Read Tzotzil Génesis 45 Bible Online

Génesis 45 - Tzotzil bible

Génesis 45

¹Ti jech xtuch'et xa yo'nton ta xa'i ti Josee, ta sba ta sat scotol ti yajtuneltaque, xi tsots laj yalbee: “Loc'anic batel li'e.” Va'i un, mi junuc ti yajtuneltac tey oyic c'alal laj yac' sba ta ojtiquinel ta stojol ti xchi'iltac ta voq'uele.

²Va'i un, tsots x'avet xa liquel ta oq'uel ti laj ya'iic scotol ti egipcioetique, ti c'ot ya'yejal xtoc c'alal ta sna ti faraone.

³Ti Josee xi laj yalbe ti xchi'iltac ta voq'uele: —Vu'un ti Josee. ¿Mi cuxul to ti jtote? Jech ti stuquique, mi ja'uc xa xtac' yu'unic, yu'un batem xch'ulelic ta xi'el.

⁴Jech xtoc un, xi albatic yu'un ti Josee: —Nopajanic talel, avocolicuc. C'alal nopajic batele, xi albatique: —Vu'unun José ti achi'ilicun ta voq'uele, ti laj achonicun talel ta Egiptoe.

⁵Ja' no'ox un, avocolicuc, mu xavul avo'ntonic. Mi ja'uc xati'jolta aba atuquic ti jech laj achonicune. Yu'un ja' laj scaj-tacun jelavel talel ti Diose yo' jech ta staic xu' to xcuxiic ti jnaclejetique.

⁶Yu'un oy xa xchibal jabil sliquel vi'nal ta sjunlej ti jteclume. Sc'an to vo'ob jabil ti mu'yuc c'usi ta xac' ti banomile, ac'o mi ta xich' ts'unel.

⁷Yo' jech mu xch'ay sts'unubal ti jnaclejetic ta banomile, jech o xal ti Diose laj stacun jelavel talel. Ja' ts'acal to ti vo'oxuque yo' jech mu xa no'ox bisbiluc ta sta ti scoltaelique.

⁸Ja' yu'un un, ja' Dios laj stacun talel bu oyun avi tana li'e, ma'uc ti vo'oxuque. Ja' laj sva'anun ta yaj'al-mantal ti faraone. Ja' jech xtoc ajvalilun yu'un scotol ti slumal Egiptoe.

⁹Batanic ta ora bu oy ti jtote. Albeic ya'i jech c'u cha'al li'e: ‘Xi ta xal ti anich'on Josee: Ti Diose laj yac' ochcun ta ajvalil yu'un ti jteclum Egiptoe. La' q'uelun ta ora. Mu xajaliltas aba.

¹⁰La' naclan li' ta yosilal Gosén jmoj xchi'uc ti anich'nabe, ti amamubtaque, xchi'uc scotol ti chon bolometic avu'une, yo' jech mu xa nomuc bu nacalot.

¹¹Li' ta xcac'bot ave'elic xchi'uc ti anich'nabtaque, xchi'uc scotol ti c'u yepal atsoboje, yo' jech mu xchamic ta vi'nal. Yu'un sc'an to vo'ob jabil ta x'ech' ti vi'nale.’

¹²Ti va'i s'elan laj cale, ja' rextico ti quits'in Benjamine xchi'uc ti vo'oxuque.

¹³Albeic ya'i jtot ti va'i s'elan cabtel quich'oj li' ta Egiptoe, xchi'uc scotol ti c'usi laj avilic li'e. ¡Ta ora no'ox, ba iq'uic talel ti jtote!

¹⁴Ti Josee laj smey ti Benjamín ti ja' yits'ine. Lic oc'uc. Jech ti Benjamine oc' ec c'alal meybil yu'un ti Josee.

¹⁵Ts'acal to ti Josee, xtuch'et xa yo'nton laj buts', oc' xtoc c'alal laj smey scotol ti xchi'iltac ta voq'uele. C'alal laj taj une, ja' to lic c'opojicuc ti xchi'iltac ta voq'uele.

¹⁶Vinaj batel ya'yejal ta sna faraón c'otic ti xchi'iltac ta voq'uel ti Josee. Jech ti faraone xchi'uc ti yajtuneltaque xmuyubajic xa.

¹⁷Ti faraone xi laj yalbe ya'i ti Josee: —Albo ya'i ti achi'iltac ta voq'uele ac'o smuyesbeic yicats ti sburroique. Ac'o suticuc batel ta Canaán.

¹⁸Ja' jech xtoc, ac'o yiq'uic talel ti atote xchi'uc scotol ti c'u yepal stsoboje. Ta xcac'be lequil banomil ti oy li' ta Egiptoe. Ta sve'ic ec ti c'usi ta xloc' li' ta jteclume.

¹⁹Albo ya'i xtoc laj cal mantal li' ta Egiptoe, ta jtacbe batel carretaetic yo' jech ta xcajiic talel ti antsetique, ti ololetique, xchi'uc ti atotique. Ac'o talicuc.

²⁰Mu svul yo'ntonic yu'un c'usi ta scomtsanic, yu'un ti c'usitic lec x'ayan li' ta Egiptoe, ja' yu'unic ec.

²¹Va'i un, ja' jech pasbatic xnich'nabtac ti Israele. Yu'un ja' jech laj spas ti José jech c'u cha'al laj yal mantal ti faraone. Laj stac batel ti carretaetique xchi'uc sve'elic ta sventa ti bee.

²²Ja' jech xtoc laj yac'be ach' sc'u'ic yo' ta sjelta sbaic. Yan ti Benjamine laj yac'be oxib ciento (300) ta sep plata taq'uin xchi'uc vo'chop c'u'il.

²³Ti Josee laj stacbe batel smoton ti stote. Lajuncot burro xcuchojan batel ti c'usitic lec x'ayan ta Egiptoe. Yan lajuncot burro xcuchojan batel ti trigoe, xchi'uc pan, ve'liletic, yo' jech ta sve'ic ti stot ti c'alal ta xtal ta bee.

²⁴C'alal laj xch'ac sbaic xchi'uc xchi'iltac ta voq'uel ti Josee, xi laj yalbee: —Mu me xavutilan abaic batel ta be un. Ti stuquique batic.

²⁵Loq'uic ta Egipto. C'otic ta Canaán bu nacal ti Jacob ja' stotique.

²⁶C'alal laj yalbeic Jacob cuxul ti Josee, ja' ajvalil yu'un ti jteclum Egiptoe, mu stac' a'yeluc ta xa'i c'usi ta spas, c'usi ta xal. Yu'un mu ch'unbaj ta xa'i ti jech ta x'albate.

²⁷Ja' no'ox un, c'alal laj yalbeic ya'i scotol c'usi laj yal ti Josee, xchi'uc xtoc laj yil ti carretaetic stacoj batel ti José yo' jech ta x'ic'at batele, xcuxet xa banomil laj ya'i.

²⁸Va'i un, xi laj yale: “¡Bal to xca'i ma' ti cuxul ti jnich'on Josee! Yo' to mu ta xicham, ta xbat jq'uel.”