Read Tzotzil Génesis 32 Bible Online

Génesis 32 - Tzotzil bible

Génesis 32

¹Jech ti Jacobe laj stam batel sbe. Tal nupatuc ta be yu'un yaj'ánjeltac ti Diose.

²C'alal laj yil ti Jacobe, xi laj yale: “Le'e, ja' xa yajsoldadotac ti Diose.” Jech o xal ti bu taje, laj yac'be sbiin Mahanaim.[25]

³Va'i un, ti Jacobe laj stac jelavel jun chib yaj'al-mantaltac ta Seir banomile, ti ja' yosil ti Edome, yo' jech ta xalbeic ya'i ti Esaú ta xa xc'ot ti xchi'il ta voq'uele,

⁴ti xi s'elan laj xchapbe ya'i c'u s'elan ta xc'ot yalique: “Xi xc'ot avalbeic ya'i ti jchi'il ta voq'uel Esaue: ‘Ti achi'il ta voq'uel Jacobe, xi s'elan ti mantal quich'ojcutic talel yu'un ti tal calbotcutique: Ti c'u sjalil ch'abalune, ja' jchi'inoj ta naclej ti Labane.

⁵Avi tana une, oy xa jvacax, oy jburro, oy jchij, oy jmosovtac, viniquetic xchi'uc antsetic. Ti jech laj jcaj-tac jelavel talel ti mantale, yojtot, ja' xa no'ox ta jmala ca'i c'uxi avo'nton cu'un.’ ”

⁶C'alal sutic batel ti j'al-mantal j'ich'-c'opetique, xi laj yalbeic ya'i ti Jacobe: —Ay xa jc'oponcutic ti achi'il ta voq'uel Esaue. Ja' stuc xtal snupot ta be xchi'uc jvoc' (400) ta vo' svinictac.

⁷C'alal jech laj ya'i ti Jacob taje, ep lic xi'uc. Lic ta vul o'nton xchi'uc. Ja' yu'un un, lic spas ta cha'ch'ac ti svinictac xchi'ucanojan batele, xchi'uc ti xchije, ti xvacaxe, ti scamelloe.

⁸Yu'un xi laj snope: “Mi ta xtal tsacatuc ta c'op yu'un Esaú ti jvoq'ue, jech ti jvoq'ue xu' ta xjatav batel.”

⁹Ts'acal to un, xi lic c'opoj ti'inuque: “Cajval, Diosot yu'un ti jmuc'tot Abrahame, yu'un ti jtot Isaaque, laj avalbun ta xisut batel ta cosilal bu oyic ti cuts' calale. Laj avalbun ti xi to s'elan lec ta xc'ot ta pasel ta jtojole:

¹⁰Ti slequil yutsil avo'nton laj jta avu'une, mi ja'uc oy c'usi xu' xajtojbot. C'alal ech' jtuch' ti uc'um Jordane, c'ajomal jun jnamte' quich'oj batel. Avi tana une, pasem xa talel ta cha'voc' jchi'iltac.

¹¹¡Avocoluc, pojun me ta yoc ta sc'ob ti jchi'il ta voq'uel Esaue! Yu'un ta xixi' mi xvolet talel ta stsacun ta c'op, ta smilan ti antsetique xchi'uc ti ololetique.

¹²Yu'un avalojbun ta jamal ti lec ta xc'ot ta pasel ta jtojole. Avalojbun xtoc ta x'epaj ti jnitilultac jech c'u cha'al syi'al nab ti mu stac' atele.”

¹³Ta yac'ubalil taj une, jech ti Jacobe vay ti bu oye. Ti c'usi oy yu'une, xi s'elan lic st'ujujan yo' ta xac'be smoton ti Esaú ti xchi'il ta voq'uele:

¹⁴Laj st'uj lajunvinic (200) ta cot me' tentsunetic, jtob (20) ta cot tot tentsunetic, lajunvinic (200) ta cot me' chijetic, jtob (20) ta cot tot chijetic,

¹⁵lajuneb xcha'vinic (30) ta cot me' camelloetic xchi'uc snene' olic ti naca to voq'uemique, cha'vinic (40) ta cot me' vacaxetic, lajuncot (10) ch'iom tot vacaxetic, jtob (20) ta cot me' burroetic, xchi'uc lajuncot (10) tot burroetic.

¹⁶Ti jujuvoq'ue, laj xch'acanan loq'uel. Laj yac'be ti svinictaque. Ts'acal to un, xi laj yalbe: —Jelavanic batel. Svoc'ol voc' xavol abaic ech'el.

¹⁷Ti jvoc' laj stac ti jelavel to jba'bee, xi laj yalbe ti mantale: —Mi xi ta sjac'bot ti jbanquil Esaú c'alal ta xanup ta bee: “¿Buch'u ti avajvale? ¿Bu ta xabat? ¿Buch'u yu'un ti chon bolometic avic'ojan batele?”

¹⁸va'i un, xi xatac'bee: “Yojtot, Esaú, ja' la amoton stacojbot talel ti avajtunel Jacobe. Yu'un ti stuc eque, le' xtal ta patil cu'uncutique.”

¹⁹Ja' jech xtoc un, ti xcha'voc'ale, ti yox-voc'ale, xi laj yalbe batel scotol ti buch'utic smacojic batel ti chon bolometique: —Co'ol xaval ac'opic c'alal ta xanupic ta be ti Esaue.

²⁰Xi xavalbe ya'ie: “Ti avajtunel Jacobe, le' xtal ta jpatcutique.” Yu'un ti Jacobe xi laj snope: “Ja' lec ta jcaj-tac jelavel matanaletic yo' ta jlamajesbe ti sc'ac'al yo'ntone. Ts'acal to un, xu' ta jq'uelbe jba ti jsacutic xchi'uque. Ja' to nan jech ich'bil ta muc' ta xic'ot yu'un.”

²¹Ja' yu'un un, ti mantaletique, laj scajtac jelavel. Yan ti stuque ech' yu'un ac'ubal ti bu oye.

²²Yac'ubalil taj une, ti Jacobe lic xchapan sba. Laj yic' talel xchibal ti yajnile, ti sme' mosovtaque, xchi'uc ti buluchvo' squeremtaque. Va'i un, laj xtuch'ic jelavel yu'un ti spulpulil uc'um Jaboque.

²³Ma'uc no'ox taje, jmoj jelavic batel yu'un ti c'usi x'ayan yu'une.

²⁴Ti c'alal stuc xa com ti Jacobe, yich'oj sacub ta stsal sbaic ta leto xchi'uc ti co'ol s'elan vinic yilele.

²⁵Ti vinique laj yil ti mu stac' stsal ti Jacobe. Jech o xal un, laj stijbe ta majel ti sc'unil yo'e. Ja' to jech laj xyoch yip ti Jacob ti jech stsacoj sbaic ta letoe.

²⁶Va'i un, ti vinique xi laj yale: —Coltaun, yu'un ta xa sacub talel ti osile. Xi laj stac' ti Jacobe: —Mi mu xavac'bun quich' comel ti slequilal Diose, mu xajcoltaot.

²⁷Xi laj sjac' ti vinic taje: —¿C'usi abi? —Jacob jbi —xi laj stac' ti stuque.

²⁸Va'i un, ti vinique xi laj yale: —Ma'uc xa ta xabiin ti Jacobe. Ja' xa ta xabiin Israel.[26] Yu'un laj atsal abaic xchi'uc ti Diose, xchi'uc ti viniquetic xtoque, cuch ono'ox avu'un ava'uc un.

²⁹Xi laj sjac' ti Jacobe: —Albun ca'i, ¿c'usi abi ec un? Ti vinic une xi laj staq'ue: —¿C'u cha'al ta xajac'bun c'usi ti jbie? Va'i un, ti vinique laj yac'be comel yich' slequilal Dios ti bu oy taje.

³⁰Ja' yu'un un, ti Jacobe, Penuel laj yac'be sbi ti bu taje.[27] Yu'un xi laj yale: “Laj quilbe jba jsatcutic xchi'uc ti Diose. Ac'o mi jech un, li' to cuxulun ya'yele.”

³¹C'alal ta xa xjelav batel ta Penuel ti Jacobe, loc' xa talel ti c'ac'ale. Xcojcun xa batel ta scoj ti majbil sc'unil yo'e.

³²Jech o xal un, snitilultac ti Israele, jech to sna'ojic avi tana li'e mu ti'baj ta xa'iic xch'uxuvil yo'tac ti chon bolometique, yu'un ti bu taje, majbat ti Jacobe.