Read Tzotzil Génesis 22 Bible Online

Génesis 22 - Tzotzil bible

Génesis 22

¹Ech' c'u sjaliluc un, ti Diose lic sq'uelbe c'u s'elan yo'nton ti Abrahame. Jech ti Diose xi laj yalbee: —Abraham. —Li' oyune —xi laj staq'ue.

²Xi laj yal ti Diose: —Ic'o talel ti Isaac ti c'ajomal yo jun ti avuni quereme, ti mu tuch'baj ta avo'ntone. Batan ta yosilal Moria. C'alal mi tey xa oyot une, loc'uc ayanuc ta avo'nton ti ta xavac' ta chiq'uel ta matanal ta jol vits ti bu ta xcac'bot avile.

³Ti Abrahame, sob xa ta yoc'omal, lic slapbe siya ti sburroe. Laj sboj batel si' sventa xchic'obil ti matanale. Bat xchi'uc ti Isaac ti ja' xnich'one xchi'uc chib smosov. Bat bu albil yu'un ti Diose.

⁴Ta yoxibal xa ox c'ac'al un, ti Abrahame laj sta ta ilel ta nom ti vitse.

⁵Xi laj yalbe ti smosovtaque: —Comanic li' xchi'uc ti burroe. Yan ti vu'un xchi'uc ti jquereme ta to xijelavcutic batel le'e. Yu'un chba jtacutic ta c'oponel ti Diose. Ts'acal to un, ta xisutcutic talel.

⁶Jech ti Abrahame laj stam batel ti si' sventa ta xich' chiq'uel o ti matanele. Laj yac'be batel xcuch ti Isaaque. Ja' jech xtoc laj yich' batel xcuchilu xchi'uc c'oc'. Bat xchibalic.

⁷Lec xa ox muc' ta jal un, ti Isaaque xi laj sjac'be ti Abrahame: —Tot —¿C'usi ta xaval, Nich'on? —xi laj stac' ti Abrahame. —A'yio ava'i —xi ti Isaaque—, quich'ojtic batel ti si'e xchi'uc ti c'oq'ue, ja' no'ox un, ¿bu oy ti chij ti ta xich' chiq'uel ta sventa ti matanale?

⁸—Dios ta sbain bu ta xtal jcotuc chij ti ta xich' chiq'uel ta sventa ti matanale, Nich'on —xi tac'bat yu'un ti stote. Jmoj xanavic batel xchibalic.

⁹C'alal c'otic bu albilic yu'un ti Diose, jech ti Abrahame lic smeltsan jun altar. Laj yac'be si'il. Ts'acal to un, lic xchuc ti Isaac ti ja' xnich'one. Laj scajan ta ba si' oy ta altar.

¹⁰Ja' no'ox un, ti c'alal naca xa mu ta syales ti sc'ob xchi'uc xcuchilu ta stojol ti xnich'one,

¹¹ti yaj'ánjel Diose xi biiltasvan talel ta vinajele: —¡Abraham! ¡Abraham! —¿C'usi ta xaval? Li' oyune —xi itac'av ti Abrahame.

¹²Ti ánjele xi laj yale: —Mu xayales ac'ob ta stojol ti quereme. Yu'un laj xa quil ti axi'taoj ti Diose. Yu'un mu'yuc laj ajalta ta yac'belun ti c'ajomal yo jun ti aquereme.

¹³Jech ti Abrahame laj stoy batel sat, ja' o laj yil jcot chij ts'otol xulub ta vach'il te'. Va'i un, bat yic' talel ti chije. Ja' laj yac' ta chic'bil matanal ti c'ot ta q'uexolil ta sventa ti squereme.

¹⁴Ts'acal to un, ti Abrahame xi laj yac'be sbi ti bu taje: “Ti Diose ta xac' c'usi tsots sc'oplal ta xtun.” Ja' yu'un un, xi to sbi yu'unic avie: “Ti li' ta vitse, Dios ta xac' c'usi tsots sc'oplal ta xtun.”

¹⁵Ti yaj'ánjel Diose c'opoj talel ta xchibal xa velta ta stojol ti Abrahame.

¹⁶Xi laj yale: —Ti Diose xi ta xale: “Ti jech laj apas ti mu'yuc xajaltabun ti c'ajomal yo jun ti aquereme, ta jva'an jba ta rextico jtuc.

¹⁷Ep ta jc'uxubinot. Ta xcac' bolicuc ti anitilultaque. Ta x'epajic jech c'u cha'al ta xavil ti c'analetic oy ta vinajele, jech c'u cha'al ti yi' oy ta sti'il nabe. Ja' jech xtoc ti stuquique ta ono'ox stsal yu'unic ti scontraique.

¹⁸Yu'un scotol ti muc'tiquil lumetic oy ta banomile, ta staic xc'uxubinelic ta sventa ti stuquique. Yu'un ti vo'ote laj ach'un ti c'usi laj calbote.”

¹⁹Jech ti Abrahame sut batel ti bu comemic ti yajtuneltaque. Ts'acal to un, jmoj tsobol batic ta Beerseba. Tey jmoj c'ot naquiicuc xchi'uc ti Abrahame.

²⁰Ech' xa ox c'u sjaliluc, ti Abrahame laj ya'ibe sc'oplal ti Nacor ti ja' xchi'il ta voq'uele, ti laj xa yil yan yol ti Milca yu'une.

²¹Ti jun ba'yel voq'ue, ja' Uz ti sbie. Ts'acal to un, voc' jun yits'in ti ja' Buz sbie. Voc' talel xtoc ti Kemuele, ti ja' stot ti Arame.

²²Voc' talel xtoc ti Quésede, ti Hazoe, ti Pildase, ti Idlafe, ti Betuele.

²³Ti Betuel taje, ja' stot ti Rebecae. Ti vaxacvo' alab nich'nabiletique, voq'uic ta stojol ti Milcae, xnich'nab ti Nacor ti ja' xchi'il ta voq'uel ti Abrahame.

²⁴Ma'uc no'ox taje, ti Nacore laj to yil yalab xnich'nab xchi'uc ti sts'acal ajnil Reumá sbie, ti laj voc'uc talel yu'un ti Tebae, ti Gáhame, ti Tahase, ti Maacae.