Read Tzotzil 2 Samuel 10 Bible Online

2 Samuel 10 - Tzotzil bible

2 Samuel 10

¹Ech' c'uc sjaliluc un, cham ti Nahas ajvalil yu'un ti amonitaetique, ti och ta xq'uexol ta ajvalilal ti Hanún ti ja' xnich'one.

²Va'i un, ti David une c'ot ta yo'nton ti sc'anuc lecuc yil sbaic xchi'uc ti Hanune jech c'u cha'al ech' ti stot ti lec yil sbaic xchi'uque. Jech laj stac batel jun chibuc yaj'opisialtac ta spatbel yo'nton ti jech cham ti stote. Ja'uc le' une, ti c'alal c'otic ta steclumal amonitaetic yaj'opisialtac ti Davide,

³ti banquilaletic yu'un ti amonitaetique, xi laj yalbeic ti Hanún ti ja' ajvalil yu'unique: “¿Mi ta xach'un xana', Jcuch abtel, ti ja' tacbil talel yu'un David yo' ta spatbot avo'nton ti viniquetic le'e, ta yaq'uel ta na'el ti mu'yuc tenbil ta o'ntonal ti atote? ¡Ta jbel sc'oplal le'e, mu xa slequiluc, yu'un tacbilic talel ta sq'uelel, ta spa'iel ti jteclume yo' jech ta ts'acal ta stubbe sc'oplal!”

⁴Va'i un, ti Hanune laj yal mantal ti ac'o yich'ic chuquel yaj'opisialtac ti Davide, ti scurpintabeic ta setbel ti yisimique, ti xch'i'beicuc ta jatbel ti sc'u'ic ti c'otuc c'alal ta scubic ti licajticuc c'otuc yu'unique. Ta ts'acal to un, ac'o staquic batel.

⁵C'alal laj ya'i David ti va'i s'elan taje, laj yal mantal ti ac'o ba yich' nupel ta bee, ti jbel sc'oplal mu nan x'ech' xjelav xq'uexlalil ta xa'i ti jech c'ot ta stojolique. Laj yalbe mantal ti comicuc to ta Jericó ti ja' to ta sutic ech'el mi pul talel ti yisimique.

⁶Laj sna'ic lec ti amonitaetic ti lic capuc sjol ti David yu'unique. Laj smanic ta tojel jtob ta mil (20,000) soldado sirioetic ti oy ta Bet-rehobe xchi'uc ta Sobae, jmil (1,000) ta vo' svinictac ti ajvalil Maacae, xchi'uc lajcha'mil (12,000) ta vo' svinictac ti Is-tobe.

⁷Ja'uc le' une, laj ya'i ti Davide. Laj stac batel ti Joab xchi'uc scotol ti yajsoldadotaque.

⁸Ti amonitaetique xvoletic no'ox liquel, lic xchapan sbaic ta letovajel ta ochebal sti' ta jteclum ono'oxe. Ja'uc ti soldado sirioetique, ti Sobae, ti Rehobe, svinictac ti Is-tobe, xchi'uc ti Maacae, bat svol sbaic ta malavanej ta osiltic.

⁹C'alal laj yil ti Joab ti macbil xa ta be ta jujujote, lic st'uj soldado israeletic ti bu lec xtojobique, ti lic xchapan sbaic ta stsaquel ta leto ti sirioetique.

¹⁰Ti c'u yepal com scomelal ti jvoc' yajsoldadotaque, ja' laj yac'be sbain ta spasel ta mantal ti xchi'il ta voq'uel ti Abisai sbie yo' jech xbat xch'amic ta be ti amonitaetique,

¹¹ti xi laj yalbe ya'ie: “Mi ta xavil ti ta xistsaluncutic ti sirioetique, ta me xtal acoltaicun. Mi ta xquil ti ta stsalot ti amonitaetique, ta xtal jcoltaotcutic ec.

¹²Mu xatsiq'ues avo'nton. Cac'betic yipal ta j'ech'el ta spaquel ti jc'oplaltic sventa ti jteclumaltique, xchi'uc ta sventa steclumal ti Dios cu'untique. ¡C'otuc ta pasel ti c'usi lec ta xil ti Diose!”

¹³Ti Joabe xvolet batel xchi'uc ti yajsoldadotac ta stsaquel ta leto ti sirioetique. Ja'uc le' une jatvil loc' ech'el yu'unic.

¹⁴C'alal laj yilic ti amonitaetic ti jatvilic xa ti sirioetique, lic stambeic loq'uel jatobal ta stojol ti Abisaie, ti ochic ech'el ta jteclume. Ti Joabe laj yicta sba ta stsaquel ta leto ti amonitaetique, sut ech'el ta Jerusalén.

¹⁵C'alal laj yilic ti tsalbil c'otic yu'un israeletic ti sirioetique, lic xcha'tsob sbaic xtoc.

¹⁶Ti Hadad-ezere laj stac ta iq'uel ti sirioetic ti oyic ta jot uc'um Eufratese, ti c'otic ta Helame. Ti j'ic'vanej batel yu'unique, ja' ti Sobac banquilal jtsobvanej yu'un yajsoldadotac ti Hadad-ézere.

¹⁷Taje, albat ya'i ti David ti va'i s'elan yacal ta xc'ot ta pasele. Ta jech no'ox yepal lic svol ta tsobel scotol Israel, ti ech' xtuch'ic uc'um Jordán ti c'otic ta Helame. Ti bu taje, lic stsac sbaic ta leto ti sirioetic xchi'uc ti David ti laj yac'be sbaique.

¹⁸Ta slajebal un, jatvil loq'uic ech'el ta stojol ti israeletique. Ti c'u yepal tsalbil c'otic yu'un ti Davide, ja' cha'vinic ta mil (40,000) soldadoetic ti cajalic ta ca'e, xchi'uc vucub ciento (700) ta cot carreta ti lajic ta letoe. Ti Davide laj sta ta yayijesel ti Sobaque, banquilal jpas-mantal yu'un yajsoldadotac sirioetic, ti cham no'ox ti bu taje.

¹⁹Ti jech laj yilic scotol ti ajvaliletic ti jun to ox sjolic xchi'uc ti Hadad-ezere, ti tsalbil c'otic yu'un ti israeletique, lamaj c'op yu'unic xchi'uc ti israeletique, ti pasbilic c'otic ta mantale. Lic ochicuc ta xi'el ti sirioetic ti jech c'ac'al taje. Laj yicta sbaic o ta stiq'uel sbaic ta spojel ti amonitaetique.