Read Tzeltal 1 Samuel 27 Bible Online

1 Samuel 27 - Tzeltal bible

1 Samuel 27

¹Hich la yal ta yo'tan te David: Ya me sta yorahil te ya xlajon ta sc'ab te Saúl. Ha lec ya xbohon ta ahnel ta sq'uinal filisteohetic, scuenta yu'un hich ma ba ya sna'onix a te Saúl, soc ma ba ya slehonix ta sjoyobal sq'uinal Israel, hich me ya xcolon ta sc'ab a, xchi.

²Ha yu'un te David soc te lajunwinic scha'bahc' (600) swinictac joquimbil yu'un, hahchic ta behel, c'ohtic ta Aquis snich'an Maoc, ajwalil yu'un Gat.

³Te David soc te swinictac nahinic soc Aquis ta Gat, jujutuhl soc te mach'atic ay yu'une. Te David joquinot yu'un schebal yihnam, ha te Ahinoam te talem ta Jezreel soc te Abigail te me'ba' ants yu'un Nabal ta Carmel.

⁴C'alal halbot te Saúl te baht ta ahnel ta Gat te David, la yihquitay slehel.

⁵Te David hich la yalbe te Aquis: Teme lecon ta asit, a'bon lugar ta banti junuc tut pueblo yu'un ya xnahinon tey a. Como ¿bin yu'un ya sjoquinat ta nahinel ta pueblo yu'un ajwalil te a'bat awu'une? xchi.

⁶Hich te Aquis la ya'be ta hich ora te Siclag. Ha scuentahil te ha yu'un ajwaliletic yu'un Judá c'oht te Siclag c'alal ora.

⁷Te David halaj ta nahinel jun ha'bil soc chaneb u ta sq'uinal filisteohetic.

⁸Te David ya xmo bahel soc te winiquetic yu'un ta spojbeyel sbiluquic te gesuretic, gezrahetic soc te amalequetic; como nameyix te nahinemic tey ta q'uinal c'alal Shur ha to ta sq'uinal Egipto.

⁹Te David c'alal loc' bahel ta q'uinal ta poj-biluquetic, mayuc jtuhluc ants-winic te cuxul la yihquitay hilel. Ya yic'ticlan bahel te tuminchijetic, wacaxetic, burrohetic, camellohetic soc sc'u' spaq'uic, patil ya suht bahel ta stojol Aquis.

¹⁰C'alal hich ya xjoc'obot yu'un Aquis: ¿Banti c'ohex ta poj-biluquetic nax? teme xchihe, hich ya yal te David: Ta Neguev yu'un Judá, o ta Neguev yu'un Jerameel, o ta Neguev yu'un te queneohetic, xchi.[29]

¹¹Te David mayuc jtuhluc ants-winic ya yac' te cuxul a ya xc'oht ta Gat, yu'un hich ya yal: Scuenta yu'un ma xyac'otic ta na'el a, te hich ya yalic: Hich la spas te David, te xchihique. Hich la spasulan te jayeb c'ahc'al nahin ta sq'uinal te filisteohetique.

¹²Te Aquis ya sch'uhun te bin ya yal te David, hich ya yal ta yo'tan: Te David jc'axel ihlaybil c'ohtix yu'un te slumal Israel, hich a'bat cu'un ya xc'oht spisil ora, xchi yu'un.