Read Tzotzil Génesis 36 Bible Online

Génesis 36 - Tzotzil bible

Génesis 36

¹Li'e, ja' snitilultac ti Esaue, ti Edom ti yan sbi xtoque.

²Xi s'elan laj yic'anan antsetic ti Esaú ta Canaane: ti Ada yantsil nich'on ti Elón ti hititae; ti Oholibama yantsil ol ti Anae, ti smom ti Sibón ti heveoe;

³ti Basemate, yantsil nich'on ti Ismaele, xchi'il ta voq'uel ti Nabaiote.

⁴Ti Adae laj yilbe sat squerem yu'un ti Esaue, i Elifaze. Ti laj yilic xchi'uc ti Basemate, ti Reuele.

⁵Ti laj yil xchi'uc ti Oholibamae, ti Jeuse, ti Jaalame, ti Coree. Ja' jech yepal laj voc'uc xnich'nab Esaú c'alal nacal to ox ta Canaán banomil.

⁶Ti Esaue laj stsob ti yajniltaque, ti xnich'nabtaque, ti yantsiquil nich'nabtaque, scotol ti c'u yepal oy ta snae, yo' jech ta xch'ac sba loq'uel ta stojol ti Jacob ti xchi'il ta voq'uele. Yu'un laj stsob batel ti jaylajun-tos chon bolometic oy yu'une, xchi'uc scotol ti c'usi x'ayan yu'un ti laj sta ta Canaane.

⁷Yu'un ti xchibalique, mu albajuc yepal ti c'usi x'ayan yu'unique, mi ja'uc xa xu' yu'unic ti jmoj ta svol sbaic ta nacleje. Yu'un ta banomil bu oyic, mi ja'uc xa xloc' o sve'el ti chon bolometique.

⁸Jech o xal ti Esaue, ti Edom ti yan sbi xtoque, bat nacluc ta stuq'uil muc' ta vitstic oy ta yosilal Seir.

⁹Li'e, ja' snitilultac ti Esaue, ti mol muc'totil yu'unic ti edomitaetique, ti nacalic ta muc'tiquil vitstic oy ta yosilal Seire.

¹⁰Xi s'elan sbitac xnich'nabtac ti Esaue: Ti Elifaze, ja' xnich'on ti Esaú laj xchi'in yu'un ti Adae. Ti Reuele, xnich'on ti Esaú laj xchi'in yu'un ti Basemate.

¹¹Xnich'nabtac ti Elifaze, ja' ti Temane, ti Omare, ti Zefoe, ti Gatame, ti Quenaze.

¹²Ti Elifaze laj yic' sts'acal ajnil Timna ti sbie. Laj yil jun yol yu'un. Laj yac'be sbi Amalec. Taje, ja' smamobtac ti Adae, yajnil xtoc ti Esaue.

¹³Yan xnich'nabtac ti Reuele, ja'ic ti Nahate, ti Zerae, ti Samae, ti Mizae. Taje, ja' smamobtac ti Basemate, yan yajnil ti Esaue.

¹⁴Ti yan ants laj yic' xtoc ti Esaue, ti Oholibama sbie, yantsil ol ti Anae. Ti Oholibamae, smom xtoc ti Zibeone. Laj yil yol yu'un, ja' ti Jeuse, ti Jaalame, xchi'uc ti Coree.

¹⁵Snitilultac Esaú ti c'otic ta banquilal jtsobvanejetique, xi s'elane: Ta sventa snitilultac ti Elifaz sbanquilal nich'on ti Esaú ti c'otic ta banquilaletique, ja' ti Temane, ti Omare, ti Zefoe, ti Quenaze,

¹⁶ti Coree, ti Gatame, xchi'uc ti Amaleque. Taje, banquilaletic c'otic ti lic talel sts'unubalic ta stojol ti Elifaze ti oy ta Edom banomile. Scotolic taje, ja' snitilultac ti Adae.

¹⁷Ta sventa xnich'nabtac ti Reuel xnich'on ti Esaue, ja' c'ot ta banquilaletic ti Nahate, ti Zerae, ti Samae, ti Mizae. Taje, c'otic ta banquilaletic c'alal oyic ta Edom banomil ti lic talel sts'unubalic ta stojol ti Reuele. Ja' smamobtac ti Basemate, yajnil ti Esaue.

¹⁸Ta sventa yalabtac ti Oholibama, yantsil ol ti Anae, yajnil xtoc ti Esaue, ja' c'ot ta banquilaletic ti Jeuse, ti Jaalame, ti Coree.

¹⁹Scotolic taje, ja' snitilultac ti Esaue, Edom ti yan sbi xtoque, ja' banquilal jtsobvanejetic yu'unic ti jujuvoq'ue.

²⁰Xnich'nabtac ti Seir ti horeo vinic nacalic ti bu taje, ja'ic ti Lotane, ti Sobale, ti Zibeone, ti Anae,

²¹ti Disone, ti Ezere, ti Disane. Taje, ja' c'otic ta banquilal jtsobvanejetic yu'un ti horeoetique, ja' snitilultac ti Seir nacalic ta Edom banomile.

²²Xnich'nabtac ti Lotane, ja' ti Horie xchi'uc ti Hemame. Ti Timnae, xchi'il ta voq'uel ti Lotane.

²³Xnich'nab ti Sobale, ja' ti Alvane, ti Manáhate, ti Ebale, ti Sefoe, ti Oname.

²⁴Xnich'nab ti Zibeone, ja' ti Ajae xchi'uc ti Anae. Ti Aná taje, ja' ti buch'u laj sta sat vo' ta sbajtical banomil c'alal ja' o yacal ta sq'uelbe sburro ti stote, ti Zibeón sbie.

²⁵Ti Anae laj yil jun yol. Laj yac'be sbi Disón. Laj yil xtoc jun stseb ti laj yac'be sbi Oholibamae.

²⁶Xnich'nab ti Disone, ja' ti Hemdane, ti Esbane, ti Itrane, ti Querane.

²⁷Xnich'nab ti Ezere, ja' ti Bilhane, ti Zaavane, ti Acane.

²⁸Xnich'nab ti Disane, ja' ti Uze xchi'uc ti Arane.

²⁹Ti c'otic ta banquilaletic yu'unic ti horeoetique, ja' ti Lotane, ti Sobale, ti Zibeone, ti Anae,

³⁰ti Disone, ti Ezere, ti Disane. Taje, naca banquilaletic yu'un ti horeoetique, ti jujuchop nacalic ta yosilal ti Seire.

³¹C'alal mu'yuc to ox sva'anojic ajvalil ti israeletique, xi s'elan ochemic ta pas mantal ajvaliletic ta Edom lume:

³²Ti Bela ti xnich'on ti Beore, och ta ajvalil ta Edom. Sbi ti steclumale, ja' Dinhaba.

³³C'alal cham ti Belae, ja' och xq'uexol ta ajvalilal ti Jobab xnich'on ti Zerae. Ti Jobabe liquem talel ta jteclum Bosra.

³⁴C'alal cham ti Jobabe, ja' och xq'uexol ta ajvalilal ti Husame, liquem talel ta yosilal Teman.

³⁵C'alal cham ti Husame, ja' och xq'uexol ta ajvalilal ti Hadad xnich'on ti Bedade, ja' laj stsal ti Madián oy ta yosilal Moabe. Sbi ti steclumal xtoque, ja' Avit.

³⁶C'alal cham ti Hadade, ja' och xq'uexol ta ajvalilal ti Samlae, ti liquem talel ta jteclum Masrecae.

³⁷C'alal cham ti Samlae, ja' och xq'uexol ta ajvalilal ti Saule, liquem talel ta jteclum Rehobot oy ta ti' uc'um.

³⁸C'alal cham ti Saule, ja' och xq'uexol ta ajvalilal ti Baal-hanane, xnich'on ti Acbore.

³⁹C'alal cham ti Baal-hanane, ja' och ta xq'uexol ta ajvalilal ti Hadade. Pau sbi ti jteclum bu liquem talel.

⁴⁰Sbitac ti jujuchop snitilultac Esaú ti laj ech'icuque, xi s'elane: ti Timnae ti Alvae ti Jetete ti Oholibamae ti Elae ti Pinone ti Quenaze ti Temane ti Mibsare ti Magdiele ti Irame. Yu'un ti Esaue laj sbiin Edom xtoc. Jech o xal ti snitilultac taj une, c'otic ta banquilaletic yu'un ti edometique. Sbi ti banomil bu nacalic ti jujuchope, co'ol s'elan jech c'u cha'al sbiic ti jujunique.