Read Tzeltal 1 Samuel 3 Bible Online

1 Samuel 3 - Tzeltal bible

1 Samuel 3

¹Te querem Samuel la yac' sba ta a'batinel yu'un Jehová ta stojol Elí. Ha yorahil a te ma ba nopic tal te sc'op Jehová soc te bin ya x'a'bot yil ta nahalsit.

²Jun buelta te Elí metsel ta stsalul sna, yaquix ta maquel sit a, ma ba ya yilix q'uinal ta lec.

³Te Samuel wayal ta templo yu'un Jehová te banti ay te scaxahul te chapbil-c'op yu'un Dios, ma to ba tup'en a te tsumbil c'ahc' yu'un Dios.

⁴Te Jehová la sc'opon te Samuel. Li' ayoni, xchi te Samuel.

⁵Hich ahnimal baht ta stojol Elí, hich c'oht yal: Li' ayoni; ¿bin yu'un la awic'on? xchi c'ohel. Ma ba la jquic'at; bahan, mehtsana aba, xchi te Elí. Hich baht smehtsan sba te Samuel.

⁶Te Jehová la sc'opon yan buelta te Samuel. Hich hahch te Samuel, baht ta banti ay te Elí, hich la yalbe: Li' ayoni ¿bin yu'un la awic'on? xchi. Ma ba la jquic'at, jnich'an; bahan, mehtsana aba, xchi te Elí.

⁷Te Samuel ma to ba sna'beyej sba a te Jehová, soc ma to ba a'bot sna' te sc'op Jehová.

⁸Te Jehová la sc'opon te Samuel scuenta yoxebal buelta. Hich hahch, baht ta stojol Elí soc la yalbe: Li' ayoni, ¿bin yu'un la awic'on? xchi c'ohel. Te Elí tey la sna'ix a te ha te Jehová yac ta iq'uel yu'un te quereme.

⁹Ha yu'un hich la yalbe te Samuel: Bahan, mehtsana aba. Teme ya sc'oponat xan, jac'beya: C'opojan, Jehová, yac ya'iybelat te a'bat awu'un, xchi te Elí. Hich baht te Samuel, c'oht smehtsan sba ta lugar yu'un.

¹⁰Tal te Jehová, la stehc'an sba soc la sc'opon hich te bin ut'il ta yan buelta: Samuel, Samuel, xchi. C'opojan, yac ya'iybelat te a'bat awu'une, xchi te Samuel.

¹¹Te Jehová la yalbe te Samuel: Ay bin ya cac' c'ohtuc ta pasel ta stojol Israel, te mach'a ya ya'iy ya me xc'opoj schiquinic yu'un.

¹²Ha yorahil a te ya cac' c'ohtuc ta pasel ta stojol Elí spisil te bin la jcalbe sc'oblal te mach'atic ay yu'un, c'alal ta shahchibal ha to ta slajibal.

¹³Soc ya ca'be sna' te spisil ora ya ca'be castigo te mach'atic ay yu'un, ta scaj te bin chopol sna'oj; como la sbohlc'optayic Dios te snich'nab, pero ma ba la scomticlan.

¹⁴Ha yu'un calojix ta jamal ta stojol te sna Elí te bin ut'il te mach'atic ay yu'un ma xhu'ix ta tojbeyel smulic ta scuenta milbil mahtaniletic o ta scuenta yantic mahtaniletic, xchi.

¹⁵Te Samuel hil ta swayib ha to ta sacubel q'uinal, patil la sjambe sti'il te sna Jehová; pero la xi' yalbeyel Elí te bin a'bot yil ta snahalsit.

¹⁶Ha yu'un te Elí la yic' tal, hich la yalbe: Samuel, jnich'an, xchi. Li' ayoni, xchi.

¹⁷¿Bin a te la yalbate? Awocoluc, ma me xamucbon ta awo'tan. Dios ac'a ya'bat castigo, soc c'ax to xan hich a, teme ay bin yac amucbon ta awo'tan yu'un spisil te bintic la yalbate, xchi te Elí.

¹⁸Ha yu'un te Samuel la yalbe ya'iy spisil te bintic halbot, mayuc bin la smuc ta yo'tan. La yal te Elí: Ha Jehová stuquel; ac'a spas te bin lec ya ya'iy, xchi.

¹⁹Muc'ub te Samuel soc joquinot yu'un Jehová, soc ma ba la yac' ch'ayuc jp'ahluc te sc'ope.

²⁰Spisil Israel, c'alal ta Dan ha to ta Beerseba, la sna'ic te Samuel ha jalwanej yu'un Jehová te jun yo'tan ta stojol.

²¹Te Jehová yan buelta la yac' sba ta ilel ta Silo; como tey ta Silo ya yac' sba ta na'el ta stojol Samuel te sc'op Jehová.