Read Tzeltal 1 Samuel 21 Bible Online

1 Samuel 21 - Tzeltal bible

1 Samuel 21

¹Te David baht ta Nob ta stojol te sacerdote Ahimelec. Te Ahimelec yac ta xiwel a loc' ta stahel, hich la yalbe: ¿Bin yu'un te atuquel talat, te mayuc mach'a sjoquinejat? xchi.

²Te David la sjac'be sc'op te Ahimelec: Ay bin la ya'bon jpas te ajwalil, hich la yalbon: Ma me ayuc mach'a ya sna' te bin ya jticonat ta spasel soc te bin la jcalbat, xchi. La jcalbe te winiquetic cu'un te ya stahonic ta yan lugar.

³Yo'tic ¿bin ay awu'un? A'bon ho'pehchuc pan, o chican te bin ay awu'un, xchi.

⁴Te sacerdote la sjac'be sc'op te David: Mayuc pan yu'un we'elil, ha nax te ch'ultesbil pan; ya ca'bat teme ma ba wayemic soc ants te winiquetic awu'une, xchi.

⁵Te David la yalbe te sacerdote: Ta smelelil namal ayic ta jtojolcotic a te woje soc cha'je; te c'alal loc'otcotic talel, ch'uhltesbilic a te sbaq'uetalic te winiquetic, aunque mayuc sc'oblal te behele; ¿ma bal c'axemuc to xan hich ch'uhltesbilic a yo'tic? xchi.

⁶Hich te sacerdote la ya'be te ch'ultesbil pan, como mayuc yan pan, ha nax te pan te ac'bil ta stojol Dios, te loq'uesbil tal ta stojol Jehová yu'un ya yich' otsesel q'uixin pan tey a.

⁷Ha nix yorahil te tey macbil a ta stojol Jehová jtuhl a'bat yu'un Saúl, Doeg sbihil, talem ta Edom, ha jtsobaw yu'un te jcanan-tuminchijetic yu'un Saúl.

⁸Te David la yalbe te Ahimelec: ¿Ay bal lanza o espada awu'un li'i? Como ma ba la jquich' tal te espada cu'un o yan ca'tejib ta guerra scaj te ora nax pasawan ta mandar te ajwalil, xchi.

⁹La sjac' te sacerdote: Li' ay te espada yu'un Goliat, te filisteo-winic te la amil ta spamlej Ela; ay ta spat efod, potsol ta pac'. Teme yac ac'an yac awich', ich'a bahel, yu'un mayuc yan, ha nax ini, xchi. Mayuc yan pajal soc me ine; a'bon hiche, xchi te David.

¹⁰Ha nix yorahil a te loc' ta ahnel ta stojol Saúl te David, baht ta stojol Aquis te ajwalil yu'un Gat.

¹¹Te a'batetic yu'un Aquis hich la yalbeyic: ¿Ma bal ha'uc te David ini, te ajwalil yu'un te q'uinale? ¿Ma bal ha'uc te hich c'ayojtayot ta ahc'ot: Te Saúl la smil bayel ta mil (1,000) ta tuhl; te David la smil bayel ta lajunmil (10,000) ta tuhl, te xchihe?

¹²Te David la yich' ta cuenta te bin la yich' halel ini soc bayel la xi' te Aquis te ajwalil yu'un Gat.

¹³Hich la syanijtes sba ta stojolic, la sp'is sba ta sohquem sjol; coxomtic sts'ihbalambel ta puerta ta ochibal, soc la yac' oquinuc cohel ya'lel ye ta yisim.

¹⁴Te Aquis la yalbe te a'batetic yu'un: Sohquem sjol yac awilic te winique, ¿bin yu'un la awic'bonic tal?

¹⁵¿Yu'un bal ya spason falta jsohquejoletic, te la awic'bonic tal te winic ini te biluc nax ya spas ta jtojol? ¿Ya bal spas te ya x'och ta jna te winic ini? xchi.