Read Tzeltal 1 Samuel 7 Bible Online

1 Samuel 7 - Tzeltal bible

1 Samuel 7

¹Hich talic te mach'atic ayic ta Quiriat-jearim, la yich'ic bahel te scaxahul te chapbil-c'op yu'un Jehová, la yaq'uic ta sna Abinadab te ay ta ba tsehl; soc la sch'ultesic te Eleazar, ha te snich'an, scuenta yu'un ya scanantay te scaxahul te chapbil-c'op yu'un Jehová.

²Bayel tiempo halaj ta Quiriat-jearim te scaxahul te chapbil-c'op yu'un Jehová, ha jtahb (20) ha'bil; spisil te israeletic oc' yo'tanic yu'un slehel te Jehová.

³Te Samuel hich la yalbe spisil te Israel: Teme spisil awo'tanic ya suhtex tal ta stojol Jehová, loq'uesahic ta awohlilic te jyanlum diosetic soc te Astarot, a'beya awo'tanic te Jehová soc ac'a abahic ta a'batinel yu'un, hich me ya scoltayex loq'uel ta sc'ab te filisteohetic, xchi.

⁴Ha yu'un te snich'nab Israel la sch'ojticlanic loq'uel te loc'ombahetic yu'un Baal soc Astarot, ha nax la yac' sbahic ta a'batinel yu'un te Jehová.

⁵Patil hich la yal te Samuel: Tsobahic spisil Israel ta Mizpa, ya jc'opombeyex te Jehová, xchi.

⁶Ha yu'un la stsob sbahic ta Mizpa, la sliquic tal ha', la smalic ta stojol Jehová; ha nix sc'ahc'alel a la scom swe'elic, soc hich la yalic: La jta jmultic ta stojol Jehová, xchihic. Te Samuel ha juez yu'un te snich'nab Israel ta Mizpa.

⁷Te c'alal la ya'iyic te filisteohetic te stsoboj sbahic ta Mizpa te snich'nab Israel, te príncipaletic yu'un te filisteohetic tal ya'beyic guerra. Te c'alal hich la ya'iyic te snich'nab Israel, la xi'ic te filisteohetique.

⁸Ha yu'un hich la yalbeyic te Samuel: Ma me xquehchajat ta c'op ta stojol Jehová te Dios cu'untic, te yacuc scanantayotic te ma ba ya x'ochotic ta sc'ab te filisteohetique, xchihic.

⁹Te Samuel la stsac jcoht alal-tuminchij te ya to schu'un, la ya'be scuenta scohtol chic'bil smahtan te Jehová; soc awon ta stojol Jehová ta scuenta Israel; a'iybot sc'op yu'un Jehová.

¹⁰Te c'alal yac ta yaq'uel a te scohtol chic'bil mahtanil te Samuel, tal te filisteohetic ta ya'beyel guerra te snich'nab Israel. Pero te Jehová ha nix yorahil a te la yac' buen tulan chahwuc ta stojol te filisteohetic, la xiwtes, hich la yich'ic tsalel ta stojol te snich'nab Israel.

¹¹Loq'uic bahel ta Mizpa te snich'nab Israel, la snutsic bahel te filisteohetic, la smilticlanic bahel c'alal ta ye'tal Bet-car.

¹²Patil te Samuel la stsac jun ton, la stehc'an ta ohlil yu'un Mizpa soc Sen, la ya'be sbihilin Eben-ezer,[10] yu'un hich la yal: Li' c'alal la scoltayotic te Jehová, xchi.

¹³Hich tsalbil c'ohtic te filisteohetic, ma ba la yochintaybeyic xan te sq'uinal Israel. Te sc'ab Jehová la scontrahin te filisteohetic te jayeb c'ahc'al cuxul te Samuel.

¹⁴Cha'suhtic xan ta stojol Israel te pueblohetic pojbotic yu'un te filisteohetic, c'alal Ecrón ha to ta Gat. Hich te Israel la scoltay loq'uel ta sc'ab filisteohetic te sq'uinale. Soc lamal q'uinal ta stojol Israel soc te amorreohetique.

¹⁵Te Samuel ha juez yu'un Israel te jayeb c'ahc'al cuxul.

¹⁶Ta jujun ha'bil ya sbehentay te Bet-el, Gilgal soc Mizpa. Ya schahpan te Israel ta spisil te lugartic ini.

¹⁷Patil ya suht xan bahel ta Ramá, yu'un tey ay sna a. Tey ya schahpan a te Israel, soc tey la spasbe scajtajib smahtan a te Jehová.