Read Tzotzil Génesis 34 Bible Online

Génesis 34 - Tzotzil bible

Génesis 34

¹Ti Dina ti ja' stsebic ti Jacob xchi'uc ti Leae, oy bu laj yac' sjol ti loc' batel ta svu'lanel tsebetic ti bu nacalique.

²Ilat yu'un ti Siqueme, ti ja' squerem nich'on ti heveo vinic Hamor ti banquilal jtsobvanej yu'unic ti bu taje. Ti Siqueme laj stsatsal jis ta lum, laj yilbajin ti tsebe.

³Ac'o mi jech laj spasbe un, j'ech'el ic'bil c'ot xch'ulel xchi'uc. Jech o xal laj yac'be yipal c'u s'elan xu' ta xu'ninbe ti yo'ntone.

⁴Ja' yu'un un, xi lic yalbe ti Hamor ti stote: —Ba jac'bun ti tseb le'e, yu'un ta xquic' ca'i.

⁵Ti Jacobe laj ya'i ti ilbajinbat yu'un Siquem ti Dina ti ja' stsebe. Ja' no'ox un, mu'yuc c'usi laj yal, yu'un loq'uemic to ta sq'uelel xchijic ti squeremtaque. Ja' to lic yal ti c'alal sutic talele.

⁶C'alal jech taj une, ti Hamor stot ti Siqueme, bat ta stojol ti Jacobe yo' ta xlo'ilaj lec xchi'uc.

⁷Va'i un, c'alal sutic talel ta q'uel chij squeremtac ti Jacobe, ja' to laj ya'iic c'usi c'otem ta pasel. Cap sjolic ta j'ech'el, yu'un muc'ul mulil ta xa'i ta sventa Israel ti ilbajinat yu'un Siquem stseb ti Jacobe, c'alal mu smeloluc jech ta xich' pasel.

⁸Ja' yu'un un, ti Hamore xi laj yal c'alal laj sc'oponane: —Ti jnich'on Siqueme, ja' snup xch'ulel ta xil ti achi'ilic ta voq'uele. Avocolicuc, ac'o ave ati'ic ti ac'o yiq'ue.

⁹Cuts' calalin jbatic yo' xu' ta xquic'cutic ti atsebique. Ja' jech ti vo'oxuque xu' xaviq'uic ti jtsebcutique.

¹⁰Comanic, jchi'in jbatic ta naclej li'e. Ti jteclum li'e, ja' alumalic. Paso abolomalic. Manic abanomilic.

¹¹Va'i xtoc un, ti Siquem eque xi laj yalbe ya'i stot xchi'uc xchi'iltac ta voq'uel ti Dinae: —Avocolicuc, c'uxubinuncutic. Ta xcac' ti c'u yepal ta xac'anique.

¹²Mu labaluc xca'i. Ac'o mi x'ech' to ta jtoj jech c'u cha'al ti c'u s'elan liquem ono'ox cu'uncutic ti matanale, ja' lec ac'beicun xch'a quic' ti tsebe. Ta xcac'boxuc ep amotonic.

¹³Ac'o mi jech taj une, yu'un ti Siqueme yilbajinoj xa ti Dinae, jech o xal xnich'nabtac ti Jacobe, q'uelbil xa no'ox sat yu'unic ti c'u s'elan laj stac'beic ti Siqueme xchi'uc ti Hamor ti ja' stote.

¹⁴Ja' yu'un un, xi laj yalique: —Mu xu' ta xcac'becutic yic' quixlelcutic jun vinic ti mu'yuc yich'oj ti circuncisione. Yu'un mi jeche, toj q'uexlal sba ta xca'icutic.

¹⁵Ja' no'ox xu' ta jch'uncutic mi ta xavac' aveic ta spasel jech c'u cha'al li'e: C'otanic jech c'u cha'al ti vu'uncutique. Ti lec xcaltique, ta xich'ic circuncisión scotol ti viniquetic ta biq'uit muc' ti oy ta atojolique.

¹⁶Ja' to jech unbi, xu' xaviq'uic ti jtsebcutique. Jech ti vu'uncutique xu' xquic'cutic ti atsebique. Ta xinaquicutic li' ta atojolique. Jun jlumaltic ta xc'ot unbi.

¹⁷Ja' no'ox un, mi mu lecuc ta xava'i ta xavich'ic ti circuncisione, ta xiloc'cutic batel ti li' ta alumalique. Ta xquic'cutic batel ti quixlelcutique.

¹⁸Va'i un, ti Hamore xchi'uc ti Siquem ti ja' xnich'one, lec laj ya'iic ti va'i s'elan albatique.

¹⁹Mu'yuc laj sjaliltasic. Ta ora no'ox laj yich' circuncisión ti quereme, ja' ti juteb ta yo'nton ta stojol stseb ti Jacobe. Yu'un ti Siqueme ich'bil lec ta muc' yu'un svinictac ti stote.

²⁰Jech o xal un, ti Siqueme xchi'uc ti Hamor ti ja' stote, batic ta ochebal yu'un ti jteclume, bu ono'ox ta xchapluj ti lo'il a'yej yu'unique. Ti bu taje, xi lic yalbeic ti jnaclejetique:

²¹—Ti viniquetic li'e, c'ot xa ta uts' alal cu'untic. Ta xcomic ta naclej li'e, xu' ta xbolomajic liquel. Yu'un oy to ep banomil cu'untic ti xu' ta xich'ique. Ja' yu'un un, ti vo'otique xu' xquic'betic ti yantsil nich'onique. Jech ti stuquique xu' ta xiq'uic ti cantsil nich'ontic eque.

²²Yo' ta xc'ot ta jun jlumaltic xchi'uque, ja' no'ox la jun yo'ntonic ta xcomic ta naclej ta jtojoltic ti mi xcac' quetic ta spasel jech c'u cha'al li'e: Scotolicuc, ac'o yich'ic circuncisión[30] ti viniquetic ta biq'uit muq'ue jech c'u cha'al liquem yu'un ti stuquique.

²³Scotol ti c'usi x'ayan yu'unique xchi'uc ti chon bolometique, ta la xc'ot ta co'ol cu'untic xchi'uc. Ja' no'ox mi ta xcaltic mi lec ta xca'itic ti va'i s'elan snopojique, jech ti stuquique ta xcom nacliicuc ta jtojoltic.

²⁴Scotol ti querem viniquetic ti nacalic ta jteclum ti sjabilal to ta xtunic ta soldadoile, toj c'otel ta yo'ntonic jech c'u cha'al oy ta yo'nton ti Hamor xchi'uc ti Siquem ti ja' xnich'one. Ja' yu'un un, scotolic laj yich'ic ti circuncisione.

²⁵Ja'uc le' une, ti Simeone xchi'uc ti Levie, xnich'nabtac ti Jacobe, sbanquiltac ti Dinae, c'alal sta yoxibal c'ac'ale, batic ta jteclum c'alal yorail to ta xa'ibeic yipal xc'uxul laj yich'ic circuncisión ti viniquetique. Laj smilic ta espada scotol. Mu'yuc c'usi yut laj spoj sbaic.

²⁶Ja' jech ti Hamor xchi'uc ti Siquem ti ja' xnich'one, espada ve' yu'unic ec. Ts'acal to un, bat sloq'uesic talel ti Dina ti oy ta sna ti Siqueme, batic.

²⁷Ti yan xnich'nabtac Jacobe c'otic ta jteclum ec, xc'uletic no'ox ta x'ech'ic ta sba ti animaetic ta xchajel ta sa'el ti c'usi x'ayan yu'un ti jteclume, yo' jech ta sloq'ues sc'ac'alic ti ilbajinat ti yixlelique.

²⁸Ja' yu'un un, laj yiq'uic batel ti chijetique, ti vacaxetique, ti burroetique, xchi'uc scotol ti c'usi oy yu'un ti jteclume, xchi'uc ti c'usitic x'ayan ta osile.

²⁹Laj yelc'anic batel scotol ti c'usitic x'ayan ta naetique. Laj sbeq'uic batel ti ololetique, ti antsetique.

³⁰Ja' yu'un un, ti Jacobe xi laj yalbe ti Simeone xchi'uc ti Levie: —Ti vo'oxuque laj xa avaq'uicun ta vocol. Avi tana une, ti jnaclejetic li'e, ti cananeoetique, xchi'uc ti ferezeoetique, ta xlic capuc sjolic. Ta stsob sbaic ta scontrainelun, ta xistsaquicun ta leto. Ti jech mu'yuc ep ti jvinictaque, ta xismilicun, ta xlajic ec ti c'u yepal oy ta jtojole.

³¹Va'i un, ti stuquique xi laj staq'uique: —¿Mi yu'un q'uelbilic no'ox ya'yel laj sjoybinic ta jun jmulivajel ants ti quixlelcutique?