Read Tzotzil Génesis 21 Bible Online

Génesis 21 - Tzotzil bible

Génesis 21

¹Ti jmoj ti c'u s'elan yaloj ono'oxe, ti Diose lic stij yo'nton ta stojol ti Sarae, ti c'otuc ta pasel yu'un ti strate yaloj ono'oxe.

²Lic xchi'in yol ti Sarae. Laj yilbe sat xnich'on ti Abraham yu'une c'alal mol xa ti stuque. Ja' jech yorail voc' ti olol jech c'u cha'al yaloj ono'ox ti Diose.

³Sbi xnich'on ti Abraham laj yac'be ti voq'uesbat yu'un ti Sarae, ja' Isaac.

⁴Va'i un, c'alal yich'oj xa xvaxaquibal (8) c'ac'al svoq'uele, laj yac'be yich' circuncisión jech c'u cha'al albat yu'un ti Diose.

⁵Yich'oj xa vo'vinic (100) jabil xch'iel sc'opojel ti Abraham c'alal voc' ti Isaaque.

⁶Jech ti Sarae xi laj snope: “Ti Diose laj yac' tse'incun, yu'un jmoj ta xlic tse'incuncutic xchi'uc scotolic ti buch'utic ta xa'iic ti oy xa cole.

⁷¿Mi yu'un oy la buch'u laj yal ti ta to xil xnich'on cu'un ti Abrahame? Manchuc mi jech un, laj to yilbe sat xnich'on cu'un ti c'alal mol xae.”

⁸Ti querem Isaaque muq'uib xa, laj yictabeic ti xchu'e. C'alal jech ictabil xa ti xchu'e, jech ti Abrahame lic spas jun muc' ta q'uin.

⁹C'u stu un, yol ti egipcioal ants Agar ti ja' xnich'on ti Abrahame, laj yil ti Sara ti ta xlabanat ti Isaaque.

¹⁰Va'i un, xi bat yalbe ti Abrahame: “¡Ac'o loc'uc batel ti mosovil ants xchi'uc ti yole! Yu'un ti col Isaaque mu xu' ta xch'acbe sbaic rextoil xchi'uc yol jun mosovil ants.”

¹¹Toj c'ux laj ya'i ti Abraham ti va'i s'elan taje, yu'un ja' xnich'on.

¹²Ja' no'ox un, xi albat yu'un ti Diose: “Mu xavul avo'nton xchi'uc ti aquereme, ti ame' mosove. Paso scotol jech c'u cha'al ta sc'anbot ti Sarae, yu'un ti anitilultaque ta x'ayan talel ta sventa ti Isaaque.

¹³Ja' jech xtoc yol ti me' mosovile, ta xc'ot ta pasel cu'un ta xcac' epajicuc ec yo' jech ta xc'otic ta jun muc' ta lum, yu'un ja' anich'on.”

¹⁴Sob xa ta yoc'omal, ti Abrahame laj yac'be batel pan ti Agare, xchi'uc jbej vorxa nucul noj ta vo'. Scotol taje, laj yac'be ech'el xcuch. Laj yac'be ta sc'ob ti yol ti Ismael sbie. Laj xch'ac sbaic. Jech ti antse bat. Mi ja'uc xbein ta beinel ti c'alal yacal ta xanav ech'el ta sbajtical banomil ti Beerseba sbie.

¹⁵C'alal laj ti vo' oy ta yavile, ti Agare laj yicta comel ti squerem ol ta yolon jpets te'e.

¹⁶Ti bu taje, xi snatil bat chotluc, yu'un mu sc'an sq'ueloj ta xcham ti yole. Ti c'alal chotole, ti quereme lic oc'uc.

¹⁷Ti Diose laj ya'i ta x'oc' ti quereme. Jech ti yaj'ánjel Diose, ta vinajel to, laj yavta ti Agar ti xi laj yalbee: “¿C'u cha'alot, Agar? Mu xaxi'. Yu'un ti Diose laj ya'i ta x'oc' ti aquerem bu oye.

¹⁸Batan, ba q'uelo ti aquereme. Nitbo ti sc'obe. Mu xacolta. Yu'un ti stuque, ta xc'ot ta jun muc' ta lum cu'un.”

¹⁹Va'i un, ti Diose laj yac'be yil Agar jun joc' ti oy vo'e. Jech ti stuque bat snojes talel ti yavil vo'e, laj yac'be yuch' ti Ismaele.

²⁰Ti Diose laj scolta ti quereme. Ch'i c'opoj, naqui ta sbajtical banomil ti oy ta Parane. C'ot ta jun banquilal jten-yolob.

²¹Ts'acal to un, ac'bat yic' jun egipcioal ants yu'un ti sme'e.

²²Ja'tic van jech yorail ech'el taje, ti Abimeleque bat sc'opon ti Abrahame, chi'inbil batel yu'un ti Ficole, ti ja' banquilal yu'un ti yajsoldadotaque. Ti Abimeleque xi laj yalbe ya'i ti Abrahame: —Yu'un scotol ti c'usi ta xapase, ta xquilcutic ti coltabilot yu'un ti Diose.

²³Yu'un ti li' bu va'alotique, va'ano aba ta yalel ta jamal ti mu jutebuc ta xapasbun ti c'usi chopole. Mi ja'uc oy c'usi chopol ta xapasbe ti jnich'nabe, mi ja'uc ti jnitilultaque. Alo ta jamal ti ja' no'ox jech ta xac'uxubinvan jech c'u cha'al laj jc'uxubinote, ti ja' no'ox jech ta xapas xtoc ta stojol ti jnaclejetic yu'un ti jteclum li' ti bu nacalot avi tanae.

²⁴—Jamal xcal ja' jech ta jpas —xi laj stac' ti Abrahame.

²⁵Va'i un, ti Abrahame laj yac'be sna' ti Abimelec sc'oplal jun joc' ti pojbat yu'un svinictac ti Abimeleque.

²⁶Ti Abimeleque xi laj staq'ue: —Mi ja'uc jutebuc ca'binoj sc'oplal taje. Yu'un mu'yuc c'usi xavalbun. Yu'un mi ja'uc jutebuc jna' buch'u laj spas ti va'i s'elan taje.

²⁷Va'i un, ti Abrahame laj stsac talel chij xchi'uc vacax. Laj yac'be yich' ti Abimeleque. Ti jech c'ac'al taj une, laj spasic jun trate ti xchibalique.

²⁸Ti ta scotol xchijtac ti Abraham lic talel ta corrale, laj xch'ac loq'uel vuc-cot,

²⁹xi lic sjac' ti Abimeleque: —¿C'u cha'al jech ta xach'ac loq'uel ti vuc-cot chije?

³⁰Ti Abrahame xi laj staq'ue: —Ti vuc-cot chij ta xcac'bot li'e, ja' ta xc'ot ta svinajeb trate ti vu'un laj joc' ti joq'ue.

³¹Ja' smelol ti c'ot ta sbi Beerseba[8] ti bu taje, yu'un ti xchibalique laj yac' strateic ti bu taje.

³²C'alal laj xa yac' ti strateic ta Beersebae, jech ti Abimeleque xchi'uc ti Ficole sutic batel ta yosilal ti filisteoetique.

³³Ta Beerseba taje, ti Abrahame laj sts'un jpets tamarisco te', ti laj snijan xchiman sba ta stojol Dios Ajvalil sbatel osile.

³⁴Jech ti Abrahame jalij ta naclej ta yosilal ti filisteoetique.