Read Tzeltal 1 Samuel 25 Bible Online

1 Samuel 25 - Tzeltal bible

1 Samuel 25

¹Cham te Samuel. Spisil Israel la stsob sbahic yu'un ya yoq'uetayic; la smuquic ta sq'uinal ta Ramá. Patil te David co bahel ta jochol taquin q'uinal Parán.

²Ay jtuhl winic ta Maón te ay sq'uinal ta Carmel. Mero jc'ulej, ay lajunwinic swaxacbahc' (3,000) tuminchijetic soc lajunwinic yoxbahc' (1,000) tentsunetic yu'un. Yac ta sloq'uesbeyel stsotsel stuminchij ta Carmel.

³Nabal sbihil te winic soc Abigail sbihil te yihname. Mero p'ij yo'tan soc buen t'ujbil te antse, yan te winique tulan yo'tan soc chopol ya'tel. Ha sts'umbal te Caleb.

⁴Te c'alal ay ta jochol taquin q'uinal a te David, la ya'iy te yac ta sloq'uesbeyel stsotsel stuminchij.

⁵Ha yu'un te David la sticon bahel lajuntuhl jcolel winiquetic, hich la yalbe: Mohanic bahel ta Carmel ta banti ay te Nabal, patbeyahic yo'tan ta jcuenta.

⁶Hich me xawalbeyic: Lamaluc me q'uinal ta atojol soc ta stojol te mach'atic ay awu'un soc ta spisil te bintic ay awu'une.

⁷La jca'iy te ay jloq'uesej-stsotsel-tuminchijetic awu'un. C'alal la sjoquinotcotic te jcanan-tuminchijetic awu'une, ma ba la jcuts'incotic soc mayuc bin ch'ayem yu'unic te jayeb c'ahc'al ayic ta Carmel.

⁸Joc'obeya te a'batetic awu'un, hich me ya yalbat. Ha yu'un lecuc me sc'oblalic awu'un te jcolel winiquetic cu'un ini como talemotcotic ta yorahil q'uin. Awocoluc, a'beya te a'batetic awu'un soc te anich'an David biluc a te ay awu'un, xchi.

⁹Hich bahtic te jcolel winiquetic te ticombilic yu'un David, c'oht yalbeyic ya'iy te Nabal spisil te bintic halbotic yu'un te David; hich la smahliyic.

¹⁰Pero te Nabal hich la sjac'be sc'opic: ¿Mach'a a te David, mach'a a te snich'an Isaí? Yo'tic ayix bayel a'batetic te yacalic ta ahnel ta stojol te yajwalique.

¹¹¿Ya bal c'an jtsac te pan, te ha' soc te ti'bal te la jchahpan yu'un ya ca'be te jloq'uesej-stsotsel-tuminchijetic cu'un, te ha ya ca'be te winiquetic te ma jna' banti talemic? xchi.

¹²Te jcolel winiquetic te ticombilic yu'un David suhtic bahel. C'alal c'ohtic ta stojol David la yalbeyic spisil te c'ope.

¹³Te David hich la yalbe te swinictac: Chuca ta ach'uhtic te espada awu'unic, xchi. Hich jujutuhl la schuc ta sch'uhtic te espada yu'unic, ha nix hich la spas te David. Ay wan jbahc' (400) ta tuhl winiquetic te la sjoquinic bahel te David, lajunwinic (200) ta tuhl hilic ta scanantayel te biluquetic yu'unique.

¹⁴Pero ay jtuhl a'bat te hich baht yalbe te Abigail te yihnam Nabal: Te David la sticon tal winiquetic c'alal ta jochol taquin q'uinal ta yalel patil-o'tanil ta stojol te cajwalcotic, pero chopol bin la sutbe bahel.

¹⁵Yan stuquelic buen lec yo'tanic ta jtojolcotic, mayuc la yuts'inotcotic soc mayuc bin ch'ayem cu'uncotic te jayeb c'ahc'al la joquincotic ta q'uinal.

¹⁶Ta c'ahc'al ahc'abal hich c'ohemic te bin ut'il ts'ahc ta jtojolcotic te jayeb ch'ahc'al la joquincotic ta scanantayel te tuminchijetique.

¹⁷Ha yu'un nopa awa'iy bin ya sc'an yac apas, como chapalix te ay bin chopol ya xc'oht ta stojol te cajwalcotic soc spisil te mach'atic ay yu'une. Como mero chopol winic, mayuc mach'a ya xhu' ya sc'opon, xchi.

¹⁸Ha yu'un te Abigail ora la yich' bahel lajunwinic (200) ta pehch pan, cheb yawil vino, ho'coht wohbil tuminchij, ho'p'is[26] ch'ilbil trigo, ho'winic (100) ta pehch taquijtesbil ts'usub soc lajunwinic (200) ta pehch taquijtesbil higo, la ya'be scuch bahel burrohetic.

¹⁹Hich la yalbe te a'batetic yu'un: Nahilijanic bahel, patil ya xtalon, xchi. Mayuc bin la yalbe te Nabal te smamalale.

²⁰Cajal ta burro a muquen co bahel ta wits, yac ta talel a te David soc te winiquetic yu'un, baht sta sba soc.

²¹Hich yalojix te David: Tojol la jcanantaybe spisil te bintic ay yu'un ta jochol taquin q'uinal scuenta yu'un mayuc bin ch'ay te bintic ay yu'un. La suhtbon ta bin chopol te bin leque.

²²Dios hich ac'a spasbe te scontratac David,[27] soc c'ax to xan hich a, teme ta sab pajel cuxul ya xhil cu'un jtuhluc te mach'a ay yu'un, xchi.

²³Te Abigail c'alal la yil te David, ora co ta sburro, la spahcan sba c'alal ta lum ta stojol te David.

²⁴La spahcan sba ta ye'tal yoc, hich la yal: Cajwal, ho'on ac'a c'ohtuc ta jcuenta te mulile. Awocoluc, ac'a sc'oponat te a'bat awu'un, a'iybeya awa'iy te sc'op te ya yalbate.

²⁵Ma xawich' ta cuenta te chopol winic Nabal; como hich ay stalel te bin ut'il c'ohem te sbihile. Ha Nabal[28] te sbihile, mayuc snopojibal yu'un. Te ho'on te a'baton awu'un, ma ba la jquil te winiquetic te ticombilic awu'une.

²⁶Yo'tic, cajwal, ¡yiloj Jehová, soc cuxulat! te Jehová la scomat ta smalel ch'ich' soc ma ba la ya'bat te yac apac ac'abal. Hich me ac'a c'ohtuc te bin ut'il Nabal te acontratac soc spisil mach'atic ya sle bin chopol ta stojol te cajwal.

²⁷Te mahtanil te la yich' tal te a'bat awu'un ac'a yich'ic te winiquetic te ya sjoquinic te cajwal.

²⁸Awocoluc pasbeya perdón te a'bat awu'un te bin chopol ini. Jehová ya me ya'be yip te sna te cajwal, yu'un yacat ta spasel te guerra yu'un Jehová, soc ma me ayuc bin chopol ya stahat te jayeb c'ahc'al cuxulat.

²⁹Aunque ay mach'a ya snutsat yu'un ya sc'an ya smilat, te scuxlejal te cajwal jun ya xc'oht soc te mach'atic cuxulic ta stojol Jehová te Dios awu'une; soc ya me sch'oj bahel te scuxlejal te acontratac hich te bin ut'il ton ta jihmuch'il.

³⁰Te c'alal ya xc'oht ta pasel yu'un Jehová spisil te bin lec yaloj ta atojol, soc te c'alal ya yac'at ta jtsobaw yu'un Israel,

³¹hich mayuc bin ya yac amel awo'tan yu'un, cajwal, soc ma ba ya xc'opoj awo'tan yu'un te tojol la amal ch'ich' o te ha'at nix la apac ac'abal. Te c'alal Jehová la ya'beyix te bin lec ta stojol te cajwal, na'awon a te a'baton awu'un, xchi.

³²Te David hich la yalbe te Abigail: Bayel me yutsil te Jehová te Dios yu'un Israel te la sticonat tal atahbelon ta be yo'tic.

³³Bayeluc me yutsil te bin anopoj soc bayeluc me awutsil te ha'ate, yu'un la acomon te ma ba ya jmal ch'ich' yo'tic soc te ma ba ya jpac-c'abal.

³⁴Como ¡yiloj Jehová, te Dios yu'un Israel! te la scomon te mayuc bin chopol la jpasbat, te manchuc la asuj tal aba atahbelon, pajel mayuc cuxulix jtuhluc winic yu'un Nabal te hichuque, xchi.

³⁵Te David la stsacbe te bin ich'bot tal yu'un, soc hich la yalbe: Jun awo'tan suhtan bahel ta ana. La jca'iybatix ac'op soc la jquich'bat ta cuenta te bin la ac'ambon, xchi.

³⁶Te Abigail c'alal suht bahel ta stojol Nabal, yac ta pas-q'uin ta sna a hich te bin ut'il ajwalil. Tse'el yo'tan te Nabal soc buen yuch'oj, ha yu'un mayuc bin la yalbe ha to ta schebal c'ahc'al.

³⁷C'alal sacub q'uinal, te cuxix yo'tan ta yacubel a te Nabal, halbot ya'iy yu'un te yihnam spisil te bin c'oht ta pasel; tup' yic' yu'un te Nabal, cham schihal yoc sc'ab.

³⁸Lajuneb c'ahc'al ta patil, te Jehová la yehchentes te Nabal, hich cham.

³⁹C'alal la ya'iy te David te chamix te Nabal, hich la yal: Bayel yutsil te Jehová te la spacbon jc'abal yu'un te la yac'on ta q'uexlal te Nabal, soc la scom te ya'bat ta spasel te bin chopole. Te Jehová la yac' c'ohtuc ta stojol Nabal te schopolile, xchi. Patil te David la sticon ta halbeyel te Abigail te ya sc'an ya yic' yihnamin.

⁴⁰Te a'batetic yu'un David talic ta stojol te Abigail ta Carmel, hich la yalbeyic: Te David la sticonotcotic tal ta atojol yu'un ya yic' yihnaminat, xchihic.

⁴¹Hahch te Abigail, la snijan sba ta lum, hich la yal: Li' ay te a'bat awu'un te ya spocbe yoc te a'batetic yu'un te cajwal, xchi.

⁴²Ora hahch te Abigail, mo ta burro, baht soc ho'eb ach'ix-criadahetic yu'un, la st'un bahel te a'batetic yu'un David, hich yihnam c'oht.

⁴³Te David ha nix hich la yic' yihnamin te Ahinoam te talem ta Jezreel, hich schebal la yic' yihnamin.

⁴⁴Como te Saúl ya'beyej yic' te yantsil-nich'an Mical, ha te yihnam David ta nahil to, te Palti snich'an Lais te talem ta Galim.