Read Tzeltal 1 Samuel 26 Bible Online

1 Samuel 26 - Tzeltal bible

1 Samuel 26

¹Talic te zifeohetic ta stojol Saúl ta Gabaa, hich c'oht yalbeyic: Te David tey snac'oj sba a ta tsehl yu'un Haquila, te snuhp'usitayej sba soc te jochol taq'uin q'uinal, xchihic c'ohel.

²Ha yu'un hahch bahel te Saúl, mo bahel ta jochol taquin q'uinal Zif, la yic' bahel sjoquin lajunwinic swaxacbahc' (3,000) ta tuhl winiquetic tsahbilic ta Israel, yu'un ya sle te David ta jochol taquin q'uinal Zif.

³C'oht spas scampamento ta tsehl yu'un Haquila te ay ta ti'be, ta stojol banti ya xloc' tal c'ahc'al yu'un te jochol taquinal q'uinal. Te David ay ta jochol taquin q'uinal. C'alal la yil te t'umbil tal yu'un te Saúl,

⁴la sticon bahel jtsahtaywanejetic, hich la sna' te melel yac ta talel te Saúl.

⁵Hich hahch bahel te David, baht ta banti spasoj scampamento te Saúl. La yil banti wayal te Saúl soc te Abner snich'an Ner, te jtsobaw yu'un te soldadohetic yu'une. Te Saúl wayal ta yohlil te campamento, joytaybil yu'un te winiquetic yu'une.

⁶Ha yu'un te David hich la yalbe te Ahimelec te heteo-winic soc te Abisai te yal Sarvia, sbanquil Joab: ¿Mach'a ya xcohon bahel soc ta campamento yu'un Saúl? xchi. Ho'on ya joquinat cohel, xchi te Abisai.

⁷Hich te David soc te Abisai ta ahc'abal bahtic ta banti ay te soldadohetique. Tey wayal a te Saúl ta campamento, ts'apal ta lum te slanza ta nopol sjolinab ta wayel. Te Abner soc te soldadohetic sjoytayejic ta wayel.

⁸Ha yu'un te Abisai la yalbe te David: Dios la ya'batix ta ac'ab te acontra. A'bon jmil ta lanza, junax buelta ya jts'ap ta lum, ma ba cheb ya ca'be, xchi.

⁹Pero la sjac' te David: Ma me xamil. Como ¿mach'a c'an shach sc'ab ta scontrahinel te mach'a tsahbil yu'un te Jehová, te mayuc smul ya xhile? xchi.

¹⁰Soc la yal xan te David: ¡Yiloj Jehová! ya me x'ehchentesot yu'un Jehová, (chican teme ya xc'oht yorahil te ya xcham, o teme ya xlaj ta guerra),

¹¹ma me xyac'on Jehová te ya jach jc'ab ta scontrahinel te mach'a tsahbil yu'une. Pero tsaca te lanza te ay ta nopol sjolinab ta wayel soc te yawil ha', conic, xchi.

¹²Hich te David la yich'be bahel te lanza soc te yawil ha' ay ta nopol sjolinab ta wayel te Saúl, bahtic. Mayuc mach'a ilotic yu'un, mayuc mach'a la sna', soc mayuc mach'a cux yo'tan; spisil wayalic, como a'botic c'uhbuc swayelic yu'un Jehová.

¹³Te David sohl bahel ta jehch yan wits te namal yiloj sba soc.

¹⁴Te David la yawtay te soldadohetic soc te Abner te snich'an Ner: ¿Ma bal yac ajac'bon, Abner? xchi. ¿Mach'ayat a te yac awawtay te ajwalil? xchi te Abner.

¹⁵Te David hich la yalbe te Abner: ¿Ma bal winicucat? ¿Mach'a pajalat soc ta Israel? ¿Bin yu'un te ma ba yac acanantay te ajwalil awu'une? Como ay jtuhl winic te och bahel ya c'an smilbat te ajwalil awu'une.

¹⁶Ma ba lec te bin la apas. ¡Yiloj Jehová! ya sc'an ya xlajex, yu'un ma ba la acanantayic te ajwalil awu'unic, ha te mach'a tsahbil yu'un te Jehová. Ilawil banti ay te lanza yu'un te ajwalil soc te yawil ha' te nopol ayic ta sjolinab ta wayel, xchi.

¹⁷Te c'alal Saúl la sna'be sba ta sc'op te David, hich la yal: ¿Ma bal ha'ucat ac'op, jnich'an David? xchi. Ho'on jc'op, cajwal, xchi te David.

¹⁸Soc la yal xan: ¿Bin yu'un yac anutsbelon te a'baton awu'une, cajwal? ¿Bin jpasoj? ¿Bin chopol jpasoj?

¹⁹Awocoluc, cajwal, a'iybeya sc'op te a'bat awu'une. Teme ha te Jehová te la yac' te yac acontrahinon, ac'a stsac te mahtanile; yan teme ha winiquetic, jc'axel me bohlobenuc sc'oblalic ta stojol Jehová, como la stenoniquix loq'uel scuenta yu'un ma ba ya xc'ohtix ta jcuenta te bin ya ya'botic te Jehová, hich ya yalbonic: Bahan, ac'a aba ta a'batinel ta stojol yantic diosetic, xchihic.

²⁰Ma me xyich' malel jch'ich'el ta namal ta stojol Jehová, como te ajwalil yu'un Israel loc' slehbel jcoht ch'ac, hich te bin ut'il mach'a ya snuts nacow ta wits, xchi.

²¹Ha yu'un hich la yal te Saúl: Jtahoj jmul; suhtan tal, jnich'an David. Mayuc bin chopol xan ya jpasbat, como yo'tic bayel sc'oblal ta atojol te jcuxlejale. Sonsohon, bayel howiyemon, xchi.

²²La sjac' te David: Li' ay te lanza yu'un te ajwalile. Ac'a taluc jtuhluc a'bat ta yich'el bahel.

²³Te Jehová ac'a stoj ta tuhlultuhl ha chican teme stojil bin spasoj soc teme jun yo'tane. Te Jehová la yac'at ta jc'ab te naxe, pero ma ba la jc'an la jach jc'ab ta stojol te mach'a tsahbil yu'un te Jehová.

²⁴Hich te bin ut'il bayel sc'oblal ta jtojol te acuxlejal, hich nix ayuc sc'oblal te jcuxlejal ta stojol Jehová soc ha ac'a scoltayon loq'uel ta spisil wocol, xchi.

²⁵Te Saúl hich la yalbe te David: Bayeluc me awutsil, jnich'an David; melel nix a bayel bin muq'uic sc'oblal ya xhahch apasticlan, soc ta spisil lec me ya xc'ohat, xchi. Ha yu'un te David hahch xan bahel, te Saúl suht bahel ta sna.