Read Tzeltal 1 Samuel 30 Bible Online

1 Samuel 30 - Tzeltal bible

1 Samuel 30

¹C'alal c'ohtic ta Siclag ta yoxebal c'ahc'al te David soc te swinictac, te mach'atic ayic ta Amalec yochintayejiquix a te Neguev soc te Siclag, la sjiniquix te Siclag soc la ya'beyiquix sc'ahc'al.

²Soc yic'ojiquix bahel ta chuquel te antsetic soc spisil te mach'atic tey ayic a, muc' biq'uit. Mayuc mach'a la smilic, ha nax la yiq'uic bahel te banti bahtique.

³C'alal c'oht ta pueblo te David soc te swinictac, la yilic te c'ahq'uemix soc te ic'botic bahel ta chuquel a te yihnamic soc te ach'ix queremetic yu'unique.

⁴Ha yu'un te David soc te winiquetic sjoquinejic hahchic ta tulan oq'uel ha to c'alal laj yipic yu'un oq'uel.

⁵Bahtic ta chuquel schebal te yihnam David, ha te Ahinoam te talem ta Jezreel, soc te Abigail te me'ba' ants yu'un Nabal ta Carmel.

⁶Ay swocol yu'un mel-o'tan te David, como te winiquetic la yalic sch'ojel ta ton, como ta spisil te winiquetic pich'il yo'tanic ta scaj te ach'ix queremetic yu'unique. Pero te David la sta yip yo'tan ta stojol Jehová te Dios yu'une.

⁷Te David la yalbe te sacerdote Abiatar snich'an Ahimelec: Awocoluc, ich'bon tal te efod, xchi. Hich te Abiatar la yich'be tal te efod.

⁸Te David la sjoc'obe te Jehová: ¿Ya bal jnuts bahel te jpoj-biluquetique? ¿Ya bal xhu' ya jta? xchi. La sjac' te Jehová: Nutsa bahel, ya me ata, soc ya me acoltay tal te mach'atic bahemic ta chuquel, xchi.

⁹Hich hahch bahel te David soc te lajunwinic scha'bahc' (600) winiquetic sjoquinej, c'ohtic ta uc'um Besor, ay mach'atic hilic tey a.

¹⁰Te David baht soc jbahc' (400) ta tuhl; hilic lajunwinic (200) ta tuhl como luhbenic, ma ba hu' sc'axelic ta uc'um Besor.

¹¹La stahic jtuhl egipcio-winic ta yohl q'uinal, la yiq'uic bahel ta stojol David. La ya'beyic swe'el soc la ya'beyic yuch' ha',

¹²la ya'beyic jxeht' taquijem higo soc cha'chej taquijem ts'usub. Te c'alal laj ta we'el cux yo'tan yu'un, como yoxebalix c'ahc'al soc yoxebalix ahc'abal a te mayuc bin swe'oj soc yuch'oj.

¹³Te David hich la yalbe: ¿Mach'a yu'unat, soc ban talemat? xchi. La sjac' te egipcio-winic: Ho'on ya'baton jtuhl amalec-winic, pero yoxebalix c'ahc'al a te la yihquitayon hilel te cajwal, scaj te ayon ta chamel.

¹⁴C'ohotcotic ta spojel biluquetic ta Neguev[30] yu'un te cereteohetic, yu'un Judá soc ta Neguev yu'un Caleb; soc la jca'becotic hilel sc'ahc'al te Siclag, xchi.

¹⁵¿Ya bal awic'on bahel ta banti ayic te jpoj-biluquetique? xchi te David. Halbon ta jamal ta stojol Dios teme ma ba yac amilon o te yac awac'on ta sc'ab te cajwal, hich ya quic'at bahel ta banti ayic, xchi.

¹⁶Hich la yic' bahel te David. Te amalequetic spucoj sbahic ta q'uinal a, yacalic ta we'el uch'el soc ta pas-q'uin yu'un te bintic la spojic tal ta sq'uinal filisteohetic soc ta sq'uinal Judá.

¹⁷Te David hahch ya'be guerra ta sab ha to c'alal ta tibiltic yu'un schebal c'ahc'al. Mayuc mach'a loc' ta ahnel jtuhluc, ha nax jbahc' (400) ta tuhl colel winiquetic te mohic ta camellohetic soc ahnic bahel.

¹⁸Spisil te bintic la spojic talel te amalequetic la yich' suhtel te David, soc ha nix hich la yic' suhtel schebal te yihname.

¹⁹Mayuc bin ch'ay yu'unic, muc' biq'uit, ach'ix queremetic o te bintic pojbilic, mayuc bin ch'ay te bintic la yich'ic bahel; spisil la yich' xan suhtel te David.

²⁰Soc ha nix la yic' bahel spisil te tuminchijetic, tentsunetic soc te wacaxetic. Te mach'atic yac smacbelic bahel hich yac yalbelic: Ha te pojbil biluquetic yu'un David, xchihic.

²¹Te David c'oht ta banti ayic te lajunwinic (200) ta tuhl winiquetic yu'un, te ma ba hu' yu'unic ya sjoquinic bahel ta scaj te luhbenic, te hilic ta uc'um Besor; ha'ic loq'uic ta stahel te David soc te mach'atic joquimbil yu'une. Te c'alal c'oht te David, la spatbe yo'tanic scuenta lamal q'uinal.

²²Pero spisil te mach'atic chopol yo'tanic soc te ma lecuc yo'tanic te ayic ta yohlil te mach'atic la sjoquinic te David, hich la yalic: Ma ba la sjoquinotic bahel, ha yu'un ma ba ya ca'betic te bintic la jpocticlantic talel. Ha nax ac'a yiq'uic bahel te yihnamic soc te snich'nabic, ac'a bahtuquic, xchihic.

²³Pero la yal te David: Quermanotac, ma hichuc xapasic soc te bintic ya'beyejotic te Jehová. Ha la scanantayotic soc la yac' ta jc'abtic te jpoj-biluquetic te tal scontrahinotic.

²⁴¿Mach'a ya ya'iybeyex ac'opic teme hich yac apasique? Como pajal me ya yich' te mach'a baht ta guerra soc te mach'a hil ta scanantayel te biluquetic, xchi.

²⁵(Ta hich ora ha mandar c'oht soc hich c'ahyemic ta spasel ta Israel c'alal ora ini.)

²⁶C'alal c'oht ta Siclag te David, te bintic la spoj talel ay la sticombe bahel te mamaletic ta Judá te sc'uxultaywanej sba soc, hich la yal: Li' ay amahtanic te pojbil tal ta stojol te scontratac Jehová, xchi.

²⁷La sticombe bahel ta stojol te mach'atic ayic ta Bet-el, ta Ramot yu'un Neguev, ta Jatir,

²⁸Aroer, Sifmot, Estemoa,

²⁹Racal, te pueblohetic ta Jerameel, te pueblohetic yu'un queneohetic,

³⁰te mach'atic ayic ta Horma, Corasán, Atac,

³¹Hebrón soc ta spisil lugar banti c'ax te David soc te swinictaque.