Read Tzotzil Génesis 1 Bible Online

Génesis 1 - Tzotzil bible

Génesis 1

¹Ti c'usitic lic meltsajuc talel yu'un ti Dios ta sliquebale, vinajel xchi'uc ti banomile.

²Yu'un ti banomile, mu stac' ilel c'u s'elan oy. Scotol noj ta vo', ic' ta j'ech'el. Xcuxlej ti Diose ta xbac'olaj ta ba vo'.

³Va'i un, xi laj yal ti Diose: “Ac'o sac jamtajuc”,, xi. Jech sacjamtaj.

⁴C'alal laj yil Dios ti toj lec ti saquilal osile, laj xch'ac loq'uel ti ic'al osile.

⁵“C'ac'altic” laj yac'be sbiin. Yan ti ic'al osile, “ac'ubaltic” laj yac'be sbiin. Ja' jech yepal chapaj yu'un ta sliquebal c'ac'al.

⁶Ts'acal to un, xi laj yal ti Diose: “Ac'o oyuc c'usi cotcot yo' ta xch'acanan sba batel ti vo'e yo' jech bevel ta xcom.” Ja' jech ic'ot ta pasel.

⁷Va'i un, ti Diose laj smeltsan ti c'usi cotcote, ti xi s'elan laj xch'ac sba ti vo'etique: ti jlome com ta yolon. Ti jlome bat ta yac'ol ti c'usi cotcote.

⁸Jech ti c'usi cotcote, laj yac'be sbiin “vinajel”. Ja' jech chapaj ta xchibal c'ac'al.

⁹Va'i un, xi laj yal ti Diose: “Ti vo' ti oy ta yolon vinajele, ac'o stsob sba ta jun no'ox yavilic yo' jech ta xvinaj taquin ta xcom ti jlome.” Ja' jech ic'ot ta pasel.

¹⁰Ti bu taquin come, ti Diose laj yac'be sbiin “banomil”. Yan ti bu laj stsob batel ti vo'e, laj yac'be sbiin “muc' ta nab”. C'alal laj yil Dios ti lec bat scotole,

¹¹ja' yu'un un, xi laj yale: “Ti banomile xi s'elan ac'o xch'ies talel ti c'usiuc no'ox ta xch'ie: momoletic ti ta xac' sbeq'ue, xchi'uc te'etic ti ta xac' sate.” Ja' jech ic'ot ta pasel.

¹²Jech ti banomile lic xch'ies talel scotol ti c'usitic ta xch'ie, ti momoletic ta xac' sbeq'ue, xchi'uc te'etic ta xac' sat. Jech ti Diose laj yil ti lec scotole.

¹³Ja' jech chapaj ta yoxibal c'ac'al.

¹⁴Ja' yu'un un, ti Diose xi laj yale: “Ti ta toyol yaxts'ijan vinajele, ac'o ayanuc c'usitic ta xac' xojobal yo' ch'acal ta xcom ti c'ac'altic xchi'uc ti ac'ubaltique, ti ta xtun ta senyailtac ti c'u s'elan ta xjel batel ti c'ac'ale, ti c'usitic tsots sc'oplal ta xc'ot ta pasel ti jujun u ta x'ech' yu'un ti jujun jabile.

¹⁵Yu'un xchijlajan no'ox ta vinajel yo' ta xac' talel xojobal ta banomil.” Ja' jech ic'ot ta pasel.

¹⁶Ti Diose xi s'elan laj smeltsan chib ti c'usi ta xac' xojobale: ti jun muq'ue xtixet no'ox xojobal ta c'ac'altic. Ja'uc ti jun biq'uite xojobin no'ox ta ac'ubaltic. Ja' jech xtoc laj smeltsan c'analetic.

¹⁷Ti Diose laj yac' ta yaxts'ijan vinajel ti c'usitic ta xac' xojobale yo' jech xchijlajan no'ox ta xvul ta banomil.

¹⁸Yu'un ti c'ac'altique xchi'uc ti ac'ubaltique, ja' jech ch'acal oyic ti saquilal xchi'uc ti ic'al osile. Jech lec laj yil scotol.

¹⁹Ja' jech yepal chapaj ti ta xchanibal c'ac'ale.

²⁰Ti Diose xi laj yale: “Ti ta vo'e, ac'o ayanuc ep ta tos c'usitic chanul. Ja' jech xtoc, ac'o ayanuc viletel mutetic ta banomil.” Ja' jech ic'ot ta pasel.

²¹Ti Diose laj smeltsan muc'tiquil ayinetic ta nab, xchi'uc scotol chonetic ta vo' chlaj ch'iuc xchi'uc ti ta xcuxiique, xchi'uc scotol ti mutetique. Ti c'alal jech laj yil ti Diose, xloc' venta laj yil.

²²Ja' yu'un un, xi s'elan laj sts'uiltas ti c'usiticuc chanul laj smeltsane: “C'otuc ta pasel ti ta xaboles abaic liquel ta j'ech'ele. Nojesic ti nabetique. Epajuc ta j'ech'el ti mutetic ta banomil xtoque.”

²³Ja' jech chapaj ti ta yo'obal c'ac'ale.

²⁴Jech xtoc ti Diose xi laj yale: “Xi s'elan ac'o boluc ta banomil scotol ti ep ta tos chon bolometique: ti ts'unbolal chon bolometique, xchi'uc ti colemal te'tical chon bolometique, ti c'usitic xquilet ta banomil ta xanave.” Ja' jech ono'ox ic'ot ta pasel.

²⁵Ti jech meltsaj yu'un ti Dios ti chon bolometic taje, scotol lec laj yil.

²⁶Ts'acal to un, xi laj yale: “Avi tana une, jmeltsantic ti vinique, sjunul jech c'u cha'al ti vo'otique, ti oyuc ta yoc ta sc'ob ti xu' yu'un ti c'usi ta sc'an ta spas ta stojol ti choyetique, ti mutetique, ti chon bolometic ti stac' ts'unele, xchi'uc ti colemal te'tical chon bolometique, xchi'uc ti c'usitic xquilet ta xanavic ta banomile.”

²⁷Xchaplej lec ti c'alal laj smeltsan vinic ti Diose, mu yanuc loc' ta meltsanel yu'un jech c'u cha'al ti Dios stuque, yu'un laj smeltsan vinic xchi'uc ants.

²⁸Va'i un, xi laj sts'uiltase: “Epajuc avalab anich'nabic; nojesic sjunul ti banomile, ventainic ta stuc'ulanel; ochuc ta be avu'unic ti choyetique, ti mutetique, xchi'uc scotol ti chonetic ti xquilet ta xanave.”

²⁹Ts'acal to un, xi albatique: “Scotol momoletic ta xac' ti sbeq'ue, scotol te'etic ta xac' ti sate, ta xcac'boxuc alajesic scotol. Scotol taje, ja' ta xavipanic.

³⁰Yan ti te'tical chon bolometique, ti chonetic ti xquilet ta xanav ta banomile, xchi'uc ti mutetique, ja' ta xcac'be sve'elinic ti momoletique.” Ja' jech ic'ot ta pasel.

³¹Ti c'u s'elan laj smeltsan ti Diose, laj yil ti lec scotole. Ja' yu'un un, ja' jech chapaj ta svaquibal c'ac'al.