Read Tzotzil Génesis 9 Bible Online

Génesis 9 - Tzotzil bible

Génesis 9

¹Xi laj yal ti Dios c'alal laj sts'uiltas ti Noee xchi'uc ti xnich'nabe: “Epajuc avalab, anich'nabic. Bolanic ta banomil.

²Scotol ti chon bolometic ti oyic ta banomile, mu ech'bajuc axi'elalic ta xa'iic. Yu'un scotol ti c'usitic sna' xvilique, ti oyic ta nabe, oy ta avoc ta ac'obic c'usi xac'an ta xapasbeic ta stojole.

³Yu'un scotol ti chon bolometique, ti itajetique, ta xcac'boxuc. Xu' xatun xalajesic ti bu snop avo'ntonique.

⁴Ja' no'ox un, xi s'elan ti mu xu' xati'ique: ti cuxul tse xchi'uc ti xch'ich'ele, yu'un ta ch'ich' tsacal ti cuxleje.[3],

⁵Yu'un ta xquich'beic ye sti'ic ta jujun vinic, ta jujun chon bolometic laj smal ti ach'ich'elique. Yu'un jujun vinic, ta xquich'be ye sti' c'u s'elan c'ot ta tsutsel yu'un ti xchi'ile.

⁶“Yu'un mi oy buch'u ta smil jun vinique, ta xva'i talel yan yajval yo' ta xmilat ec, yu'un ti vinique, meltsanat co'ol s'elan jech c'u cha'al ti Diose.

⁷Ja' yu'un un, ti vo'oxuque, epajuc ti avalab anich'nabique, boluc ti banomil avu'unic xchi'uquique.”

⁸Ja' jech xtoc ti Noee xchi'uc ti xnich'nabtaque, xi i'albatic yu'un ti Diose:

⁹“A'yio ava'iic tana li' une, ti jtratee j'ech'el ta xcom o ta atojolic xchi'uc ta stojol ti anitilultaque,

¹⁰xchi'uc ta stojol scotol ti chon bolometic oy ta atojolic xi s'elan loq'uic talel ta barcoe, ti mutetique, ti ts'unbolal chon bolometique, ti te'tical chon bolometique, xchi'uc scotol ti c'usiuc xa no'ox chanul ta banomile.

¹¹Yu'un xi s'elan ti jtrate mu xjel ta atojolique: Mi ja'uc xa ta jtubbe sts'unubal yan velta ta nojel ta vo' ti viniquetique xchi'uc ti chon bolometique. Mi ja'uc xa ta xtal nojel ta vo' yan velta ta soquesel ti banomile.

¹²Ja' jech senyail ta j'ech'el ti laj cac' ti jtrate ta atojolique, xchi'uc ta stojol scotol ti chon bolometique:

¹³Yu'un ta xvinaj vacnac'obal cu'un ta toc, ti ja' ta xtun ta senyail ti jtrate c'usi caloj ta jpas ta stojol ti banomile.

¹⁴Yu'un c'alal ta xcac' taluc toquetic ta banomile, ta xvinaj capal ti jvacnac'obale.

¹⁵Va'i un, ja' to jech ta jvules ta jol ti jtrate laj jpas ta atojolique, xchi'uc ta stojol scotol ti chon bolometique. Ja' yu'un un, mu xa xtal yan velta nojel ta vo' ta stub ti ats'unubalique.

¹⁶C'alal ta xquil oy ta toc ti jvacnac'obale, ta jna' ta j'ech'el ti cac'oj lec jtrate ta stojol scotol ti jnaclejetique, xchi'uc ta stojol scotol ti chon bolometic oyic ta sjoylej banomile.

¹⁷Ja' senyail ti jtrate laj cac' ta stojol scotol ti jnaclejetique, xchi'uc ta stojol scotol ti chon bolometic li' ta banomile.” Ja' jech s'elan c'opoj ti Dios ta stojol ti Noee.

¹⁸Xnich'nabtac ti Noé loq'uic ta barcoe, ja'ic ti Seme, ti Jafete, ti Came stot ti Canaane.

¹⁹Ti oxvo' xnich'nab Noé taje, ja'ic lic sbolesic banomil yan velta xchi'uc ti snitilultaque.

²⁰Ti Noee lic yabtelan ti banomile. Lic sts'unan uva.

²¹Oy jun c'ac'al, ti Noee laj yuch' ep ti ya'lel uvae, yacub xchi'uc. Va'i un, cuxul t'anal telel ta yut yaxibalna.

²²Jech ti Came, stot ti Canaane, c'alal laj yil ti cuxul t'anal ti stote, bat yalbe ya'i ti chib xchi'il ta voq'uele.

²³Ja' no'ox un, ti Seme, ti Jafete laj sa'ic c'u'il. Laj xlich'an batel ta snequebic yo' jech ta smac ti stotique. Yo' jech mu xilic ti t'anale, ta svalopat batic, jot o sq'uelojic batel.

²⁴C'alal vul xch'ulel yu'un syacubel ti Noee, laj sna' ti c'usi laj spas ta stojol ti yits'inal nich'one.

²⁵Ja' yu'un un, xi laj yale: “Bacuc svocol x'ech' ta banomil ti Canaane. Ta xc'ot ta stojol ti j'ech'el ilbajinbil ta mosovinel yu'un ti cha'vo' xchi'il ta voq'uele.”

²⁶Xi to no'ox lic stsac batel slo'il: “Ti Seme, ts'uiltasatuc yu'un ti Ajvalil Dios cu'une, yan ti Canaane, c'otuc ta mosovil yu'un.

²⁷Ti Jafete, ac'o sva'an ti Dios ta stojolal yo' jech ta x'epajic, ta xnaquiic ta axibalnaetic yu'un ti Seme, yan ti Canaane, c'otuc o ta mosovil yu'un.”

²⁸C'alal ech' xa ox ti nojel ta vo'e, cuxi to batel lajuneb xvaxaclajunvinic (350) jabil ti Noee.

²⁹C'alal yich'oj xa baluneb ciento xchi'uc lajuneb yoxvinic (950) jabile, cham.