Read Tzotzil Génesis 35 Bible Online

Génesis 35 - Tzotzil bible

Génesis 35

¹Ti Diose xi laj yalbe ti Jacobe: “Chapano aba. Bat naclan ta Betel. Ti bu taje, xameltsan jun altar bu laj yac' sba iluc ti Dios c'alal loq'uemot ta jatvil yu'un ti abanquil Esaue.”

²Va'i un, ti Jacobe xi laj yalbe ya'i ti c'u yepalic ta nacleje xchi'uc scotol ti c'u yepal oy ta stojole: —Loq'uesic scotol ti jnabel diosetic ti c'u yepal oy avu'unique. Atinanic, jeltao lec ac'u'ic.

³Batic ta ora ta Betel. Yu'un ti bu taje, ta jmeltsan jun altar ti ja' yich'obil ta muc' ti Dios laj scoltaun ti c'alal oyun ta vocole. Yu'un ja' laj xchi'inun ti bu yalel muyelune.

⁴Jech ti stuquique laj yac'beic ta sc'ob Jacob scotol ti jnabel diosetique xchi'uc ti taq'uinal chiquinaletic ti joc'ajtic ta xchiquinique. Jech ti Jacobe laj smuc ta yoc jpets tulan ta nopol Siquem.

⁵Ti c'alal loq'uic batele, scotol ti jteclumetic c'u yepal joyole, ac'batic ep xi'el yu'un ti Diose. Jech o xal mu'yuc xbat slubiic ta be ti Jacob xchi'uc ti xnich'nabe.

⁶Ti Jacobe xchi'uc ti c'u yepal xchi'inoj batele, c'otic ta jteclum Luz ti sbiinoj Betel xtoc ti oy ta Canaane.

⁷Va'i un, laj smeltsan jun altar. Ti bu taje, El-betel,[31] laj yac'be sbi, yu'un laj yac' sba iluc Dios ta stojol c'alal ja' o loq'uem ta jatavil ta stojol ti sbanquile.

⁸Ti bu taje, cham xtoc ti Débora jun ants sbainoj ta sq'uelel ti Rebecae. Laj smuquic ta yoc jpets tulan ti nopol xa Betele. Ti bu taje, “Oq'uel ta yolon jpets tulan”, laj yac'be sbi ti Jacobe.

⁹C'alal loc' xa talel ta Padán-aram ti Jacobe, ti Diose laj yac' sba iluc ta stojol, laj xcha'ts'uiltas un.

¹⁰Va'i un, xi albat li'e: “Jacob ti abie, ja' no'ox un, ma'uc xa jech ta xabiin. Avi tana li'e, ja' xa ta xlic abiin Israel.” Ts'acal to un, c'alal jeltabat xa sbi yu'un ti Diose,

¹¹xi albate: “Vu'un Diosun ti scotol xu' cu'une; ta xcac' epajuc anich'nabtac xchi'uc anitilultac. Ta aventa vo'ot ta xlic ayanuc muc' ta lum xchi'uc epal jteclumetic, ta sventa ti anitilultaque, ta xlic ayanuc talel ajvaliletic.

¹²Yu'un ti banomil laj cac'be yich' ti Abrahame xchi'uc ti Isaaque, ta xcac'bot avich' ec. Ts'acal to un, ta xcac'be yich' ec ti anitilultaque.”

¹³C'alal bat ti Dios bu laj sc'opon sbaic xchi'uc ti Jacobe,

¹⁴jech ti stuque laj stam jbej ton, laj sva'an ta ts'unel jech c'u cha'al junuc oy bu laj sc'opon sba xchi'uc ti Diose. Laj taj une, lic sq'uebbe aceite xchi'uc vino ta sba.

¹⁵Betel, laj yac'be sbi xtoc ti bu taje.

¹⁶Ts'acal to un, loq'uic batel ti ta Betele. Nom nom to jutuc Efrata c'alal lic xc'uxul xch'ut ti Raquel yo' ta xcuxe, jal sts'uyet xchi'uc ti svocole.

¹⁷Yu'un ti c'alal xbalet xchi'uc ti svocole, xi laj yal ti jvet'ome: “Tsotsan, mu xaxi', yu'un laj avilbe xa sat jcot aquerem.”

¹⁸Va'i un, ti jech ta xa xtuch' batel ti stuque, ta jic' o'nton xa, laj to sbiiltas Ben-oní[32] ti olole, ac'o mi Benjamín[33] biiltasat yu'un ti totile.

¹⁹Ja' jech c'ot ta pasel cham ti Raquele. Laj yich' muquel ta sbelel Efrata, ti Belén sbi avi tana li'e.

²⁰Jech ti Jacobe laj sva'anbe snail smucobbail ti bu mucul ti Raquele. Va'al to avi tana li'e, yu'un ta to xac' ta na'el ja' smuquinal ti Raquele.

²¹Jech ti Israele stam batel sbe. C'ot slaman sba ta yeloval luchlebal q'uelob osil yu'un Edar.

²²C'alal naqui o ti Israel ti bu taje, jech ti Rubene vay xchi'uc ti Bilha ti sts'acal ajnil ti stote. C'alal laj ya'i taje, toj ep soc sjol yu'un. Xnich'nabtac ti Jacobe, ja' lajcha'vo' ta scotol.

²³Ti laj yil xchi'uc ti Leae, ja'ic ti Rubén ti sbanquilal nich'one, ti Simeone, ti Levie, ti Isacare, ti Judae, ti Zabulone.

²⁴Yan ti laj yilic xchi'uc ti Raquele, ja'ic ti Josee xchi'uc ti Benjamine.

²⁵Ti laj yilic xchi'uc ti Bilha smosov ti Raquele, ja'ic ti Dane xchi'uc ti Neftalie.

²⁶Ti laj yilic xchi'uc ti Zilpa smosov ti Leae, ja'ic ti Gade xchi'uc ti Asere. Ja' jech yepal xnich'nab ti Jacobe, voq'uic talel ta Padán-aram.

²⁷Ti Jacobe bat sq'uel ti Isaac ti stot nacal ta Mamree, ti sbiinoj Arba jteclume. Ti yan sbi xtoque, Hebrón, ti bu naquiic ti Abrahame xchi'uc ti Isaaque.

²⁸C'alal cham ti Isaaque, yich'oj xa balunvinic (180) jabil.

²⁹Yu'un bat stsob sbaic xchi'uc ti smolmuc'totac ti c'alal laj xa yil ti ch'iel c'opojele. Mucat yu'un ti xnich'nabe, ja'ic ti Esaue xchi'uc ti Jacobe.