Read Tzotzil Génesis 13 Bible Online

Génesis 13 - Tzotzil bible

Génesis 13

¹C'alal loc' batel ta Egipto ti Abram xchi'uc ti yajnile, xchi'uc scotol ti c'usi x'ayan yu'une, sutic batel ta yosilal Néguev.

²Ti Abrame oy ep sc'ulejal. Oy oro yu'un. Oy plata taq'uin yu'un, xchi'uc oy ep sts'unubtac.

³C'un-c'un loq'uic batel ta Néguev banomil, ja' to c'uxi c'otic ta jteclum Betele. Ti teye, bat bu to ox naqui ta ba'yel ti oy ta o'lol yu'unic ti Betel xchi'uc ti Haie.

⁴Taje, ja' ti bu laj sva'an ta ba'yel ti altare, ti laj sta ta c'oponel ti Diose.

⁵Ti Lote, banquilal jc'ulej ec, co'olic xchi'uc ti Abram ja' sjuntote. Yu'un oy ep xchijtac, xvacaxtac, svinictac jmoj xvoletic ta yalel muyel xchi'uc.

⁶Ja' no'ox un, ti bu oyique, mu xa xve'ic o ti sts'unubique, yu'un toj ep ta jmec. Mu xa xu' yu'unic ti jech tsobolique.

⁷Yu'un ti buch'u ta sq'uelbeic sts'unubtac ti Abrame, ta stsac sba ta c'op xchi'uc ti buch'utic ta sq'uelbeic sts'unubtac ti Lote. Ma'uc no'ox taje, yu'un ti cananeoetique, xchi'uc ti ferezeoetique, nacalic to ox jech yorail taje.

⁸Ja' yu'un un, ti Abrame oy bu jun c'ac'al xi laj yalbe ti Lote: “Ti vo'ote, cuts' calal jbatic. Mu lecuc ti ta xcutan jbatic. Mi ja'uc ti ta xut sbaic ti jq'uel-chon-bolometic cu'untique.

⁹Yu'un le' oy ta jujujot scotol ti banomile, xu' xat'uj. Avocoluc, ja' lec, la' jch'ac jbatic. Mi vo'ot ta xabat xi ta stuq'uil yolon ti yolon xocon sloq'ueb c'ac'ale, jech ti vu'une ta xibat xi ta stuq'uil yolon ti yac'ol xocon sloq'ueb c'ac'ale. Mi vo'ot ta xabat xi ta stuq'uil yolon ti yac'ol xocon sloq'ueb c'ac'ale, vu'un ta xibat xi ta stuq'uil yolon ti yolon xocon sloq'ueb c'ac'ale.”

¹⁰Va'i un, ti Lote laj sq'uel batel scotol ti stenlej sti'il uc'um Jordane. Laj yil oy lec vo' ta sjunul ti stenleje, co'ol xa s'elan yav ts'unubaltic xc'ot c'alal to biq'uit jteclum Zoar. Yu'un co'ol s'elan yosilal Egipto. (Yu'un ta vo'ne, ja' to ox jech s'elan c'alal mu'yuc to ox lilinbil yu'un Dios ti jteclum Sodomae xchi'uc ti jteclum Gomorrae.)

¹¹Ja' yu'un un, ti Lote ja' laj st'uj ti stenlej Jordane. Ta sloq'ueb c'ac'al, laj stam batel ti bu oyique. Ja' jech s'elan c'ot ta pasel ti laj xch'ac sbaic ti Abram xchi'uc ti Lote.

¹²Ti Abrame com nacluc ta yosilal Canaán. Yan ti Lote bat nacluc ta stenlejal nopol xa ta sts'el ti jteclum Sodomae.

¹³Ti bu taje, scotol ti jnaclejetic teye, chopol stalelic. Mu ts'icbaj ti mulil ta spasic ta sba ta sat ti Diose.

¹⁴C'alal xch'acoj xa sba ti Lote, ti Diose xi laj yalbe ti Abrame: “Ti bu va'alote, q'uelo lec avil batel xi ta stuq'uil yolon ti yolon xocon sloq'ueb c'ac'ale, xi ta stuq'uil yolon ti yac'ol xocon sloq'ueb c'ac'ale, xi ta stuq'uil sloq'ueb c'ac'ale, xi ta stuq'uil smaleb c'ac'ale.

¹⁵Le'e, vu'un ta xcac'bot scotol ti banomil ti ta xaq'uel batele. Ja' avu'unic o ta xcom xchi'uc scotol ti anitilultaque.

¹⁶Vu'un ta jpas ta stojolic ti ta xcac' epajuc jech c'u cha'al spucuquil ti banomile. Jech c'u cha'al mu atbajuc c'u yepal ti pucuque, ja' jech mu atbajuc yepal ta xbat ti anitilultaque.

¹⁷Soban, xanio ava'i c'u snatil, c'u sjamlej ti banomil ti vu'un ta xcac'bote.”

¹⁸Ja' yu'un un, ti Abrame laj stsob batel ti yaxibalnae, bat nacluc ta tulantic yu'un jun vinic Mamre sbi, nopol xa ta sts'el jteclum Hebron. Ti bu taje, laj sva'an jun altar ta sventa yich'obil ta muc' ti Diose.