Read Tzotzil Génesis 27 Bible Online

Génesis 27 - Tzotzil bible

Génesis 27

¹Toj mol xa ti Isaaque. Ja' jech xtoc maquem xa ti sate. Oy jun c'ac'al un, laj sta ta iq'uel ti Esaú ti sbanquilal nich'one, ti xi laj yalbe xtoque: —¡Nich'on! —Albun ca'i, tot —xi laj stac' ti Esaue.

²Xi laj yal ti Isaaque: —Aviloj ti toj molun xae. Ti oc'om cha'eje, xu' nan xicham.

³Jech o xal un, batan ta te'tic. Ich'o batel ti ayolobe xchi'uc ti sni'taque. Ba sa'o talel jcotuc chon bolom jti'.

⁴Ti lec xa mu xameltsan ti ve'elil jech c'u cha'al lec xca'i slajesel ono'oxe, ich'bun talel un yo' jech ta jti'. Ja' o ta xcac'bot ti xch'ul lequilal ti Dios oy ta jtojole yo' to cuxulun.

⁵Ti Rebecae ya'binoj ti va'i s'elan ta x'albat ti Esaú yu'un ti Isaaque. Ja' yu'un un, c'alal loc' batel ta nutsuvajel ta sa'el talel ti c'usi ta sti' ti stote,

⁶jech ti Rebecae xi laj yalbe ya'i ti Jacob ti yits'inal quereme: —A'yio ava'i, laj ca'i ti atote laj sc'opon sbaic xchi'uc ti Esaú ti xi ta xale:

⁷“Ba nutsuvajan, sa'o talel jcotuc chon bolom. Lec xa mu xameltsan yo' lec ta xive'. Ta sba ta sat ti Diose, ta xcac'bot ti xch'ul lequilal ti oy ta jtojole yo' to cuxulun”, xi.

⁸Ja' yu'un un, cuni querem, a'yio ava'i lec ti xi s'elan ta xcalbot ava'ie:

⁹Batan bu oy ti corrale. Tsaco talel cha'cotuc tentsun ti lec t'ujome yo' jech lec mu ta jmeltsanbe sve'el ti atot jech c'u cha'al sna' slajese.

¹⁰Ta xavich' batel un yo' jech ta xve'. Ja' to jech ta xayac'bot xch'ul lequilal ti Diose yo' to cuxul.

¹¹Va'i un, ti Jacobe xi laj stac'be ti sme'e: —Ti jbanquile, pim stsotsil sjunul ti sbec'tale. Ti vu'une mu jechuc.

¹²Mi xjaxjax picun ti jtot une, ta sna' ti vu'une. Ta snop ti ta xquilbajine. Ja' no'ox ta jta yu'un ti ta xischopol-c'optaune, ma'uc ta jta yu'un ta xiyac'bun slequilal ti Diose.

¹³Va'i un, xi tac'bat yu'un ti sme'e: —C'otuc ta jba ti bac vocole, cuni querem. Ch'uno no'ox ti c'usi ta xcale. Tsaco talel ti tentsunetic taje.

¹⁴Jech ti Jacobe ba stsac talel ti tentsunetique. Vul yac'be ti sme'e. Jech ti me'il xtoc une, lic xchapan ta smeltsanel ti ve'lile, lec xa mu laj smeltsan jech c'u cha'al lec xa'i slajes ti Isaaque.

¹⁵Ja' jech xtoc laj stambe talel slequil c'u' ti sbanquilal querem ol ti q'uejel ta nae. Ja' laj yac'be slap ti Jacob ti yits'inal querem ole.

¹⁶Laj taj une, lic svol ta snuculil tentsun ta sc'ob ta snuc' ti Jacob ti bu ch'abal stsotsile.

¹⁷Laj yac'be batel ti pane xchi'uc ti ve'lil laj xchapan ta smeltsane.

¹⁸Jech ti Jacob une och batel bu oy ti stote, ti xi c'ot yale: —¡Tot! lital xa. Xi laj sjac' ti Isaaque: —Li' oyune. ¿Buch'u junucaloxuc ti jnich'naboxuc xcaltic taj une?

¹⁹Xi laj stac' ti Jacobe: —Vu'unun Esaú, ti abanquilal nich'one. Laj xa jpas ti c'usi laj ac'anbune. Lican, avocoluc. Chotlan, ti'an ti chon bolom laj jta talel ta nutsele. Ac'bun quich' xch'ul lequilal ti Dios oy ta atojole.

²⁰Va'i un, ti Isaaque xi laj sjaq'ue: —¿C'usi laj avut laj ata no'ox talel ta anil ti ve'lile, cuni querem? Xi laj stac' ti Jacobe: —Ja' laj scoltaun ta sa'el ti Ajvalile, ti Dios avu'une.

²¹Ja' no'ox un, xi albat yu'un Isaaque: —Nopajan talel ca'itic li'e. Ta jaxolanot ta piquel mi vo'ot ti jnich'onot Esaue.

²²Jech ti Jacobe nopaj batel yo' jech ta xjaxat ta piquel yu'un ti stote. Va'i un, ti Isaaque xi laj yale: “Ti sc'opojele ja' ti Jacobe, ja'uc ti sc'obe ja' ti Esaue.”

²³Mi ja'uc laj yojtiquin buch'u, yu'un ti sc'obe, pim stsotsil jech c'u cha'al ti Esaue. Ti c'alal ta xa ox x'ac'bat yich' slequilal ti Diose,

²⁴c'u stu un, xi lic cha'jac'batuque: —¿Mi melel cac'tic vo'ot ti jnich'on Esaue? Xi laj stac' ti Jacobe: —Melel, vu'unun ti Esaue.

²⁵Va'i un, ti stote xi laj yale: —Ac'bun talel ti jve'ele, cuni nich'on. Ta jti' ti chon bolom ti laj ata talel ta nutsele. Ts'acal to un, ta xcac'bot ti slequilal Diose. Ti Jacobe lic yac'be sve'el ti stote. Ja' jech xtoc laj yich'be talel vino. Jech ti Isaaque ve' uch'ubaj.

²⁶Ts'acal to un, xi lic yale: —Nopajan talel, nich'on, buts'un.

²⁷C'alal nopaj batel yo' buts'van ti Jacobe, jech ti Isaaque laj yuts'itabe ti sc'u'e. Va'i un, xi s'elan laj yac'be yich' ti lequilal jech c'u cha'al li'e: “Ti va'i s'elan ti smuil li'e, ta melel ja' ti jnich'one, yu'un co'ol s'elan smuil ti osil banomil sva'anoj sba ti Dios ta stojolale.

²⁸Ti Diose, ac'o yac'bot talel vo' ta vinajel, ac'o yac'bot ata lec ti c'usitic xloc' x'ayan ta banomile, ti mu no'ox albajuc yepal ti trigo xchi'uc ti vinoe.

²⁹Ac'o yac' sba ta mosovinel ta atojolal ti epal jnaclejetique, ti quejeleticuc ti muc'tiquil lum ta atojolale. Ventaino ti achi'iltaque, ti quejeleticuc ta atojolale. Ti buch'u ta sbisot ta cotol chavale, ja' no'ox jech ta xich' sbisel ta cotol chaval ec, ti buch'utic ta xc'uxubinote, ja' no'ox jech ta xich'ic c'uxubinel ec.”,

³⁰Ti Isaaque laj xa ox yo'nton ta yac'bel yich' slequilal Dios ti Jacobe, naca to ta xloc' batel bu oy ti stote, c'alal ja' o vul ta nutsuvil ti Esaue.

³¹Ja' jech ec lic xchapan ta smeltsan ti muil ve'lile. Laj yich'be batel ti stote, ti xi laj yalbe xtoque: —Lican un, tot, ti'an ti ve'lil laj jta talel ta nutsel ti anich'onune. Ac'bun quich' ti ch'ul lequilale.

³²Va'i un, ti Isaaque xi laj sjaq'ue: —¿Buch'uot ya'yel taj une? —Vu'un Esaú ti abanquilal nich'one —xi laj stac'.

³³Ch'ayal c'ot yo'nton ti Isaaque, xt'elelet ye ti xi laj yale: —¿Buch'u ya'yel un cha'e ay ta nutsuvil ti laj yich'bun talel ti ve'lile? Yu'un laj xa jti' ti ve'lil c'alal mu to ta xavule. Ja' jech xtoc laj xa cac'be yich' ti ch'ul lequilale. Avi tana une, ac'bil xa yich' ch'ul lequilal ti buch'ue.

³⁴C'alal ti Esaú laj ya'i ti va'i s'elan i'albat yu'un ti stote, xi lic smil sba ta oq'uele: —¡Ac'bun quich' ec ti ch'ul lequilal avich'oj une, tot!

³⁵Xi tac'bat yu'un ti Isaaque: —Ja' tal ti achi'il ta voq'uele. Laj slo'laun. Ja' laj yich' ti ch'ul lequilal ja' ox avu'une.

³⁶Xi laj yal ti Esaue: —¡Ja' ca smelol un cha'e ti laj yac'beic sbiin Jacobe! Yu'un xchibal xa velta laj spets'anun comel. Ba'yel laj sc'anbun ti oy c'usi sc'oplal ta xquich' ti jech sba nich'onilune. Avi tana xtoc une, laj xa spojbun ti lequilal oy sc'oplal ta xquich' oxe. ¿Mi mu'yuc xa yan lequilal ta xavac'bun un?

³⁷Va'i un, xi tac'bat yu'un ti Isaaque: —A'yio ava'i, c'ot xa ta sba Jacob cu'un ta smosovinot, xchi'uc xtoc ti ta smosovin scotol ti avuts' avalaltaque. Loc' xa ta alel cu'un ti mu no'ox albajuc yepal ta sta ti trigoe, ti mu no'ox albajuc yepal ta sta ti vinoe. ¿C'usi xa stac' ta jpas ta atojol avi tana une, nich'on?

³⁸Ti Esaue xi xvulvun xa liquele: —¿Mi yu'un ja' no'ox jun ch'ul lequilal xu' ta xavac' un, tot? ¡Ac'bun quich' ec ti ch'ul lequilale! X'avet no'ox liquel, lic smil sba ta oq'uel.

³⁹Va'i un, ti Isaaque xi laj yale: “Ta xanamaj loq'uel bu oy ti lequil ve'ebal banomile, ti bu lec ta xac' ti vo' ta xlic talel ta vinajele.

⁴⁰Yu'un c'ajomal no'ox ac'abalinoj ta stsaquel ti avespadae, yu'un mosovinbilot ta xac'ot yu'un ti avits'ine, ja' to ta xacol loq'uel ta mosovil yu'un ti avits'ine mi laj atsac lec ti avipe.”,

⁴¹Ti jech yorail taj une, lic sc'ac'al yo'nton ti Esaú ta stojol ti Jacob ta sventa ti ch'ul lequilal ac'bat yu'un ti stote. Jech o xal xi lic snope: “Jutuc xa sc'an xc'ot ta xicomcutic ta me'inal, ta xa xcham ti jtote. C'alal mi jech ta xc'ot ta pasele, ta xlic jmil ti quits'in Jacobe.”

⁴²C'alal laj ya'i ti Rebeca va'i s'elan xchapoj ta snopel ti Esaue, lic sta talel ta iq'uel ti Jacobe, ti xi laj yalbee: —A'yio ava'i, ti abanquil Esaue ta smilot ya'i yo' jech ta spac sutel ti c'ope.

⁴³Ja' yu'un un, col, ts'etano achiquin ta ya'yiel ti xi s'elan ta xcalbot ava'ie: Jatavan no'ox batel ta anil c'alal to Harán ta sna ti jbanquil Labane.

⁴⁴Jalijan c'uc sjaliluc, ja' to c'uxi ech' sc'ac'al yo'nton ti abanquile.

⁴⁵Mi ch'ay ta yo'nton ti c'usi laj apasbee, ta xlic jtaot ta iq'uel yo' ta xasut talel. ¡Yu'un c'ux ta xca'i ti ta jun no'ox c'ac'al ch'abal xchibalic ti cole!

⁴⁶Ts'acal to un, ti Rebecae xi bat yalbe ya'i ti Isaaque: —Mu xa ts'icbaj ta xca'i yu'unic ti hitita antsetic laj yic' ti Esaue. Mi ta xlic yic' junuc hitita tseb ti Jacob jech c'u cha'al le' ti li' nacalic ta Canaane, ja' lec ac'o chamcun lajcun ta j'ech'el.