Read Tzotzil Génesis 12 Bible Online

Génesis 12 - Tzotzil bible

Génesis 12

¹Oy jun c'ac'al, xi albat yu'un Dios ti Abrame: “Ictao comel ti avosil abanomile, ti avuts' avalaltaque, xchi'uc sna ti atote yo' jech ta xabat ta banomil ti bu ta xcac'bot avile.

²Yu'un ta sventa ti anitilultaque, ta xlic c'oticuc cu'un ta jun muc' ta lum. Ta jts'uiltasot yo' jech ich'bilot ta muc' ta xac'ot, ja' sliqueb c'uxubinel ta xac'ot yu'unic ta sventa ti yane.

³Ti buch'utic lec ti c'usitic oy ta ye ta sti'ic ta atojole, naca c'uxubinel oy ta que ta jti' ta stojolic ec. Yan ti buch'utic naca chopol ti c'usitic oy ta ye ta sti'ic ta atojole, oy ta que ta jti' ti chopol sc'oplalic cu'un eque. Yu'un ja' ta aventa ta staic c'uxubinel ti lec que jti' ta stojol ta jujuchop scotol ti jnaclejetic ta banomile.”

⁴Jech ti Abrame loc' batel ta Harán jech c'u cha'al albat yu'un ti Diose. Ti c'alal jech loc' batele, yich'oj xa ox vo'lajuneb xchanvinic (75) jabil yo' jech ta xbat nacluc ta Canaán banomil.

⁵Va'i un, laj yic' batel ti Sarai ti ja' yajnile, xchi'uc ti Lot ti ja' sjun-nich'one, xchi'uc scotol ti c'usi x'ayan yu'une, xchi'uc ti svinictac ti laj sta ta Harane yo' ta xc'otic ta Canaán banomil.

⁶Jech ti Abrame ech' xani jelavel c'u sjamlej ti banomile, ja' to ti c'uxi c'ot ta Siquem bu oy ti ch'ul tulan yu'un ti Moree. Yu'un ja' nacalic ti cananeoetic ta banomil taje.

⁷Ti bu taje, laj yac' sba iluc ti Diose, ti xi laj yale: “Ti banomil li'e, ja' ta xcac'be yich' ti anitilultaque.” Va'i un, ti Abrame laj sva'an jun altar ta sventa yich'obil ta muc' ti Diose, yu'un laj yac' sba iluc ta stojol.

⁸Ts'acal to un, bat ta muc'tiquil vitstic ti oy ta yeloval sloq'ueb c'ac'al yu'un ti jteclum Betele. Ti bu taje, laj sva'an ti yaxibalnae. Ti Betele, ta smaleb c'ac'al oy bu laj sva'an ti yaxibalnae. Yan ti jteclum Haie, ta stuq'uil sloq'ueb c'ac'al oy yu'un. Ti bu taje, ti Abrame lic sva'an jun altar yan velta. Laj sta ta na'el ti Diose.

⁹Ts'acal to un, laj stam batel sbe ta c'un-c'un ta yosilal Néguev.

¹⁰Ti ta banomil taje, lic ayanuc muc' ta vi'nal. Jech o xal ti Abrame bat nacluc ta Egipto c'uc sjaliluc, yu'un ch'abal xa c'usi ta sta ta lajesel ti bu nacale.

¹¹C'alal ta xa xc'otic ta Egiptoe, ti Abrame xi laj yalbe ti Sarai ti ja' yajnile: “A'yio ava'i ti jc'ope, yu'un jna' lec ti c'upil sba antsote.

¹²C'alal ta xilot ti egipcioetique, xi ta xalique: ‘Ti ants le'e, ja' yajnil ti vinique.’ Va'i unbi, ta xismilic. Ja'uc ti vo'ote, mu xasmilic yu'un ta xayiq'uic.

¹³Ja' yu'un un, yo' lec ta xc'ot ta jtojol, yo' mu xismilicun ta acoje, avocoluc, alo ti jchi'il jbatic no'ox ta voq'uele.”

¹⁴C'alal c'ot ta Egipto ti Abrame, jech ti egipcioetique, toj c'upil sba laj yilic ti Saraie.

¹⁵C'alal yilic ec yaj'abteltac ti faraón ajvalil yu'un ti Egiptoe, bat yalbeic ya'i ti c'upil sba ti ants taje. Va'i un, laj yiq'uic batel ta sna ti faraone.

¹⁶Ti jech c'upil sba ti Saraie, jech o xal ti faraone lec laj xc'uxubin ti Abrame. Laj sq'uelanbe chijetic, vacaxetic, mosovil viniquetic antsetic, burroetic, xchi'uc camelloetic.

¹⁷C'u stu un, ti faraone xchi'uc ti c'u yepal oy ta snae, busanbatic talel chopol vocol ta stojolic yu'un Dios ta scoj ti Saraie.

¹⁸Jech o xal ti faraone laj stac ta iq'uel ti Abrame, ti xi laj yalbee: “¿C'u cha'al jech laj apasbun? ¿C'u cha'al mu laj avalbun ca'i ja' avajnil ti ants li'e?

¹⁹Yu'un laj aval ti ja' achi'il ta voq'uele. Ti vu'une laj quic' yo' ta xcajnilan. Li' oye, batan, ic'o batel.”

²⁰Ja' yu'un un, ti faraone laj yalbe ya'i ti svinictaque ac'o loc'uc batel yu'unic ta Egipto xchi'uc ti yajnile, xchi'uc c'usi x'ayan yu'un ti Abrame.