Read Tzotzil Génesis 16 Bible Online

Génesis 16 - Tzotzil bible

Génesis 16

¹Yu'un ti Saraie, ma'uc j'alajel ants yo' xu' ta xilbe sat xnich'nab yu'un ti Abram ti ja' smalale. Ja' xa no'ox yip yo'nton o xchi'uc ti oy jun me' egipcio ants Agar sbi ti ja' smosove.

²Ja' yu'un un, xi laj yalbe ti Abrame: —Q'uel avil, ti Diose mu xac' alajcun. Ta jc'anbot vocol ta atojol, chi'ino ta vayel ti jmosov Agare. Xu' nan ta jta col yu'un ti antse. Ti Abrame laj xch'un ti jech i'albat yu'un ti Saraie.

³Va'i un, ti Saraie laj yic' batel ti egipcioal ants Agar sbie, bat yac'be ti co'ol s'elan c'ot ta yajnil yu'un ti Abram c'alal slajunebal (10) xa jabil snaclejic ta Canaane.

⁴Ti Abrame laj xchi'in sbaic xchi'uc ti Agare. Va'i un, lic xchi'in yol. C'alal laj ya'i ti xchi'uc xa yole, mu xa lecuc ta xil ti sme' ajvale.

⁵Ja' yu'un un, ti Saraie xi laj yalbe ti Abrame: —¡Vo'ot amul ti mu xa lecuc xiyil ti Agare! C'alal vu'un laj cac'bot avajniline, avi tana un, cajal xa xa'i sba ti oy xa yole. Ac'o yal stuc ti Diose buch'u ti smule, mi ja' ti vo'ote, mi ja' ti vu'une.

⁶Ti Abrame xi laj staq'ue: —Ti amosove, oy ta avoc ta ac'ob ta spasbel ti c'usi lec ta xava'ie. Ti Saraie lic sjol ta yilbajinel, jatav batel yu'un ti Agare.

⁷Ja' no'ox un, nupe ta be yu'un jun yaj'ánjel Dios ta sts'el sat vo' ti oy ta ti' be ta xc'ot ta Shure.

⁸Xi jac'bate: —Agar ti smosovot Saraie, ¿bu lalic talel? ¿Bu ta xabat? —Ta xijatav ta stojol ti jme' ajval Saraie —xi laj staq'ue.

⁹Va'i un, xi albat yu'un ti yaj'ánjel ti Diose: —Sutan batel ta stojol ti ame' ajvale. Ch'uno scotol ti c'usi ta xayalbee.

¹⁰Ma'uc no'ox taje, yu'un xi to albat yu'un ti yaj'ánjel Diose: “Mu'yuc spajeb ta jbolesbot batel ti anitilultaque, ti mu'yuc buch'u sna' ti c'u yepal ta xbate.

¹¹Achi'uc xa avol, ta xavilbe sat jun aquerem, Ismael ta xavac'be sbi, yu'un ti Diose c'ot ta sni' ta xchiquin ti mu ech'baj avocole.

¹²Ti yuni talel ta xbate, co'ol s'elan te'tical potro ti mu stac' ca'ele, yu'un ta scontrain scotol, ta xcontrainat yu'un scotol ec. Ac'o mi mu x'ilbat lec sat yu'un ti svinquileltaque, ti stuque ta ono'ox scap sba ta naclej.”

¹³Va'i un, xi laj snop ti Agare: “Ti Diose laj yilun laj sq'uelun, li' to cuxulun xtoque.” Ti Buch'u ilo'ilaj xchi'uque, laj yac'be sbiin “Ja' xa ti Dios yiloj sq'ueloj scotole”, xi.

¹⁴Jech o xal xtoc un, xi laj yac'be sbi ti joq'ue: “Sjoc' ti Buch'u cuxule xchi'uc ti yilojune.” Ti joc' taje, oy ta o'lol yu'unic ti Cadese xchi'uc ti Bérede.

¹⁵Ti Agare laj yilbe sat jun squerem yu'un ti Abrame. Jech ti stuque, Ismael laj yac'be sbi.

¹⁶Ti Abrame yich'oj xa vaquib yo'vinic (86) jabil c'alal voc' ti Ismaele.