Read Tzotzil Génesis 40 Bible Online

Génesis 40 - Tzotzil bible

Génesis 40

¹Ech' ti va'i s'elan taje, jech ti jbainej-bise, ja' ti buch'u sbainoj ta scolbel yuch'bol ti ajvalile, xchi'uc ti jpaspan xtoque, laj soquesbeic yo'nton ti yajvalique, ti ajvalil yu'un Egiptoe.

²Jech o xal ti faraone, ti ajvalil xcaltique, ep soc sjol ta stojol ti chib j'abteletic taje, ti banquilal yu'un ti jbainej-bise, xchi'uc ti banquilal yu'un jpas-pane.

³Tacbil batic ta chuquel, ta sna ti banquilal jtsobvanej yu'un soldadoetic bu oy ti chuquinabe. Ja' ono'ox un, ti bu taje, tey tiq'uil ta chuquel ti Josee.

⁴Ti banquilal jpas-mantal yu'un soldadoetique, laj yac'be ta sc'ob José ti chib j'abteletique. Jech ti stuquique jalijic ta chuquel.

⁵Ti banquilal yu'un ti jbainej-bise xchi'uc ti banquilal yu'un jpaspane, oy jun ac'ubal vaichinajic ti xchibalique. Ja' no'ox un, slecoj smelol ti jujutos xvaichique.

⁶Ta yoc'omal un, bat q'uelaticuc yu'un ti Josee. Oyic xa ta vul o'nton taatic.

⁷Jech o xal xi jac'batique: —¿C'u cha'al toj yan o asatic sacub?

⁸Xi laj staq'uique: —Yu'un livaichinajcutic. Ja' no'ox un, mu'yuc buch'u xiyalbuncutic c'usi smelol ta xal ti jvaichcutique. Xi laj stac' ti Josee: —¿Mi mu ja'uc xu' svinajesbe smelol ti Diose? Alic ca'itic c'usi ti avaichique.

⁹Ti banquilal yu'unic ti jbainej-bise xi lic yal ti xvaich ta stojol ti Josee: —Ti ta jvaiche, laj quil jtec' uva.

¹⁰Yac'oj oxib sc'ob. Q'uelomajem. Yac'oj xnich. Jech ti xniche ta xjoybij ta jujubej sat toc'on uva.

¹¹Ti vu'une jtsacojbe sbis ti faraone. Ta jpits'be ti uva ta sbise. Jech ti sbise, ta xcac'be ta sc'ob ti faraone.

¹²Va'i un, ti Josee xi laj yalbee: —Ti avaiche, xi s'elan ta xal ti smelole: Ti oxib sc'ob laj avile, ja' smelol oxib c'ac'al.

¹³Ja' yu'un un, li' ta oxib c'ac'ale, ti faraone ta xchapan c'u s'elan ti ac'ope. Yan to velta ta xa'och yu'un ta yaj'abtel. Ta xabainbe ta yac'bel sbis ti faraone jech c'u cha'al laj apas to ox talele.

¹⁴C'alal jech ta xc'ot ta pasele, vulesun me ta avo'nton. Avocoluc, albun jc'oplal ta stojol ti faraone yo' jech ta xisloq'ues batel ti li' oyune. C'uxubajan cu'un.

¹⁵Yu'un ti vu'une, elc'anbilun talel ta yosilal hebreo. Yu'un jeche' no'ox li' tiq'uilun ta chuquele, mu'yuc jmul.

¹⁶Ti banquilal yu'un jpaspane, c'alal laj yil lec loc' yu'un smelol vaichil ti Josee, xi laj yalbee: —Ti jvaich vu'un eque, laj quil cajal ta jol oxib moch saquil pan.

¹⁷Ti moch cajal ta sbae, oy ep ta tos panetic ta sventa ta sve' ti faraone. Ja' no'ox un, tal sve' mutetic ti pan oy ta moch cajal ta jole.

¹⁸Va'i un, xi albat yu'un ti Josee: —Ti avaiche, xi s'elan ta xal ti smelole: Ti oxib moche, ja' smelol oxib c'ac'al.

¹⁹Ja' yu'un un, li' ta oxib c'ac'ale, ta xlic xchapan c'u s'elan ac'op ti faraone. Ta xavich' joc'anel ta te'. Ta sti'ot ti mutetique.

²⁰Ta yoxibal c'ac'al un, ja' o sc'ac'alil sq'uinal sjabilal ti faraone. Laj spas jun muc' ta q'uin xchi'uc scotol ti yaj'abteltaque. Laj yal mantal ti faraón ta sba ta sat ti jq'uel-q'uinetique, ti ac'o yich' loq'uesel talel ta chuquinab ti banquilal yu'un ti jbainej-bise, xchi'uc ti banquilal yu'un ti jpaspane.

²¹Ti banquilal yu'un ti jbainej-bise, ac'bat sbain yan velta ti yabtele. Jech ti stuque lic sbain ta yac'bel sbis ti faraone jech c'u cha'al ta ba'yel ono'oxe.

²²Yan ti banquilal yu'un jpaspane, chap sc'oplal ta xbat yich' joc'anel ta te' jech c'u cha'al albat yu'un ti Josee.

²³Manchuc mi jech, ti jbainej-bise mi jutebuc xa ta sta ta na'el ti Josee.