Read Tzotzil Génesis 25 Bible Online

Génesis 25 - Tzotzil bible

Génesis 25

¹Ti Abrahame laj to sa' yan yajnil, Cetura sbi.

²Ti sbitac ti xnich'nab laj yilic xchi'uque, ti Zimrame, ti Jocsane, ti Medane, ti Madiane, ti Isbaque, ti Súae.

³Ti Sebae xchi'uc ti Dedane, ja' stotic ti Jocsane. Snitilultac ti Dedane, ja' ti asuereoetique, ti letuseoetique, ti leumeoetique.

⁴Xnich'nabtac ti Madiane, ja' ti Efae, ti Efere, ti Hanoque, ti Abidae, xchi'uc ti Eldaae. Scotolic taje, ja' snitilultac ti Ceturae.

⁵Ti Isaaque ja' laj stsob comel scotol ta rextoinel ti c'usi oy yu'un ti Abrahame.

⁶Ja'uc xnich'nabtac ti Abraham ta sventa ti yan ants yu'une, ja' no'ox laj sq'uelanbe smotontac. C'alal cuxul to ox ti Abrahame, laj xch'ac loq'uel ti xnich'nabtac ta stojol ti Isaaque. Yu'un laj stacanan batel ta osil ti oy ta sloq'ueb c'ac'ale.

⁷Ti Abrahame ch'i c'opoj vo'lajuneb sbalunvinic (175) jabil ta scotol.

⁸Mol xa cham, lequil chamel laj ya'i. Yu'un bat stsob sbaic xchi'uc ti smolmuc'totaque.

⁹Bat mucatuc ta jombil muquinal ti oy ta Macpelae, ta stuq'uil sloq'ueb c'ac'al ti oy ta Mamree, yosil ti Efrone, xnich'on ti Zohar ti hititae. Yu'un laj yich' muquel yu'un ti Isaaque xchi'uc ti Ismael ti ja' xnich'nabe.

¹⁰Ti banomil taje, ja' ti laj smanbe ta stojol ti hititaetic ti Abrahame. Ti bu taje, laj yich' muquel ti Abraham ti bu mucul ti Sara ti ja' yajnile.

¹¹C'alal cham xa ox ti Abrahame, jech ti Diose lic sva'an sba ta stojol ti Isaaque, ti nacal com ta sts'el joc' ti jech sbie, “Sjoc' ti Buch'u cuxul yilojune”.

¹²Li'e, ja' xnich'nabtac ti Ismael ti ja' xnich'on ti Abrahame, yol ti egipcioal ants Agare, smosov xtoc ti Sarae.

¹³Ti c'u s'elan xcholet laj voq'uicuc talele, jech c'u cha'al li'e: ti Nebaiote ti ja' sbanquilal nich'onile. Tal no'ox xtoc un ti Cedare, ti Adbeele, ti Mibsame,

¹⁴ti Mismae, ti Dumae, ti Masae,

¹⁵ti Hadare, ti Temae, ti Jeture, ti Nafise, ti Cedemae.

¹⁶Taje, ja' sbiic ti lajcha'vo' xnich'nab Ismaele. Xchi'uc xtoc, ja' jech ojtiquinbil c'ot sbi slumalic ti jujunique, xchi'uc ti jujuchop ti svoloj sbaique. Yu'un ti jujunique, c'otemic ta jtsobvaneje yu'un ti xchi'ilique.

¹⁷Ti Ismaele yich'oj xa vuclajuneb yucvinic (137) jabil c'alal chame. Bat xchi'in ti smolmuc'totaque.

¹⁸Jech ti snitilultaque bat nacliicuc ti oy ta o'lol Havila banomil xchi'uc ti Shure, ti oy ta yeloval Egipto ta sbelal Asiriae. Ti bu taje, lic naquiicuc manchuc mi chopol x'a'yiatic yu'un ti xchi'iltaque.

¹⁹Li'e, ja' sc'oplal ya'yejal ti Isaac xnich'on ti Abrahame.

²⁰Ti Isaaque yich'oj xa cha'vinic (40) jabil c'alal laj yic' ti Rebeca xchi'il ta voq'uel ti Labane, yantsil nich'on ti Betuele, ti ja'ic arameoetic nacalic ta Padán-arame.

²¹Ti Rebecae mi ja'uc x'alaj. Jech o xal ti Isaaque laj sc'anbe vocol Dios ta sventa ti yajnile. A'yibat yu'un Dios ti sc'opojel sti'inele. Jech ti Rebecae lic xchi'in ti yole.

²²C'u stu un, ti uni vachetique xvujetic no'ox ta spas sbaic ti oy ta ch'utile. Va'i un, xi laj snope: “Mi ja' jech ta xc'ot ta pasel ti va'i s'elan taje, ¿c'usi xa xtun o ti li' cuxulune?” Ja' yu'un un, lic sjac'be Dios ti c'u cha'ale.

²³Va'i un, xi tac'bate: “Ti olol achi'inoj toe, chib muc'tiquil lum, chib lum ta scontrain sbaic ti jech mu to voq'uemique. Ti june ech'em tsots xu' yu'un, ja'uc ti june mu sta xu' yu'un, yu'un ti banquilale mosovinbil ta xc'ot yu'un ti its'inale.”

²⁴Sta yorail ta svoq'ues yol ti Rebecae, uni vach laj yilbe sat.

²⁵Ti ba'yel voc' talele, c'an xican stsotsil sjunlej. Jech o xal laj yac'beic sbi Esaú.

²⁶Voc' no'ox talel xtoc ti its'inale, stsacojbe snuc yoc ti Esaue. Ja' yu'un un, Jacob, laj yac'beic sbi. Ti Isaaque yich'oj xa ox oxvinic (60) jabil c'alal voc' yol ti Rebecae.

²⁷Ti ololetique ch'iic. Ti Esaue, banquilal jnutsuvil xa'i sba, yabtel ti paxyal ta te'tique. Yan ti Jacobe xlajet no'ox xa'i sba, lec ta xa'i ti tey no'ox xtiq'uet ta snae.

²⁸Jech ti Isaaque syalesoj xc'uxul ta stojol ti Esaue, ja' ti ta sta ta lajesel ti c'usi ta sta ta nutsele. Yan ti Rebecae syalesoj xc'uxul ta stojol ti Jacobe.

²⁹Oy jun c'ac'al un, ti Jacobe ja' o yacal ta spas sve'el c'alal ja' o lubem xa sut talel ta nutsuvil ti Esaue.

³⁰Va'i un, xi laj yalbee: —Avocoluc, ac'bun jutebuc ave'el ti lec chac'olan xa meltsajem avu'un le'e, yu'un chamal vi'nalun xa talel. (Jech o xal un, ojtiquinbil c'ot ta Edom[10] ti Esaue.)

³¹Xi laj yal ti Jacobe: —Ti xcaltique, jeltic o xchi'uc ti c'usi albil sc'oplal ta xa'ac'bat ti jech banquilal nich'onilote.

³²Va'i un, xi laj yal ti Esaue: —Xvinaj xa ti chamal vi'nalun ta q'uelele. Jech ti c'usi ta xquich' ti jech banquilal nich'onilune, mu'yuc c'usi stu o cu'un.

³³—Jamal albun avi une mi ta xavac'bune —xi liquel ti Jacobe. Jamal laj yal ti Esaue. Ja' jech laj yac' jelavel ta stojol Jacob ti c'usi albil sc'oplal ta xich' ti jech banquilal nich'onile.

³⁴Va'i un, ti Jacobe lic yac'be pan xchi'uc toc'on chenec' ti Esaue. C'alal laj yo'nton ta ve'el uch'ubajel ti Esaue, loc' batel. Mi ja'uc tsots sc'oplal laj ya'i ti c'usi oy sc'oplal ta xich' ti jech banquilal nich'onile.