Read Tzotzil Génesis 33 Bible Online

Génesis 33 - Tzotzil bible

Génesis 33

¹C'alal laj yil ti Jacob stsobetic xa talel Esaú xchi'uc ti jvoc' (400) ta vo' svinictaque, laj xch'acanan batel ti ololetic c'u yepal yu'un ti Leae, ti Raquele, xchi'uc yolic ti chib me' mosoviletique.

²Ja' laj yac' ta jba'be ti me' mosoviletic xchi'uc ti yalabique. Laj xtoc un, laj snaban batel ta patil ti Leae xchi'uc ti yalabtaque. Ta slajeb un, laj snaban batel ti Raquele xchi'uc ti Josee.

³Jech ti Jacobe jelav batel. Snupilan xa banomil laj squejan sba batel vucub velta, ja' to ti c'uxi c'ot ta sts'el ti xchi'il ta voq'uele.

⁴Va'i un, ti Esaue bat snup ta be ta anil. Laj smey. Laj sbajbe spat. Laj sbuts'. Co'ol oc' xchibalic.

⁵Ts'acal to un, ti Esaue laj yil ti oy antsetic xchi'uc ti ololetique. Xi laj sjaq'ue: —Le'e, ¿buch'utic? Xi laj stac' ti Jacobe: —Ja' xnich'nabtac ti avajtunel ac'bat yu'un ti Diose.

⁶Jech ti me' mosoviletique xchi'uc ti yalabique nopajic batel. Snupilan xa banomil c'ot squejan sbaic.

⁷Ts'acal to un, nopaj batel ti Lea xchi'uc ti yalabtaque. Lic squejan sbaic xnupuletic xa c'otel ec. Ta slajeb un, nopaj batel ti Josee xchi'uc ti Raquele. Lic squejan sbaic xnupuletic xa c'otel ec.

⁸Va'i un, ti Esaue ta ora no'ox xi laj sjaq'ue: —¿C'usi smelol avu'un ti jech yepal c'usitic laj jnupan ta bee? Xi laj stac' ti Jacobe: —Ja' ta sventa ac'o lecubuc avo'nton ta jtojol.

⁹Xi laj stac' ti Esaue: —Mo'oj unbi, cuni chi'il ta voq'uel, mu jc'an. Yu'un ti vu'un eque, oy ep cu'un. Ja' yu'un, q'uelo tuc'ulano atuc ti c'usitic ja' avu'une.

¹⁰Ja' no'ox un, ti Jacobe xi mu xlaj yo'nton ta vulvunele: —Mu xapas jech, avocoluc, ich'bun ti amotone yo' jech ta jta ti lec xquil jbatique. Ja' yu'un un, tsacbun ti amoton ta xcac'bote. Yu'un ti jech laj quil asate, co'ol s'elan ja' laj quil stuc ti Dios ya'yele, ja' ti lec ich'bil ta muc' lic'ot avu'une.

¹¹Jech o xal un, avocoluc, tsacbun ich'bun ti amoton quich'ojbot talele. Yu'un ti Diose laj spasun ta jc'ulej ti jech oy cu'une. Ti jech mu xlaj yo'nton ta vocoletel ti Jacobe, jech o xal ti Esaue laj stsac ti matanale.

¹²Ja' yu'un un, xi laj yale: —Lec oy un cha'e, jtam batel jbetic. Vu'un ta xijelav ta jba'be avu'unic —xi.

¹³Va'i un, ti Jacobe xi laj staq'ue: —Cuni chi'il ta voq'uel, xana' lec, ti ololetique mu'yuc to yipal yu'unic. Yu'un sc'an ta jnop lec xtoc ta sventa ti chijetique, xchi'uc ti me' vacaxetic oy yolique. Yu'un mi lubtsajic ta bee, xu' ta xchamic ta jun no'ox c'ac'al scotol ti chijetique.

¹⁴Ja' lec, jelavan batel. Ti vu'une ja' ta xcoquinbe talel yoc ti jchijtaque, ti ololetic ti xc'uletic batel ta jba'be cu'une. Ja' to ta xc'ot jtaot ta Seir.

¹⁵—Jechuc —xi laj stac' ti Esaue—. Mi xu' xava'ie, ta jcomtsanbot jayibuc jvinictac ti xchi'inojun talele. Ja' no'ox un, ti Jacobe xi laj staq'ue: —¡Mo'oj, avocoluc! ¿C'u cha'al ta xavich' avocol cu'un?

¹⁶Ti jech c'ac'al taje, sut batel ta Seir ti Esaue.

¹⁷Yan ti Jacobe bat ta Sucot. Laj smeltsan sna, xchi'uc laj smeltsanbe lambil yanal te' yaxib ti chon bolometic yu'une. Jech o xal ti bu taje, laj yac'be sbiin Sucot.[28]

¹⁸Va'i un, ti Jacobe mu'yuc c'usi laj snuptan, lec c'ot ta Canaán c'alal loc' batel ta Padán-aram. Laj slaman sba ta yeloval jteclum Siquem.

¹⁹Laj sman jsep osil ti laj stoj vo'vinic (100) ta sep taq'uine, ti ja' laj smanbe xnich'nabtac ti Hamore, stot ti Siqueme. Laj smeltsan yaxibalna.

²⁰Ts'acal to un, laj sva'an jun altar, laj yac'be sbi El-elohé-israel.[29]