Read Tzotzil 2 Samuel 13 Bible Online

2 Samuel 13 - Tzotzil bible

2 Samuel 13

¹Ti Absalón xnich'on ti Davide oy jun yixlel ti toj c'upil sba ta j'ech'el ti sbiinoj Tamare. C'ot ta pasel, ti Amnón xnich'on xtoc ti Davide, juteb ta yo'nton ti tsebe.

²C'ot ta pasel ti ipaj yu'un ti mu xa sna' c'usi ta xut sba xchi'uc ti vul o'nton ti juteb ta yo'nton ta sc'upin ya'i ti yixlel ti Tamar sbie. Ti mu'yuc to tabil ta vinique, vocoltic c'usi xut ta sloc'obine.

³Ja'uc ti Amnone oy jun buch'u lec sc'opon sba xchi'uc ti oy sbijil ta ilbajinvanej ti sbiinoj Jonadabe, xnich'on ti Simeae, xchi'il ta voq'uel ti Davide.

⁴Oy jun c'ac'al ti xi jac'bat yu'un ti Jonadabe: —¿C'usi c'ot ta atojol, uni ch'in ajvalil? ¿C'u cha'al ti yantic xabat jujun c'ac'al une? ¿Mi mu xu' xavalbun ca'i ta jamal? Xi laj stac' ti Amnone: —Yu'un juteb ta co'nton ta jc'upin ca'i ta j'ech'el ti Tamare, yixlel ti jchi'il ta voq'uel Absalone.

⁵Va'i un, xi s'elan lic chanubtasatuc yu'un ti Jonadabe: —Bat puch'ano aba ta atem ti jchamelucot xabis aba yilele. C'alal ta xbat sq'uelot ti atote, albo ya'i ti abolajuc stacbot talel ti avixlel Tamare yo' jech ta xac'bot ti ave'ele, ti ac'o xchapanbot ta smeltsanel ave'el ti bu taje, yo' jech ta xatuc'ulan ta xalajes ti c'usi ta xac'bote.

⁶Ti Amnon une bat xpuch'an sba ta stem ti jchamel xa spas sba yilele. C'alal bat q'uelatuc yu'un ti ajvalile, xi laj yal ti Amnone: —¡Avocoluc! taluc ti quixlel Tamar li'e yo' jech ta xispasbun jbej cha'bejuc ti pan li'e, ti ja' stuc ta xac'bun ti jve'ele.

⁷Va'i un, ti Davide xi laj yalbe ti laj stac ta iq'uel ti Tamar ta snae: —Avocoluc, batan ta sna ti abanquil Amnone, meltsanbo jutebuc c'usi sc'an slajes.

⁸Ti Tamare bat ta sna ti sbanquil Amnón sbie, ti puch'ul xa ta spas sba yilele. Ti tsebe laj stsac ta vots'el ti ninal trigoe. Lic xchapan ta smeltsanel ti pane. Lic sta'ajes ti bu taje.

⁹Laj taj une, laj sloq'ues talel ta xaltem, tal yac'be ti panetique. Mi ja'uc sc'an slajes ti Amnone. C'ajomal no'ox laj yal mantal ti loq'uicuc batel scotol ti c'u yepal oyic ta nae.

¹⁰C'alal loq'uic xa ox batel scotolic ti c'u yepalique, ti Amnon une xi laj yalbe ya'i ti Tamare: —Ich'bun talel ti ve'lil ti bu puch'ulune, ti ta xavac'bun ta ac'ob atuque. Ti Tamar une laj yich' batel ti pan ti laj smeltsane, bat yac'be ti bu oy ti Amnón ti ja' sbanquile.

¹¹Ja'uc le' une, ti c'alal nopaj batel yo' jech ta xac' ve'uque, nax to ti nit x'utate, ti xi albate: —La' cuni ixlel, vaycutic.

¹²Ti tsebe xi laj staq'ue: —Mu jechuc xapas, banquil, mu xavac'un ta vocol. Jech c'u cha'al le'e, mu'yuc buch'u jech spas un li' ta Israele. ¡Mu xapas ti mu'yuc ach'ulel ta spasel ti c'usi chopole!

¹³¿Mi mu nijilucun ta q'uexlal ti bu ta xixanav une? Jech ti vo'ot ec une, ta xa'albat ac'oplal ti jun pimil vinicot ti mu'yuc xch'ulel ti li' ta Israele. Avocoluc, c'opono ta lec ti ajvalile, mu nan chopoluc xa'i ti ta xavic'une.

¹⁴Ti Amnone mi ja'uc xa'ibe xchiquinal. Ti x'ech' jelavem ti yipal yu'une, ti ja' mu sta ti Tamare, laj stsatsal tsac vay xchi'uc ti tsebe.

¹⁵Ts'acal to un, lic socuc sjol ta j'ech'el ti Amnon ta stojol ti tsebe, ti j'ech'el mu'yuc xa c'usi stu laj yil ti c'alal laj ti yo'ntone. Mi ja'uc lec ta xil ti c'upil to ox sba laj yile, ti cap sjol yu'un ta j'ech'ele. Va'i un, xi laj yalbee: —Loc'an, batan li'e.

¹⁶Xi laj stac' ti Tamare: —¡Laj to c'op ma' ti ta xibat une, banquilal! ¡Yu'un mi jech ta xapas ti ta xatenun loq'uel li'e, tsots amul ta xata, ja' mu sta ti vi s'elan laj apasbune! Ti Amnone mu'yuc laj yac' ta venta ti va'i s'elan albate.

¹⁷C'ajomal no'ox xi laj yalbe mantal smosov ti c'alal laj yic' talele: —¡Jipo loq'uel ti ants li'e, maquic lec comel ti ti'na ta ts'acal toe!

¹⁸Ti mosovile laj sjip loq'uel ti tsebe. Laj smac ti ti'na une. Va'i un, ti jun to ox yutsil sc'u' slapoj ech'el ti Tamar ti stalelic sna' slapic ti tojol tsebetic yantsiquil nich'on ti ajvalile,

¹⁹lic xch'i' ta jatel ta j'ech'el ti slapoj ech'ele. Laj sbusanbe sba tanil c'oc' ta sjol, ti yicoj xa batel sjol x'oc'olet xa batel ta bee.

²⁰Va'i un, xi jac'bat yu'un ti Absalón ti xchi'il ta voq'uele: —¿Mi ja' laj spasbot abanquil Amnón ti vi s'elan le'e? Ti jech le'e, quixlel, ts'ijlan no'ox me, yu'un abanquil no'ox. Mu toj ech'emuc xavul avo'nton yu'un ti vi s'elan le'e. Ti tenbil bajbil xa c'ot laj yil ti Tamare, bat snaban sba ta sna ti Absalón ti xchi'il ta voq'uele.

²¹C'alal laj ya'i ti ajvalil David ti va'i s'elan c'ot ta pasele, lic socuc sjol ta j'ech'el. Ja' no'ox un, mu'yuc laj svul ti Amnón ti ja' xnich'one, yu'un xc'uxubinoj ta j'ech'el ti jech sbanquilal nich'one.

²²Ja'uc ti Absalone, yo'nton no'ox sna', mi ja'uc oy c'usi laj yalbe jset'uc ti Amnone, ac'o mi soquet sjol yu'un ta j'ech'el ti ilbajinbat ti yixlel ti Tamar sbie.

²³Ech' xa ox chib jabil ti c'alal ja' o ta xloc'bat stsotsil xchij yu'un svinictac ti Absalón ta Baal-hasore, ta nopol jteclum yu'un ti Efraine. Ti Absalone lic stsob ta ve'el xnich'nab ti ajvalile.

²⁴Ma'uc no'ox taje, xi laj yalbe ya'i ti c'alal bat sc'opon ti ajvalile: —Avi tanae, yacal ta sloq'uic stsotsil jchij ti jvinictaque. Oy ta co'nton, Jcuch abtel, ti batuc achi'inun xchi'uc ti avaj'opisialtac jliqueluc ti avajtunel li'e.

²⁵Ti ajvalile xi laj staq'ue: —Mu stac' ma' ti ta xibat jcotolcutique, nich'on, yo' jech mu xavich' avocol ta xalajes aba cu'uncutic. Ac'o mi juteb ta yo'nton ti Absalón ti ta xic' batel ti ajvalile, mu'yuc xch'un batel. Ja' no'ox laj yac'be yich' batel slequilal ti Diose.

²⁶Va'i un, ti Absalone xi laj yale: —Mi mu xu' avu'un xabate, ac'bun ave ati' un cha'e, Jcuch abtel, sbalin to xca'i ta xatacbun batel ti jbanquil Amnone. —¿C'usi oy ta avo'nton ta xavic' ava'i batel ti Amnone? —xi laj sjac' ti ajvalile.

²⁷Mu xlaj yo'nton ti Absalón ta yalolanele. Jech o xal ti ajvalile laj yac' ye ti ac'o batuc ti Amnón xchi'uc ti yan xnich'nabtac xtoque. Jun to sve'el ajvalil smeltsanoj xa ti Absalone.

²⁸Xi yalojbe xa ya'i mantal ti yajmosovtaque: “Mi laj avilic ta xyacub xa ti Amnone, ti c'alal ta xcal ta xamilique, milic me. Mi ja'uc xaxi'ic yu'un, yu'un vu'un jmantal. Ja' yu'un un cha'e, tsotsanic, mu xatsiq'ues avo'ntonic.”

²⁹C'ot ta pasel smantal ti Absalón laj yale. Ja' yu'un un cha'e, ti smosovtaque laj smilic ti Amnone. Scotol xnich'nabtac ti ajvalile va'iic loq'uel, caji batel ta sca'ic ti jatavic batel ta anile.

³⁰C'alal yacalic ta xanavic batel ta bee, c'ot ta sni' ta xchiquin ti Davide ti milbat xa scotol xnich'nab yu'un ti Absalone, ti mu junuc cuxul come.

³¹Va'i un, ti ajvalile va'i liquel, laj xch'i' ta jatel ti sc'u'e, svinajeb ti mu x'ech' ta xa'i ti svocole, ti xpatalet xa ta lumtique. Scotol ti yaj'opisialtac ti oy ta stojole, lic xch'i' ta jatel ti sc'u'ic eque.

³²Ja'uc ti Jonadab xnich'on ti Simeae, xchi'il ta voq'uel ti Davide, lic c'opojuc ti xi laj yale: —Mu xanop ti laj ta milel scotol ti anich'nabe, Jcuch abtel. Yu'un ja' no'ox laj smilic ti Amnone. Chapanbil xa sc'oplal yu'un ti Absalón ti c'alal ilbajinbat ti Tamar ti ja' yixlele.

³³Ja' yu'un un cha'e, Jcuch abtel, altic ma' ti ta xc'ot ta avo'nton ti cham xa scotol ti anich'nabe. Ti buch'u chame, c'ajomal no'ox ti Amnone.

³⁴C'alal ta xa xjatav ech'el ti Absalone, ti jchabiej ti'nae laj stoy batel sat, laj yil ti oy buch'utic xc'ulet no'ox ta xyal talel ta sbelel Horonaim ti ta ch'ut vitse. Va'i un, ti jchabiej ti'nae bat yalbe ya'i ti ajvalil ti laj yil ti oy buch'u xc'ulet no'ox ta xyal talel ta sbelel ti Horonaime.

³⁵Ti Jonadabe xi laj yalbe ti ajvalile: —Tal xa ti anich'nabe, Jcuch abtel, jech c'u cha'al laj jnop ti avajtunelune.

³⁶Naca to no'ox laj yo'nton ta c'opojele, c'alal c'otic xnich'nab ti ajvalile, ti lic smil sbaic ta oq'uele. Ja' jech ec ti ajvalile xchi'uc scotol ti yaj'opisialtaque, ep oq'uic ec.

³⁷Ja'uc ti Absalone jatav batel, bat snac' sba ta stojol ti Talmai xnich'on ti Amiude, ajvalil ta Gesur. Ja'uc ti Davide ta xoq'uita scotol c'ac'al ta scoj cham ti xnich'one.

³⁸Ti Absalone, oxib jabil sjalil snac'oj sba com ti c'alal jatav ech'el ta Gesure.

³⁹C'alal ech' xa ox ti me'inalil ta xa'ie, yo'ntonuc xa ya'i ti David ta sq'uelbe ya'i sat ti Absalone.