Read Tzotzil Génesis 47 Bible Online

Génesis 47 - Tzotzil bible

Génesis 47

¹Va'i un, ti Josee bat xchapbe ya'i ta sni' xchiquin faraón ti lo'il a'yeje. Laj yalbe ya'i, vololic xa, vulic xa ta yosilal Gosén xchi'uc xchijic, xchi'uc xvacaxic, xchi'uc scotol ti c'usi x'ayan yu'unic stsobojic talel c'alal loq'uic talel ta Canaán ti stote, xchi'uc ti xchi'iltac ta voq'uele.

²Yo' jech ta x'ojtiquinatique, laj st'uj vo'ob xchi'iltac ta voq'uel ti yic'oj batel ta stojol ti faraone.

³Va'i un, xchi'iltac ta voq'uel ti Josee, xi jac'batic yu'un ti faraone: —¿C'usi abtelal xana'ic yabtelanel? Xi laj staq'uique: —Ti avajtuneluncutique, Jcuch abtel, ja' cabtelcutic ti ts'un chije co'ol jech c'u cha'al ti jmolmuc'totcutic laj ech'icuque.

⁴Ti litalcutic ta naclej li' ta jteclume, yu'un ta Canaán liquem vi'nal. Ja' jech xtoc mu'yuc xa yaxal ta slo' ti jchijcutique. Ja' yu'un un, Jcuch abtel, avocoluc, ac'o ave ati' ti xu' ta xicomcutic ta naclej ta yosilal ti Gosene.

⁵Va'i un, ti faraone xi laj yalbe ti Josee: —Ti jech tal snaban sbaic ta atojol ti atote xchi'uc ti achi'iltac ta voq'uele,

⁶ti sbanomil Egiptoe, ja' yu'unic. Ac'bo yich'ic osil ti oy ta Gosene. Yu'un ja' lequil banomil oy yu'un ti jteclume, ac'o nacliicuc. Ja' jech xtoc mi oy buch'u yu'unic lec xtojob ta q'uel vacaxe, ac'o sq'uelbeicun jchon bolom ec.

⁷Ti Josee laj yic' batel xtoc ta stojol faraón ti Jacob ti ja' stote. Ti Jacobe biq'uit laj yac' sba c'alal c'ot sc'opon ti faraone.

⁸Xi jac'bat yu'un ti faraone: —¿Jayib xa ajabilal le' une?

⁹Xi laj stac' ti Jacobe: —Quich'oj xa lajuneb yucvinic (130) jabil ti yalel muyelune. Jutuc to jabilal, yu'un oy vocol ta banomil. Mu to ta jta jech c'u cha'al laj ech'icuc ti jmolmuc'totaque.

¹⁰Ts'acal to un, ti Jacobe loc' batel c'alal laj yo'nton ta sc'oponel ti faraone.

¹¹Jech ti Josee laj yac' ti lequil banomil ti oy ta slumal Egiptoe yo' ta xnaquiic jech c'u cha'al laj yal ti faraone. Ja' yu'un un, ti stote xchi'uc ti xchi'iltac ta voq'uele laj yich'ic ti banomil ti oy ta yosilal Ramsese.

¹²Ja' jech xtoc ac'bat sve'elic scotolic yu'un ti Josee, ja' ti c'u yepal ta xtun yu'unic ti jujuvoq'ue.

¹³Ta sjunlej jteclum ch'abal xa ti trigoe. Ja' jech xtoc yantic xa stsatsaj ti vi'nale. Jech ti jnaclejetic oyic ta Egiptoe xchi'uc ti oyic ta Canaane, ta xchamic ta vi'nal.

¹⁴Ti Josee laj stsob scotol ti taq'uin ti stojol trigo laj smanic o ti egipcioetique xchi'uc ti cananeoetique. Laj sq'uej ta sna ti faraone.

¹⁵C'alal mu'yuc xa staq'uinic ti egipcioetique, mi ja'uc ti cananeoetique, jech o xal ti egipcioetique xi bat yalbeic ti Josee: —Ac'buncutic c'usi xu' ta jve'cutic. Mu teyuc no'ox aq'uelojuncutic ta xichamcutic ta vi'nale. Ja' no'ox un, mu'yuc xa ti jtaq'uincutique.

¹⁶Xi laj stac' ti Josee: —Mi mu'yuc xa ti ataq'uinique, iq'uic talel ti chon bolometic avu'unique, ja' ta jeltic ta trigo.

¹⁷Ti egipcioetique laj yiq'uic batel ta stojol ti José ti sca'ique, ti xchijique, ti xvacaxique, ti sburroique. Jech jelbatic ta trigo yu'un José ti c'u sjalij jabil jalij taje.

¹⁸Ech' ti jabile. Ta yan jabil xtoc un, xi bat yalbeic ti Josee: —Ma'uc no'ox ta xcalcutic ch'abal ti jtaq'uincutique. Ti jchon bolomcutique c'otem xa ta avu'un scotol. Mu'yuc xa c'usi yan xu' ta xacac'becutic, c'ajomal xa no'ox oy ti cosilcutique xchi'uc ti vu'uncutique.

¹⁹Manuncutic ec xchi'uc ti jbanomilcutique yo' jech ta xavac'buncutic ti trigoe. Ta xcac' jbacutic ta mosovinel yu'un ti faraone. Ta xcabtelancutic ti banomil ti c'otem ta yu'une yo' jech xu' xavac'buncutic ti ts'unubile, yo' jech mu xichamcutic ta vi'nal xtoc, yo' jech mu staojuc yav sepel ti banomile. ¿C'usi xloc' o aq'ueloj ta xichamcutic, staoj yav sepel jbanomilcutic?

²⁰Va'i un, ti Josee laj sman scotol ti osil oy ta Egiptoe. C'ot ta yu'un ti faraone. Ti jech laj xchon sbanomilic ti egipcioetique, ta scoj ti vi'nale. Jech o xal ti faraone c'ot ta yajval banomil.

²¹Jech xtoc scotol ti egipcioetic oy ta sjunlej Egiptoe, ochic ta mosovil.

²²Ti banomil mu'yuc laj sman ti Josee, ja' xa no'ox sbanomilic ti paleetique. Yu'un tey ono'ox ta x'ac'bat trigo sve'ic yu'un ti faraone. Jech o xal un, mu'yuc laj xchonic ti sbanomilique, ta ono'ox sve'ic ta x'ac'batic yu'un ti faraone.

²³Ts'acal to un, ti Josee xi laj yalbe ya'i ti jnaclejetique: —Ti vo'oxuque xchi'uc ti abanomilique, ja' xa yu'un ti faraone. Yu'un laj xa jmanboxuc yo' jech c'ot ta yu'un. Li' oy ti ts'unubile, ts'unbeic sbel ti banomile.

²⁴Ja' no'ox un, c'u yepal ta xac' sat ti c'usi ta xats'unique, ta xapasic ta vo'ch'ac. Ti jch'aque, ta xavac'beic ti faraone. Yan ti chanch'aque, q'uejic yo' jech ta xats'unbeic sbel ti banomile, ja' to jech ta xata ave'elic xchi'uc ti avalab anich'nabique, xchi'uc scotol ti c'u yepal oy ta atojolique.

²⁵Ti stuquique xi laj staq'uique: —Toj lec avo'nton ta jtojolcutic. Laj ac'uxubinuncutic yo' jech mu xichamcutic. Li' une, smosovuncutic xa ti faraone.

²⁶Ta sjunlej Egipto, laj yac' jun mantal ti Josee ac'o yac'beic faraón jch'ac ta vo'ch'ac ti c'u yepal ta xloc' ti ts'unubiletique. Ti mantal taje, cuxul to yu'unic avi tanae. Yan ti paleetique mu'yuc c'usi ta xaq'uic jutebuc. Yu'un mu'yuc ochem ta sc'ob faraón ti sbanomilique.

²⁷Ti israeletique com nacliicuc ta Egipto. Laj yich'ic yosilal ti Gosene. Lic epajicuc ta j'ech'el.

²⁸Ti Jacobe cuxi to vuclajuneb (17) jabil ta Egipto. Ti ta scotol sjabilal ch'i c'opoj ti Jacobe, ja' vucub xvaxacvinic (147) jabil.

²⁹Oy jun c'ac'al, ti Israele laj ya'i ti po'ot xa ta xchame. Ja' yu'un un, laj sta ta iq'uel ti José ti xnich'one yo' xi ta xalbe ya'ie: —Mi melel ta xa'abolaj cu'une, ac'o ac'ob li' ta yolon co' ta xaval ta jamal ta xapas ti c'usi ta jc'anbote. ¡Avocoluc, mu xamucun li' ta Egiptoe!

³⁰C'alal ta sta yorail xba jchi'in ti anima jmolmuc'totaque, ic'un loq'uel li' ta Egiptoe. Bat mucun bu muculic ti jmolmuc'totaque. —Lec oy. Jech ta jpas —xi laj stac' ti Josee.

³¹—¿Mi melel xaval un? —xi lic sjaq'uilan ti stote. —Melel xcal —xi laj stac' ti Josee. Jech ti Israele laj squican sba ta sjol stem.