Read Tzotzil Génesis 30 Bible Online

Génesis 30 - Tzotzil bible

Génesis 30

¹C'alal laj yil ti Raquel ti mu xilbe sat jcotuc xnich'on yu'un ti Jacobe, lic sc'ac'al yo'nton ta stojol ti Lea ti ja' xvixe. Jech o xal xi laj yalbe ti smalale: —Licuc jchi'in col avu'un ec un. Mi mu jchi'in avu'une, chamcun xch'a unbi.

²Ti Jacobe cap sjol yu'un ti xi laj yalbee: —¿Mi yu'un Diosun ti avaloj une? Yu'un ja' stuc ti jech mu xac' xavil avalabe.

³Ja' yu'un un, ti Raquele xi laj yale: —Ja' lec un cha'e, chi'ino ta vayel ti jmosov Bilhae. C'alal mi ayan yalab avu'une, co'ol s'elan ti vu'un li'alaj jtuque. Ja' to jech ta x'ayan ti calabe.

⁴Va'i un, ja' jech lic spas ti Raquele. Laj yac' ye ti ac'o vayuc xchi'uc Jacob ti smosov Bilha sbie yo' ta xc'ot ta sts'acal ajnil. Jech ti Jacobe laj xchi'in ta vayel ti Bilhae.

⁵Ti stuc une nich'naj yu'un ti Jacobe.

⁶Ja' yu'un un, ti Raquele xi laj yale: “Ti querem li'e ta sbiin Dan,[16] yu'un laj ya'ibun jc'op ti Diose. Laj sva'an sba ta jtojol, yu'un laj yac'bun jun jquerem.”

⁷Ts'acal to xtoc un, ti Bilhae laj to yil jun squerem yu'un ti Jacobe.

⁸Jech ti Raquele xi laj yale: “Ti querem li'e, Neftalí ta sbiin,[17] yu'un och yipal cu'un ta stsalel ti jvixe. Avi tana un, cuch xa cu'un.”

⁹C'alal laj yil ti Lea mu xa x'alaje, laj yac'be ta sc'ob Jacob yo' ta xc'ot ta sts'acal ajnil ti Zilpa ti smosove.

¹⁰Va'i un, c'alal laj yilbe sat jun squerem yu'un Jacob ti Zilpae,

¹¹jech ti Leae xi laj yale: “Toj lec corail. Jech ti querem li'e ta sbiin Gad.”[18]

¹²Ts'acal to xtoc un, ti Zilpae laj to yil yan squerem yu'un ti Jacobe.

¹³Jech ti Leae xi laj yale: “¡Toj ech'em ximuyubaj ta xca'i! Toj ech'em xmuyubaj ti ants le'e, xi jc'oplal yu'unic ti antsetic avi tanae. Jech o xal ti querem li'e ta sbiin Aser.”[19]

¹⁴Oy jun c'ac'al, ti Rubene bat ta osil c'alal ja' o ta xich' tsobel ti trigoe. Laj sta jbej cha'bejuc sat mandrágora. Yich'ojbe batel Lea ti sme'e. C'alal laj yil sat mandrágora ti Raquele, xi laj yalbe ti Leae: —Avocoluc, ac'bun jayibuc sat mandrágora ti yich'oj talel ti aquereme.

¹⁵Jech ti Leae xi laj staq'ue: —¿C'u to ono'ox j'elan ta xavilun ti apojojbun ti jmalale? Avi tana xtoc une, ta xapojbun ava'i ti sat mandrágora yich'oj talel ti jquereme. Xi laj yal ti Raquele: —Ti sat mandrágora yich'oj talel ti aquereme, la' jeltic o xchi'uc ti Jacobe yo' jech ta xavay xchi'uc ti ac'ubaltic tana li'e.

¹⁶Ac'ubaltic xa c'alal sut xa talel ta yosil ti Jacobe, jech ti Leae bat snup ta be ti xi laj yalbee: —Ta ac'ubaltic tana li'e, ta jchi'in jbatic ta vayel. Yu'un laj xa jelotcutic ta sat mandrágora yich'oj talel ti jquereme. Ti jech ac'ubal taje, laj xchi'in ta vayel Lea ti Jacobe.

¹⁷Jech ti Leae laj yil yo'obal squerem yu'un ti Jacobe, yu'un a'yibat sc'op Lea yu'un ti Diose.

¹⁸Ja' yu'un un, ti Leae xi laj yale: “Ti querem li'e ta sbiin Isacar.[20] Yu'un ti Diose laj yac'bun jmoton, yu'un laj cac'be xchi'in jmosov ti jmalale.”

¹⁹Ts'acal to un, ti Leae laj yil svaquibal squerem yu'un ti Jacobe.

²⁰Yu'un xi laj yale: “Ti Diose laj yac'bun lec jmoton. Avi tana une, yal to jc'uxubinel yu'un ti jmalale. Yu'un oy xa vaquib squerem cu'un. Jech o xal un, ti querem li'e ta sbiin Zabulon.”[21]

²¹Ta slajeb xa un, laj to yil jun stseb ti Leae. Laj yac'be sbi Dina.

²²Ti Diose mu'yuc laj xch'ay ta yo'nton ti Raquele. A'yibat ti sc'ope. Ac'bat ti squeremtaque.

²³C'alal ayan ti sba yole, xi laj yale: “Mac xa jq'uexlalil yu'un ti Dios c'alal albil jc'oplal ti mu jna' xi'alaje.

²⁴Yac'bucun xa la junuque.” Jech o xal laj yac'be sbiin José.[22]

²⁵Ts'acal to un, c'alal voq'uem xa ox José yu'un ti Raquele, jech ti Jacobe xi laj yalbe ti Labane: —Ac'o ave ati' ti ac'o sutcun batel ta jlumale.

²⁶Ac'bun batel ti jnich'nabe, ti cajniltaque. Yu'un li'abtej ta atojol ta sventaic. Jech o xal un, coltaun batel. Yu'un xana' lec c'u s'elan li'abtej ta atojol.

²⁷Va'i un, ti Labane xi laj staq'ue: —Avocoluc, coman li' ta jtojole. Mu xabat. Yu'un laj xa jta ta t'unel ti sva'anoj sba ti Dios ta jtojol ta aventae.

²⁸Albun ca'i c'u yepal ta xac'an ti atojole. Ja' jech ta jtoj.

²⁹Ja' yu'un un, ti Jacobe xi laj yale: —Xana' lec c'u s'elan li'abtej ta atojol, c'u s'elan laj jq'uel laj jtuc'ulan ti chon bolometic avu'une.

³⁰Yu'un c'alal livul ta atojole, mu'yuc to ox ep ti c'usi x'ayan avu'une. Avi tana li' une, epajem ta j'ech'el. Ti c'alal livul li'e, laj sva'an sba ta atojol ti Diose. Ja' no'ox un, ¿c'usi to ora ta xlic jbain jba jtuccutic ti c'u quepalcutique?

³¹Xi xvulvun liquel ti Labane: —¿C'u yepal ta xac'an ti atojol un cha'e? Xi laj stac' ti Jacobe: —Mu'yuc ta jc'anbot jutebuc jtojol. Ta xlic jcha'q'uel ti achijtaque, ja' no'ox mi lec ta xava'i ti xi ta xcalbote:

³²Avi tanae, ac'o ave ati' ta xi'ech' bu oy ti achijtaque yo' ta jch'ac loq'uel scotol ti uni ic'aquil mimi'etique, xchi'uc scotol ti pinto tentsunetique, xchi'uc ti basastic spintoale. Ja' ta xc'ot ta stojol cuni c'ac'al taj une.

³³C'alal ta xtal aq'uelun le' batele, ta xavil c'u s'elan ta xiloc' xchi'uc: Mi xi xa s'elan capal ta jchij ti ma'uc pinto tentsune, ti ma'uc basastique, ti ma'uc ic'al mimi'etique, ja' xa me avu'un, laj quelc'anbot unbi: Laj avil atuc c'u s'elan cuni talel unbi.

³⁴—Jechuc ti c'usi laj avale. Ta jch'un. Lec ta xca'i —xi ti Labane.

³⁵Ta sc'ac'alil no'ox taj une, ti Labane, ta ora no'ox, lic xch'acanan loq'uel ti pinto tentsunetique, ti basastic spintoale, xchi'uc scotol ti me' tentsunetic ti pintotique, xchi'uc ti basastic spintoale, ti sac vayane, xchi'uc scotol ti ic'aquil mimi'etique. Ja' lic yac'be sbain ta sq'uel ti squerem nich'nabe.

³⁶Laj taj une, laj sbeq'uic batel ti va'i yepal laj xch'aquic loq'uel bu oy ti Jacobe. Oxib c'ac'al yich'oj sbelel bu c'alal batic. Yan ti Jacobe staoj yav sbainojbe ta sq'uelbel yan xchijtac ti Labane.

³⁷Ti Jacobe laj sc'ocan talel yaxal jich'il q'uelom te' ti álamoe, ti almendroe, ti castanyoe. Laj sil ta cho'el yo' jech polajtic saquil ta q'uelel.

³⁸Laj xtoc un, ti jich'il te'etic silbil ta cho'ele, bat yac' bu ta slaman sbaic ta yuch'el vo' ti chijetic ti ta xlic cuchumajicuque.

³⁹Va'i un, ti jech ta spasic ta sts'el jich'il cho'bil te'etique, ja' jech pintotic, basastic, spintoal chlaj voq'uicuc ti yolique.

⁴⁰Ja' yu'un un, ti Jacobe laj sbev loq'uel ti chon bolometic basastique, xchi'uc ti ic'-iq'ue, ti ayan talel ta xchij ti Labane. Ja' jech lic epajuc xchij ti Jacob laj xch'ac loq'uel ta xchijtac ti Labane.

⁴¹C'alal jujuten ta xcuchumaj ti jubem chijetique, jech ti Jacobe chba slaman ti cho'bil jich'il te' bu ta xuch'ic vo' ti chijetique. Jech ti chijetique ta xilic c'alal ta xlic cuchumajicuque.

⁴²Yan ti c'alal ta xtalic ti uni baquiquil chijetique, mu'yuc ta slaman ti cho'bil jich'il te'e. Jech o xal un, ti baquiquil chijetique, ja' yu'untac ti Labane. Yan ti jubemal chijetique, ja' yu'untac ti Jacobe.

⁴³Ja' jech s'elan lic pasuc ta jun muc' ta jc'ulej ti Jacobe. Epaj ti xchije, ti scamellotaque, ti sburrotaque, xchi'uc oy ep smosovtac, viniquetic, antsetic.