Read Tzeltal 1 Samuel 4 Bible Online

1 Samuel 4 - Tzeltal bible

1 Samuel 4

¹Te sc'op Samuel c'oht ta stojol spisil Israel. Ha yorahil a te Israel loc' bahel ta ya'beyel guerra te filisteohetic; c'oht spas scampamentohic ta Eben-ezer, yan te filisteohetic c'oht spas scampamentohic ta Afec.

²Te filisteohetic la schol sbahic ta ya'beyel guerra te Israel; tulanij te guerra, te Israel tsalotic yu'un te filisteohetic, milotic lajunbahc' (4,000) ta tuhl winiquetic ta banti la spasic guerra.

³Te c'alal suhtic ta campamento te winiquetic, hich la yalic te mamaletic yu'un Israel: ¿Bin yu'un te Jehová la yac'otic ta tsalel yo'tic ta stojol te filisteohetique? Conic ta Silo, ya quich'tic tal te scaxahul te chapbil-c'op yu'un Jehová, scuenta yu'un teme ay ta cohliltic ya me scoltayotic ta sc'ab te jcontratique, xchihic.

⁴Hich te pueblo la sticonic bahel winiquetic ta Silo, la yich'ic tal te scaxahul te chapbil-c'op yu'un Jehová te scuentahinej spisil, te nahinem ta yohlil te querubinetic. Te schebal snich'nab Elí, ha te Ofni soc Finees, sjoquinejic te scaxahul te chapbil-c'op yu'un Dios.

⁵Te c'alal c'oht ta campamento te scaxahul te chapbil-c'op yu'un Jehová, spisil Israel hahchic ta tulan aw, la snihc sba te lum yu'un.

⁶Te c'alal la ya'iyic te filisteohetic te tulan aw, hich la yalic: ¿Bin yu'un te tulan aw ta campamento yu'un te hebreohetic? xchihic. Te c'alal la ya'iyic te ha te scaxahul te chapbil-c'op yu'un Jehová te hulix yu'unic ta campamento,

⁷xiwic yu'un te filisteohetic, hich la yalic: Hulix jun dios ta scampamentohic, xchihic. Soc la yalic: ¡Ay me jwocoltic yo'tic! Mayuc hich c'ohem ta pasel a.

⁸¡Ay me jwocoltic yo'tic! ¿Mach'a ya xhu' ya scoltayotic loq'uel ta sc'ab te diosetic ini te ay bayel yu'elic? Ha te diosetic te la ya'beyic spisil ta chahp castigohetic te egipciohetic ta jochol taquin q'uinal.

⁹Ac'ahic fuersa, filisteohetic, chahpana abahic soc awipic, scuenta yu'un ma ba ya x'ochex ta mosohil yu'un te hebreohetic hich te bin ut'il ayic ta mosohil awu'unic; chahpana abahic soc awipic ta ya'beyel guerra, xchihic.

¹⁰Ha yu'un te filisteohetic la ya'beyic guerra. Tsalot te Israel, jujutuhl bahtic ta ahnel ta snahilpaq'uic, bayel lajic ta milel, ha ho'lajunbahc' yoxpic (30,000) ta tuhl winiquetic.

¹¹Pojot bahel te scaxahul te chapbil-c'op yu'un Dios soc lajic schebal snich'nab Elí, ha te Ofni soc Finees.

¹²Loc' ta ahnel ta guerra jtuhl winic yu'un Benjamín, c'oht ta Silo ta yorahil nix, ch'i'em sc'u' soc ay ts'u'lum ta sjol.

¹³Te c'alal c'oht tey a, te Elí hucul ta shuctajib ta yilel bahel ta be, como nihc yo'tan yu'un te scaxahul te chapbil-c'op yu'un Dios. C'alal och tal ta pueblo te winic soc te la yal te bin c'ohtix ta pasele, hahchic ta aw spisil te pueblo.

¹⁴C'alal la ya'iy te tulan aw te Elí, hich la sjoc'oy: ¿Bin scuentahil te xjuyetic ta aw? xchi. Te winic ora tal yalbe ya'iy te Elí.

¹⁵Ayix waxaclajuneb yo'winic (98) ya'bilal a te Elí, macal sit, ma xyilix q'uinal.

¹⁶Te winic hich c'oht yalbe te Elí: Tojon tal ta banti ay te guerra, colonix loq'uel tal tey a, xchi. ¿Bin c'ohem ta pasel hiche, jnich'an? xchi te Elí.

¹⁷La sjac' te winic: Te Israel loc' ta ahnel ta stojol te filisteohetic soc c'ax bayel lajiquix. Soc lajix schebal te anich'nab, ha te Ofni soc Finees, soc ich'ot bahel te scaxahul te chapbil-c'op yu'un Dios, xchi.

¹⁸Te c'alal la sta ta halel te scaxahul te chapbil-c'op yu'un Dios, te Elí jawts'uj cohel ta shuctajib ta ti' puerta, wac' snuc', hich cham, como mamalix soc bayel yalal. Ha juez ta Israel cha'winic (40) ha'bil.

¹⁹Te yalib, ha te yihnam Finees, swoloj yal a soc nopol ya x'ayin te yale. Te c'alal la ya'iy te baht ta pojel te scaxahul te chapbil-c'op yu'un Dios soc te chamix te yalibmamal soc te smamalale, hahch swocol, hich ayin te yale.

²⁰Te c'alal yaquix ta chamel a, te antsetic te tey ayic a la yalbeyic: Ma me xiwat, ha tut querem te awale, xchihic. Pero ma ba la sjac' soc ma ba la yich' ta cuenta.

²¹La ya'be sbihilin Icabod[8] te alale, yu'un la yal: Loq'uix bahel te yutsilal Israel, xchi, ta scaj te baht ta pojel te scaxahul te chapbil-c'op yu'un Dios soc te cham te yalibmamal soc te smamalale.

²²Hich la yal: Loq'uix bahel te yutsilal Israel, yu'un bahtix ta pojel te scaxahul te chapbil-c'op yu'un Dios, xchi.