Read Tzotzil Génesis 37 Bible Online

Génesis 37 - Tzotzil bible

Génesis 37

¹Ti Jacobe com nacluc ta Canaán bu naqui to ox c'uc sjalil ti stote.

²Avi li'e, ja' sc'oplal ya'yejal snitilultac ti Jacobe. C'alal yich'oj xa vuclajuneb (17) jabil ti Josee, jmoj ta xchi'in sbaic ta q'uel chij xchi'uc ti sbanquiltaque, yolic ti Bilhae xchi'uc ti Zilpae, sts'acal ajniltac ti stote. Va'i un, ti Josee ta xc'ot sc'an parte ta stojol stot ti oy c'usi mu lecuc ta spasic ti sbanquiltaque.

³Stuc no'ox José ti lec c'uxbinbil yu'un ti Israele, ja' mu sta ti yan xnich'nabe, yu'un ta smolil xa ox c'alal voq'ue. Ja' yu'un un, jun yutsil jlic yuni c'u' laj yac'be ta meltsanel.

⁴C'alal jech laj yilic ti xchi'iltac ta voq'uel ti stuc no'ox lec c'uxubinbile, ti mu jechuc c'uxubinbilic scotolic ti stuquique, lic sc'ac'al yo'nton ta yilintael, mi ja'uc xa sc'oponic jutebuc.

⁵Oy bu vaichinaj ti Josee. Ja' yu'un un, laj yalbe ya'i ti sbanquiltaque. Ja' no'ox un, ti stuquique cap sjolic, lic scontrainic ta j'ech'el.

⁶Yu'un xi lic yale: —A'yio ava'iic, ta jchap talel cuni vaich ti c'usi laj quile.

⁷Ti jvaich laj quile, yacalotic ta spasel ta jujuchuc trigo jcotoltic ta osil. Jech ti jchuc cu'une, ta ora no'ox tuc' laj sva'an sba. Jech ti avu'unic ti chucajtique, laj sjoy sbaic ta stojol ti jchuc cu'une, lic snijan sbaic.

⁸Va'i un, ti xchi'iltac ta voq'uele xi laj staq'uique: ¿Mi yu'un ta xavalbun ca'icutic ta xa'och ta ajvalil yo' jech ta xapasuncutic ta mantale? Ja' yu'un ech'em no'ox lic sc'ac'al yo'ntonic ta stojol ta scoj ti va'i s'elan laj xchap ti xvaiche.

⁹Laj taj une, laj to yil yan xvaich ta ts'acal ti Josee. Ja' yu'un un, xi laj yalbe ya'i ti sbanquiltaque: —¿Mi xana'ic, livaichinaj no'ox xtoc? Laj quil ta jvaich ti c'ac'ale, ti ue, xchi'uc buluchbej c'anal ti laj snijan sbaic ta yich'elun ta muq'ue.

¹⁰C'alal laj xchapbe ya'i stot xchi'uc xchi'iltac ta voq'uel xvaich ti Josee, xi tac'bat yu'un ti stote: —¿C'usi ta xavac' ta na'el xchi'uc ti avaich ti laj avile? ¿Mi yu'un xavac'touc ta jnijan jchiman jbacutic ta atojol xchi'uc ti ame'e, xchi'uc ti achi'iltac ta voq'uele?

¹¹Ja' yu'un un, it'ix x'a'yiat yu'un ti xchi'iltac ta voq'uele. Yan ti stote ta snopilan no'ox ti va'i s'elan taje.

¹²Oy jun c'ac'al, sbanquiltac ti Josee batic ta Siquem. Ba sa'beic bu oy lec sve'el xchijtac ti stote.

¹³Jech ti Israele xi laj yalbe ya'i ti Josee: —A'yio ava'i, ti achi'iltac ta voq'uele batemic ta q'uel chij ta Siquem. Ta jc'an ti chbat aq'uele. Xi laj stac' ti Josee: —Lec chca'i ti chbat jq'uele.

¹⁴Xi laj stac' ti Israele: —Lec oy un cha'e, batan, ba q'uelo c'u s'elan ti achi'iltac ta voq'uele, xchi'uc c'u s'elan ti chijetique. Sutan no'ox me talel un yo' jech ta xca'i c'u s'elanic. Ti Israele laj stac batel ta stenlejtic Hebrón ti Josee. C'alal c'ot ta Siquem ti Josee,

¹⁵c'u stu un, ch'ay ta be stenlejal osiltic. Ja' o nupat ta be yu'un jun vinic ti xi jac'bate: —¿C'usi ta xasa'ilan?

¹⁶Xi laj stac' ti Josee: —Loq'uemun ta sa'el jchi'iltac ta voq'uel. ¿Mi xu' xavalbun ca'i mi oy bu laj avil ta sq'uel ti xchijique?

¹⁷Xi laj stac' ti vinique: —Li' to ox oyique. Ja' no'ox un, batic xa. Laj yalic ca'i ti ta xbatic ta Dotane. Jech ti Josee bat sa' ti xchi'iltac ta voq'uele, laj sta ta Dotán.

¹⁸Nom to ilat ti José yu'un ti xchi'iltac ta voq'uele. C'alal mu to ta xnopaj batel ti bu oyique, laj snop sc'opic ti ta smilique.

¹⁹Xi lic yalbe sbaic ta jujun tale: —Q'uel avilic, le' xtal ti uni jvaichinajele.

²⁰La'ic, la' jtsactic ta milel. Ts'acal to un, jiptic yalel ta jun joc'. Caltic ti laj ta ti'el yu'un junuc jti'oval chon. Jq'ueltic quic un, c'usi xal o ti yuni vaiche.

²¹C'alal laj ya'i Rubén ti va'i s'elan taje, xi laj yale, yu'un oy ta yo'nton ta spoj ya'i ti xchi'il ta voq'uele: —Ja' lec mu jmiltic.

²²Mu xamalic ti ch'ich'e, ba tiq'uic no'ox le' ta joc' li' ta sbajtical banomile, mu xats'ile ac'obic ta stojol. Ja' jech laj yal ti Rubene, yu'un ta spoj ya'i ti Josee yo' jech ta xcha'sut batel ta stojol ti stote.

²³Va'i un, c'alal c'ot ti José ti bu oyic ti xchi'iltac ta voq'uele, laj sloc'beic ti sc'u' slapoj batele.

²⁴Laj stsaquic. Laj sjipic ochel ta taquin xocol joc'.

²⁵Ts'acal to un, lic chotiicuc ta ve'el. C'alal jech yacalique, ja' o laj yilic ti stsobetic batel ismaelitaetic ti liquemic talel ta Galaad ti xcuchojic batel ta scamelloic ti xuch'al te'etic ti ja' perfumee, ti bálsamo sbie, ti mirrae. Yu'un ta xich'ic batel ta Egipto.

²⁶Va'i un, ti Judae xi laj yalbe ya'i ti xchi'iltac ta voq'uele: —¿C'usi ta jtatic o yu'un ti ta jmiltic ti quits'intique, ti ts'ijilotic no'ox yu'un ti xchame?

²⁷Ja' lec, la' jchontic batel ta stojolic ti ismaelitaetique. Altic ta jmiltic, yu'un mu yanuc, ja' jchi'iltic ta voq'uel. Lec laj ya'iic scotolic ti jech laj yale.

²⁸C'alal ech'ic ti jbolomajel madianitaetic bu oyique, loq'uesat talel ta joc' ti José yu'un ti xchi'iltac ta voq'uele. Jtob (20) ta sep plata taq'uin laj xchonic batel ta stojol ti ismaelitaetique. Ja' jech ic'bil bat ta Egipto ti Josee.

²⁹C'alal sut batel ti Rubén ti bu oy ti joq'ue, ch'abal xa tiq'uil ti José laj sta ti bu taje. Lic xch'i' ta jatel ti sc'u'e, svinajeb mu xa xnel ta xa'i ti vul o'ntone.

³⁰Ts'acal to un, sut batel bu oyic ti xchi'iltac ta voq'uele, ti xi laj yale: —Ti quereme ch'abal xa. ¿C'usi ta jpastic tana un?

³¹Jech ti yane laj stsacbeic sc'u' ti Josee. Lic sbonbeic ta xch'ich'el tentsun ti laj smilique.

³²Ts'acal to un, xi laj stacbeic batel mantal ti stotique: “Laj jtacutic li'e. Q'uelo quic lec, mi ja' sc'u', mi ma'uc sc'u' ti anich'one.”

³³C'alal laj yojtiquin ti Jacobe, xi laj yale: “Ja' sc'u' ti jnich'one. Tey nan c'usi te'tical chon bolomal laj o, ti lilinat ta ti'el yu'une.”

³⁴Va'i un, ti Jacobe laj xch'i' ta jatel ti sc'u'e. Lic slap at o'ntonal c'u'il. Ep c'ac'al laj yoq'uita. Mu xch'ay ta yo'nton cham ti xnich'one.

³⁵Ac'o mi ta xpatbat yo'nton yu'un ti squerem stsebtaque, ja' no'ox un, ti stuque mu sc'an patbel yo'nton. Yu'un xi x'oc'olet ta sventa ti xnich'one: “Oyun o ta at o'nton ti c'u sjalil cuxulune. Ja' to ta x'ech' mi ba jta bu oy ti anima jnich'one.”

³⁶Va'i un, ti madianitaetic ta Egiptoe, laj xchonic batel ti José ta stojol jun vinic Potifar sbie, yajtunel ti faraón ajvalil yu'un ti Egiptoe, xchi'uc xtoc ti ja' jpas-mantal yu'un ti yajchabivanej soldadoetique.