Read Tzeltal 1 Samuel 19 Bible Online

1 Samuel 19 - Tzeltal bible

1 Samuel 19

¹Te Saúl la yalbe te Jonatán te snich'an, soc spisil te a'batetic yu'un te yacuc smilic te David. Pero te Jonatán bayel c'ux ta yo'tan te David,

²hich c'oht yalbe te David: Te jtat Saúl ya sc'an ya smilat. Ha yu'un canantaya aba ta sab pajel, nac'a hilel aba.

³Ya xloc'on bahel, ya joquin te jtat ta aquiltic te banti ayat; ya calbat ac'oblal ta stojol te jtat, soc ya ca'bat ana' te bin ya yal, xchi.

⁴Te Jonatán la yalbe lec sc'oblal David ta stojol Saúl te stat, hich la yal: Ma me sle smul te ajwalil ta stojol David te a'bat yu'un, como mayuc bin chopol la spasbat, ha mero lec ya'tel ta atojol.

⁵Mayuc sc'oblal te scuxlejal la ya'iy yu'un ya smil te filisteo, hich te Jehová la yac' te la ya'iy muc'ul tsalaw spisil Israel. Ha'at la awil, tse'el awo'tan yu'un. ¿Bin yu'un te yac ac'an yac ata amul ta smalbeyel sch'ich'el te mach'a mayuc smul, ha te yac amil te David ta tojol nax? xchi.

⁶La ya'iybe sc'op Jonatán te Saúl, hich la yal ta jamal: ¡Yiloj Jehová! ma ba ya xlaj te David, xchi.

⁷Ha yu'un te Jonatán la yic' tal te David, la yalbe ya'iy spisil. Ha nix la yic' bahel ta stojol Saúl, hich te David hil ta stojol hich te bin ut'il ta nahil to.

⁸Hahch guerra yan buelta. Hich loc' bahel te David, baht ya'be guerra te filisteohetique. Bayel la smilticlan hilel, hich loq'uic ta ahnel ta stojol.

⁹Pero te bohl espíritu ticombil yu'un Jehová hul ta stojol Saúl, hucul ta sna soc stsacoj slanza ta sc'ab a. Yac ta stijel arpa a te David,

¹⁰te Saúl ya c'an sts'ap ta lanza ta pahc', pero loc' bahel ta stojol Saúl, ts'apal hil ta pahc' te lanzahe. Ha nix ta ahc'abal a loc' ta ahnel te David.

¹¹Te Saúl la sticon bahel winiquetic ta yilel ta sna te David yu'un ya smilic ta sab. Pero te Mical te yihnam, la yalbe te David: Teme ma ba yac acoltay aba ta ahc'abal ini, pajel lajematix a, xchi.

¹²Ha yu'un te Mical la sjihpan cohel te David ta ventana; hich loc' bahel ta ahnel.

¹³Te Mical la stsac jun loc'omba, la yac' ta wayibal, la ya'be sjolin stsotsel tentsun soc la smuc ta pac'.

¹⁴C'alal la sticon bahel winiquetic te Saúl ta schuquel tal te David, hich la yal te Mical: Ay ta chamel, xchi.

¹⁵Te Saúl la scha'ticon xan bahel te winiquetic ta yilel te David, hich la yalbe: Ic'bonic tal soc swayib, yu'un ya jmil, xchi.

¹⁶Te c'alal och bahel te winiquetic, la yilic te ay loc'omba ta wayibal soc ts'amjolal pasbil ta stsotsel tentsun.

¹⁷Ha yu'un te Saúl la yalbe te Mical: ¿Bin yu'un la alo'loyon soc la awac' ahnuc bahel te jcontra? xchi. Te Mical la sjac'be te Saúl: Como hich la yalbon: Ac'awon bahel, teme ma'uque ya jmilat, xchi.

¹⁸Hich loc' bahel ta ahnel te David, tal ta banti ay Samuel ta Ramá, c'oht yalbe ya'iy spisil te bintic pasbot yu'un Saúl. Te Samuel soc te David bahtic ta nahinel ta Naiot.

¹⁹C'oht ta halbeyel te Saúl: Ay ta Naiot ta Ramá te David, xchi.

²⁰Ha yu'un te Saúl la sticon bahel winiquetic ta yiq'uel tal te David. La yilic jchahp jalwanejetic te yacalic ta yalel sc'op-jalwanej, soc la yilic tey ay a te Samuel, ha j'ic'aw yu'unic. Hul te espíritu yu'un Dios ta stojol te winiquetic te ticombilic yu'un Saúl, ha nix hich hahchic ta c'op ta sc'op-jalwanej.

²¹C'alal hich la ya'iy te Saúl, la sticon yan winiquetic, pero ha nix hich hahchic ta c'op ta sc'op-jalwanej. Te Saúl la sticon yan winiquetic scuenta yoxebal buelta, ha nix hich hahchic ta c'op ta sc'op-jalwanej.

²²Ha yu'un ha nix baht ta Ramá te Saúl. C'alal c'oht ta muc'ul pozo te ay ta Secú, la sjoc'oy: ¿Banti ay te Samuel soc David? xchi. Ay mach'a la sjac': Ayic ta Naiot ta Ramá, xchi.

²³Hich baht ta Nairot ta Ramá, ha nix hich hul ta stojol te espíritu yu'un Dios; hich behen bahel soc yac ta yalel sc'op-jalwanej ha to c'alal c'oht ta Naiot ta Ramá.

²⁴La schol loq'uel sc'u' spac', ha nix hich c'opoj ta sc'op-jalwanej ta stojol Samuel, mayuc sc'u' spac' sjunal c'ahc'al soc sjunal ahc'abal. Tey chicnaj a te c'op: ¿Ha ni bal jalwanej yu'un Dios te Saúl? te xchihe.