbil smahtan te Jehová te scuentahinej spisil, tey ta banti ay te cheb snich'nab Elí: ha te Ofni soc Finees, te sacerdotehetic yu'un Jehová.

⁴Te c'alal ya xc'oht yorahil te ya yac' milbil mahtanil te Elcana, ya ya'be swe'el te Penina te yihnam soc spisil queremetic soc ach'ixetic yu'un.

⁵Pero te Ana mero tsahbil we'elil ya ya'be stuquel, como c'ux ta yo'tan, aunque ma ba ac'ot ta alajel yu'un te Jehová.

⁶Te Penina, te smohlol ta antsil, bayel la yuts'in soc la ya'be smel yo'tan, yu'un ma ba ac'ot ta alajel yu'un te Jehová.

⁷Hich ya spasulan jujun ha'bil; te c'alal ya xmo bahel ta sna Jehová la ya'be smel yo'tan. Ha yu'un te Ana ya x'oc' soc ma ba ya xwe'.

⁸Te Elcana te smamalal hich ya yalbe: Ana, ¿bin yu'un ya x'oc'at? ¿bin yu'un ma xwe'at? ¿bin yu'un te yacat ta mel-o'tan? ¿Yu'un bal ma ba c'ax hichon ta atojol a te bin ut'il lajuntuhl al-nich'anetic? xchi.

⁹C'alal laj yo'tanic ta we'el uch'el ta Silo, hahch te Ana. Te sacerdote Elí hucul ta shuctajib ta nopol yoyal spuertahul te templo yu'un Jehová.

¹⁰Te Ana, soc bayel smel-o'tan la sc'opon te Jehová, soc bayel oc'.

¹¹Hich jc'axel la yal ta jamal: Jehová te scuentahinej spisil, teme yac awilbe swocol te a'bat awu'un, teme yac ana'on soc teme ma ba ya xch'ay ta awo'tan te a'bat awu'un, teme yac awa'be jtuhl squerem-al te a'bat awu'une, jc'axel ya ca'be te Jehová te jayeb c'ahc'al cuxul, soc ma ba ya yich' set'el stsotsel sjol, xchi.

¹²C'alal halaj ta sc'oponel te Jehová, te Elí yac yilbebel sti'il ye.

¹³Te Ana yac ta c'op ta yo'tan, ha nax ya snic sba te sti'il ye, ma chicanuc te sc'ope; te Elí la scuy te yuch'oj.

¹⁴Ha yu'un te Elí la yalbe: ¿Bin to ora ya xlaj awo'tan ta yacubel? Ihquitaya te vino awu'un, la yut.

¹⁵Pero la sjac' te Ana: Ma'uc, cajwal, ho'on antson te bayel yacon ta mel-o'tan. Ma ba cuch'oj vino o bin pajuben, yacon ta yalel ta stojol Jehová te bin ay ta co'tan.

¹⁶Ma me xacuy ta chopol ants te awa'bate, como ta scuenta bayel jmel-o'tan soc jwocol yacon ta c'op c'alal ora, xchi.

¹⁷La sjac' te Elí: Jun awo'tan xbahat, soc te Dios yu'un Israel ac'a ya'bat te bin la ac'ambe ta stojol, xchi.

¹⁸Lecuc me ya xc'oht ta asit te a'bat awu'un, xchi te Ana. Hich suht bahel, we', soc tey mayuquix bin ora la smel yo'tan a.

¹⁹Hahchic ta sab, la sch'uhuntayic te Jehová, suhtic bahel ta sna ta Ramá. Te Elcana way soc te Ana te yihnam; te Jehová la sna' te antse.

²⁰Hahch yal te Ana; c'alal ts'acay te tiempo ayin squerem-al, la ya'be sbihilin Samuel,[2] yu'un la yal: La jc'ambe te Jehová, xchi.

²¹Patil te Elcana soc spisil mach'atic ay yu'un mohic bahel ta ya'beyel Jehová te milbil mahtanil te ya yac' jujun ha'bil soc te bin jc'axel yaloj ta jamal.

²²Pero te Ana ma ba mo bahel stuquel, yu'un la yalbe te smamalal: Ma ba ya xbohon ha to teme hil schu' te alale, hich ya quic' bahel, ya ca'be ta stojol Jehová soc tey jc'axel ya xhil a, xchi.

²³Te Elcana te smamalal Ana hich la sjac': Pasa te bin lec yac awa'iy, hilan li'i ha to c'alal yac awihquitaybe schu'; hich ac'a c'ohtuc ta pasel te bin yaloj te Jehová, xchi. Hich hil te antse, la scoltes te yal ha to c'alal hil schu' yu'un.

²⁴Te c'alal hil schu' yu'un, la yic' bahel sjoquin ta sna Jehová ta Silo soc oxcoht jcolel torohetic,[3] jun efa[4] harina soc jun vasija vino. Tut to a te alale.

²⁵C'alal yich'ojix milel a te jcolel toro, la yiq'uic bahel te alal ta stojol Elí.

²⁶Te Ana hich la yalbe te Elí: ¡Cajwal! Te bin ut'il cuxulat, cajwal, ho'on me te la jc'opon Jehová li' ta atojol.

²⁷Ha te alal ini te la jc'opon Dios yu'une; te Jehová la ya'bon te bin la jc'ambe.

²⁸Ha yu'un hich nix ya ca'be te Jehová. Te jayeb c'ahc'al cuxul, ha me yu'un stuquel te Jehová, xchi. Tey la squejan sba ta sch'uhuntayel te Jehová.[5]