Read Tzotzil Génesis 39 Bible Online

Génesis 39 - Tzotzil bible

Génesis 39

¹C'alal ic'bil bat ti José ta Egipto banomile, jech ti jun egipcio vinic Potifar sbie, laj smanbe ismaelitaetic ti yic'ojic batel teye. Ti Potifar taje, ja' jun banquilal jtunel yu'un ti faraone, xchi'uc ja' jtsobvanej yu'un ti jvoc' yajsoldadoe.

²Ja' no'ox un, ti Josee chi'inbil yu'un ti Diose. Jech o xal lec bat yu'un c'alal nacal ta sna ti jun egipcio vinic ti ja' yajvale.

³Ti yajvale laj yil chi'inbil yu'un Dios ti Josee. Jech o xal ti Josee lec ta xbat yu'un scotol.

⁴Ti va'i s'elan c'otem ta stojol ti José taje, laj sta ti co'olaj sjol yo'ntonic xchi'uc ti yajvale. Laj yac' ochuc ta yajcoltaobba, xchi'uc xtoc laj yac'be sbain ti snae xchi'uc scotol ti c'usi oy yu'une.

⁵C'alal lic sbainbe sna Potifar ti Josee xchi'uc scotol ti c'usi x'ayan yu'une, laj sva'an sba ti Dios ta sna ti Potifare, xchi'uc ti c'usi oy yu'un ta yosile.

⁶Ti jech sbainoj José scotol ti c'usi oy yu'un ti Potifare, mu'yuc ta svul yo'nton c'u s'elan ta sta ti sve'ele. Ti Josee lec c'ac'al vinic. Toj c'upil sba ta q'uelel ta jmec.

⁷Va'i un, ta ts'acal to c'alal jalij xa teye, jech ti yajnil yajvale lic yac' sat ta stojol. Ja' yu'un un, oy jun c'ac'al xi laj yalbee: —La' vaycutic.

⁸Ti Josee mu lecuc laj ya'i yu'un ti xi laj stac'bee: —A'yio ava'i, ti jech li' oyune, mu'yuc c'usi xal yo'nton ti cajvale. Yu'un jbainoj scotol ti c'usi oy yu'une.

⁹Yu'un ti li' ta nae, mu'yuc buch'u yan ta spas mantal. Ti cajvale mu'yuc c'usi sjaltaojbun. Yan ti vo'ote yajnilot ti cajvale. ¿Mi xavac'touc lec ta xca'i avaloj xu' ta jsa' jmul ta stojol ti Diose?

¹⁰Ti antse ja' yeinoj jujun c'ac'al xvulvun ta stojol ti José ti vayicuque. Ja' no'ox un, ti Josee mu'yuc laj xch'un.

¹¹Oy jun c'ac'al, ti Josee och batel ta yut na bat abtejuc. Mi ja'uc junuc buch'u oy.

¹²Jech o xal ti antse nit xutbe sc'u' ti Josee, xi laj yalbee: —La', chi'inun ta vayel. Ja' no'ox un, ti Josee loc' batel ta anil, laj yicta comel sc'u' nitbil yu'un ti antse.

¹³C'alal laj yil ti ants ti c'ajomal xa sc'u' sjopoj comel ti loc' batel ta anil ti laj yicta comele,

¹⁴xi laj yalbe ti smosovtac laj yavta talel oy ta nae: —A'yio ava'iic, la'ic. Ti jmalale laj yic' talel jun hebreo vinique, ja' no'ox ta xijyilbajinotic. Och batel ti bu oyune. Ta ox xistsacun. Ti vu'une tsots li'avan.

¹⁵C'alal laj yil tsots li'avane, loc' batel ta anil. Laj yicta comel ti sc'u'e.

¹⁶Laj taj une, bat q'uejbatuc sc'u' ti José yu'un ti antse. Ja' to laj yac' iluc c'alal c'ot ti ajvalile.

¹⁷Va'i un, xi xchapet liquel jech c'u cha'al laj yal ono'ox ta ba'yele: —Ti mosovil hebreo vinic laj avic' talele, och batel ta jc'ol na ti bu oyune. Laj soc ye ta jtojol.

¹⁸C'alal laj yil tsots li'avane, loc' batel ta anil. Li' laj yicta comel ti sc'u'e.

¹⁹Ja' jech laj spasbun ti amosove. Yajval ti Josee toj ep soc sjol c'alal chapbat ya'i yu'un ti yajnile.

²⁰Ja' yu'un un, laj stsac ta chuquel ti Josee. Laj yal mantal ti ac'o ba yich' tiq'uel ta chuquinab bu tic'ajtic ti yan jchuqueletic yu'un ti ajvalile. Ac'o mi jech tiq'uil ta chuquel ti Josee,

²¹ja' no'ox un, chi'inbil yu'un ti Diose. Yu'un sva'anoj sba ta stojol yo' jech ta sta ti lec x'ilat yu'un ti banquilal jchabiej chuqueletique.

²²Jech o xal un, ac'bat comel ta sba ti jchuqueletique. Jech ti Josee ja' ta spasvan ta mantal ti c'usi sc'an pasel ta chuquinabe.

²³Jech ti banquilal jchabiej chuquinabe, mu xa sventauc ta sq'uel ti sventainoj ti Josee. Yu'un scotol ti c'usi ta spase, lec ta xloc' yu'un.