Read Tzotzil Génesis 6 Bible Online

Génesis 6 - Tzotzil bible

Génesis 6

¹C'alal lic epajuc ti jnaclejetic ta banomile, lic ayanuc yantsiquil nich'nabic.

²Jech ti buch'utic c'otic xa ta bats'i xnich'nab ti Diose, laj yilic ti toj c'upil sba ti antsetique. Ja' yu'un un, tey lic st'ujic ti bu junucal ta sc'an ta xiq'uic ta scotole. Laj yic' sbaic xchi'uc ti bu c'ot ta yo'ntonique.

³Ti Diose xi laj yale: “Ti vinique, mu me li'uc ta sts'un o yi'bel ti xch'iel sc'opojele. Yu'un ti stuque, lum ach'el no'ox. Ja' no'ox ta xcac' cuxiuc vacvinic (120) jabil.”

⁴C'alal ti yaj'ánjeltac Dios laj yic'beic yantsil nich'nabic ti viniquetic yo' ta xilic ti xnich'nabic xchi'uque, ja' o lic ayanuc talel ti inate' viniquetic ta ba'yel une, xchi'uc ti ta ts'acal to une. Ti stuquic taj une, puc sc'oplalic ta vo'ne ti jelavem xu' yu'unique.

⁵Ti Diose laj yil ti ech'em jelav xchopolalic ti jnaclejetic ta banomile, yu'un ja' no'ox ta snopilanic o ta spasel ti chopole.

⁶Jech o xal un, laj xcha'na' ti laj smeltsan ti vinique. Mu ts'icbaj laj ya'i.

⁷Va'i un, xi lic yale: “Ta jch'aybe sts'unubal ta banomil ti vinic ti laj jmeltsane, xchi'uc scotol ti ts'unbolal chon bolometique, xchi'uc ti c'usi xjochet ta xanavic ta banomile, xchi'uc ti mutetique. ¡Jcha'na' xa ti laj jmeltsanique!”

⁸Ac'o mi jech un, yan ti Noee, lec x'ile ta sba ta sat ti Diose.

⁹Ti li'e, ja' sc'oplal ya'yejal ti Noee: Ti Noee lequil vinic, yu'un tey ono'ox ta spas ti c'usi ta sc'an ti Diose. Ti ta scotol ti jnaclejetic ti jech ora taje, ja' no'ox stuc ti yac'oj yo'nton ta spasel ti c'usi oy ta yo'nton ti Diose.

¹⁰Ti Noee laj yil oxib xnich'nab, ja'ic ti Seme, ti Came, ti Jafete.

¹¹Yu'un ti ta sba ta sat ti Diose, mu'yuc smelol ta mulil colo'il ta xil ti banomile, ti epajem vocol yu'un ti ilbajinele.

¹²Ti c'alal jech laj yil ti Dios ti epajem ti mulil ta banomile, ti yanijem ta be ti snopobil yu'unic scotol ti jnaclejetique,

¹³xi laj yalbe ti Noee: “Laj xa jnop ti ta jtubbe sc'oplal scotol ti jnaclejetique, yu'un ja' ta scojic ti epajem vocol yu'un ti ilbajinele. Ja' yu'un un, ta jtsutses scotolic xchi'uc scotol ti c'usitic oy ta banomile.

¹⁴Jech o xal, meltsano jun barco ta te' ti lec tsoj xchi'uc ti xuch'ale. Meltsano jayc'oluc yut. Ta xapac' ta chab ta yut ta spat ti bu cayajtique yo' jech mu sol jelavel ti vo'e.

¹⁵Ja' jech sbisol ti barco ta xameltsane: Vo'lajuneb yucvinic (135) metro ti snatile, o'lol yoxibal xcha'vinic (22.50) metro ti sjamalile, o'lol xchanlajunebal (13.50) metro ti stayleje.

¹⁶Ta oxcoj xameltsan, xchi'uc ac'bo jun sventanail ti o'lol (0.50) metro yiloj ti yolon yaxibe, xchi'uc junuc sti' ta jotuc ti xocone.

¹⁷Yu'un ta xcac' taluc nojel ta vo' yo' jech ta smut'i ti banomile, ti ac'o tubuc sc'oplal scotol ti c'usi cuxajtic ti oy ta sjoylej banomile. Scotol ti c'usitic cuxul ta banomile ta xcham.

¹⁸Ja'uc ti vo'otique, ta xcac' jtrate ta atojol, ti jmoj ta xa'ochic batel ta barco xchi'uc ti anich'nabe, ti avajnile, ti avalibtaque.

¹⁹Ja' jech xtoc ta xavic' ochel ta barco ta scotol ti chonetic ti oy ta banomile, jcot stot xchi'uc jcot sme', yo' jech cuxul ta xcom sts'unubalic jech c'u cha'al ti vo'ote.

²⁰Ta xachi'in ochel ta barco ta cha'cha'cot ti xi s'elan jujutos sts'unubal ti chon bolometique: ja' ti mutetique, xchi'uc ti ts'unbolal chon bolometique, xchi'uc ti c'usitic xquilet ta xanav ta banomile, yo' jech mu xch'ay ti sts'unubalique.

²¹Ja' jech xtoc un, tsobo ochel ta q'uejel ti jaylajun-tos ti c'usitic stac' lajesele yo' jech mu xalajic ta vi'nal xchi'uc ti chon bolometique.”

²²Jech laj spas scotol ti Noee jech c'u cha'al i'albat yu'un ti Diose.