Read Tzotzil 2 Samuel 14 Bible Online

2 Samuel 14 - Tzotzil bible

2 Samuel 14

¹Ti Joabe xnich'on ti Sarviae sna'oj lec ti mu tenbaj ta yo'nton ta xa'i Absalón ti ajvalile.

²Va'i un cha'e, laj stac ta iq'uel jun ants ti nacal ta Tecoa ti sna' c'usi x'utvan ta lo'lavaneje, ti xi laj yalbe ya'ie: “Biso aba ti oyot ta me'inale. Lapo c'u'il sventa me'inal. Mi ja'uc xajaxbe aba muil poxil, ti vinajuc yilel ti ja' jun ants ti oy xa sc'ac'alil oyot ta me'inal ta scoj ti oy buch'u chamem avu'une.

³Va'i un, batan ta stojol ti ajvalile, ti lec xchapet xavalbe ya'i jech c'u cha'al ta xcalbote.” Laj taj une, xchapet lic yal ti Joab ti c'u s'elan ta xc'ot yale.

⁴Jech ti ants ti liquem talel ta Tecoae bat ta stojol ti ajvalile, ti snupilan xa banomil c'ot spatan sba ta lumtique, svinajeb ti ta x'ich'van ta muq'ue, ti xi laj yale: —¡Pojun, coltaun, Jcuch abtel, avocoluc!

⁵—¿C'usi ti avocol une? —xi jac'bat yu'un ti ajvalile. Xi laj stac' ti antse: —Me'unal antsun, yu'un chamem jmalal.

⁶Ti cha'vo' squerem ol ti me' jtunel avu'un li'e, Jcuch abtel, oy bu jun c'ac'al laj stsac sbaic ta leto ta osiltic. Ti jun ta xchibalique, yayijesvan cham yu'un ti xchi'il sbaic ta voq'uel ta scoj ti mu'yuc buch'u xch'acunique.

⁷Avi tana une, scotol ti cuts' calaltaque mu lecuc jc'oplal yu'unic. Ta sc'anic ti ac'o cac' ta c'abal ti buch'u laj smil ti xchi'il ta voq'uele yo' jech ta xpacbat sutel ti jmilvaneje, ti tub xi sc'oplal yu'unic ti j'ich'-rextoile. Va'i un, juteb ta yo'ntonic ta xch'aybe ya'iic sc'oplal ti j'ac'-patob-o'ntonal ta jtojole, ti mu xa vulesbiluc ta o'ntonal ta xc'ot sc'oplal ti anima jmalal li' ta banomile.

⁸Va'i un, ti ajvalile xi laj stac'be ti antse: —Sutan batel ta ana, ta xcal mantal ti mu'yucuc c'usi xayalbeique.

⁹Xi lic stac' ti antse: —Yojtot, ajvalil, mi oy buch'u ta scajan ya'i ta bail ti mulil colo'ile, ac'o scajanic ta jba xchi'uc yuts' yalal ti jtot jme'e, ti ma'ucuc cajal ta xc'ot ta sba ti Jcuch abtele, ti ma'ucuc cajal ta xc'ot ta sbaic ti bu c'alal smacoj ta ventainele.

¹⁰Ti ajvalile xi laj staq'ue: —Ti buch'u ta sibtasote, ic'bun talel li' ta jtojole yo' jech mu teyuc no'ox ta xayilbajinot.

¹¹Xi lic yalolan liquel ti antse: —¡Avocoluc, Jcuch abtel, tao me ta c'oponel ti Ajvalil Dios avu'une yo' jech ti cuts' calale, mu x'epaj ti jvocol yu'unic ta smilic ti jun jquerem ol ti jmilvaneje! Xi jamal laj yal ti ajvalile: —¡Ta jva'an ta rextico ti Diose ti mu jbejuc stsatsal sjol ta xbaj ta lum ti avole!

¹²Ja'uc ti antse xi no'ox xvulvun liquele: —Avocoluc xa, Jcuch abtel, ac'bun ave ati' ti ts'etano ani' achiquin ta ya'yibel jbeluc sc'op ti me' jtunel avu'un li'e. —C'opojan ca'itic un cha'e —xi ti ajvalile.

¹³Va'i un, xi laj sjac' ti antse: —¿C'u cha'al ya'yel un cha'e, Jcuch abtel, ti anopoj xa jech ta xapasbe ava'i yalab xnich'nab ti Diose? Yu'un jech ta xalilanbe sba stuc ti Jcuch abtele. Ta smul stuc ti mu xac' sutuc talel ti xnich'on ti loq'uem xa batel ta yosilale.

¹⁴Yu'un ta ono'ox xc'ot ta pasel ti jcotoltic ta xijchamotique, ti co'ol j'elantic vo' ti mu xvinaj bu bat ti c'alal ta xich' malel ta banomile. Manchuc mi jech un, ti Diose mu'yuc ta xtuch'be xcuxlejal mi junuc, ti sna' c'u s'elan ta xut stuc yo' mu nomuc oy ta stojol ti buch'u jatavem batele.

¹⁵Ma' ti jech lital ta stojol li' une, yojtot Jcuch abtele, yu'un toj ech'em laj sibtasicun ti yajval lume. Jech o xal c'ot ta nopel yu'un ti tal sc'oponot ti me' jtunel avu'une yo' jech ta xa'i ya'i mi ta spas ti Jcuch abtel ti va'i s'elan ta jc'anbee.

¹⁶Jnopoj ti ta xa'ibun jc'op ti Jcuch abtele yo' jech ta stic' sba ta spojelun ta stojol ti buch'u ta sc'an ta xisch'aybun ya'i ti jts'unubale xchi'uc ti col li' ta banomil ti ja' yu'un ti Diose.

¹⁷Ti me' jtunel avu'un li'e ta smala ya'i ti c'usi ta x'albat yu'un ti Jcuch abtele yo' jech xpatet yo'nton ta xc'ot. Yu'un ti Jcuch abtele sna' xchiquintael ti bu leque, ti bu chopole, co'ol s'elan jech c'u cha'al ti yaj'ánjel Diose. ¡Chi'inatuc yu'un Ajvalil Dios ti Jcuch abtele!

¹⁸Ti ajvalile xi laj stac'be ti antse: —Avocoluc, mu xamuc mi jbeluc ti c'usi ta jac'bote. —Albun ca'i, Jcuch abtel —xi laj stac' ti antse.

¹⁹Va'i un, xi jac'bat yu'un ti ajvalile: —¿Mi mu ja'uc van ta melel avich'ojbe talel sc'op ti Joab ti jech tal aval scotol taje? Xi laj stac' ti antse: —Jamal xcaltic ava'i unbi, Jcuch abtel, mu yanuc ma' ti va'i s'elan laj avale. Yu'un ja' laj stacun talel ti Joab ti avaj'opisiale, Jcuch abtel. Ja' laj yalbun scotol ti va'i s'elan tal calbot ava'ie.

²⁰Ti jech laj spas taje, c'ajomal no'ox oy ta yo'nton ti jeluc ti c'usitic ta xc'ot ta pasele. Manchuc mi jech un, ti Jcuch abtele oy sbijil ti xojtiquin lec jech c'u cha'al ti yaj'ánjel Dios scotol ti c'usi ta xc'ot ta pasel ta muc' ta lume.

²¹Ti stac'obil sutel ti c'op ti va'i s'elan taje, va'i un, xi albat ti Joab yu'un ti ajvalile: —A'yio ava'i, ti c'op taje, laj xa jchapan. Batan, ic'o talel ti querem Absalone.

²²Va'i un, ti Joabe snupilan xa banomil laj spatan sba ta lumtic svinajeb ti sna' x'ich'van ta muq'ue, ti xi laj slequil c'opta ti ajvalile: —Avi tanae, laj quil ti mu'yuc laj stenun ti Jcuch abtele, ti c'ot ta yo'nton c'usi jnopoj ta yalel ti yajtunele.

²³Ta jech yepal ti Joabe bat ta Gesur yo' jech ta xic' talel ta Jerusalén ti Absalone.

²⁴Ja'uc ti ajvalile laj yal mantal ti tuc' batuc ta snae, ti mu xbat ta stojol ti ajvalile. Ti Absalone mu'yuc laj sc'opon sbaic xchi'uc ti ajvalile.

²⁵Ta scotol Israel, mu'yuc buch'u junuc ti xco'olaj xchi'uc ti Absalón ti c'upinbil yu'un ti yutsile, ti lequil c'optabil yu'unique. Yu'un mu'yuc c'usi chopol ta q'uelbel ta sjunul ti sbec'tal stacopale.

²⁶Yu'un ti c'alal ta sloq'uilan ti sjol ta jujun slajeb jabile, ta scoj ta xmaque ta be yu'une, x'ech' to ta chib kilo ti yalal ti stsotsil sjol ti c'alal ta sloq'ue, ja' ti c'u s'elan liquem yu'unic sbisol ti ajvaliletique.

²⁷Ja'uc ti Absalone oy oxib xnich'on xchi'uc jun yantsil nich'on ti ja' Tamar sbie, ti c'upil sba ta j'ech'ele.

²⁸Chib jabil sjalil oy ta Jerusalén ti Absalone ti mu ja'uc laj yilbe sat ti ajvalile.

²⁹Jech o xal ti Absalone laj sc'anbe ti Joab ti batuc sq'uel ti ajvalil ta sventae. Mi ja'uc bat ti Joabe. Ti Absalone laj sc'anbe ta xchibal xa velta ti Joab ti batuc sq'uel ti ajvalile. Ti Joabe mi ja'uc bat.

³⁰Va'i un, ti Absalone xi laj yalbe mantal ti smosovtaque: —A'yio ava'iic, yosilal sts'unub ti Joabe, nopol oy xchi'uc ti cu'un ti sts'unojbe jchop o ta trigoe. ¡Ba pajbeic sc'ac'al ya'i! Smosovtac ti Absalone batic, ba spajbeic sc'ac'al sts'unubal ti Joabe.

³¹Ja'uc le' une, ta jech no'ox yepal bat ta sna ti Absalone, ti xi laj sjac'bee: —¿C'u cha'al ti amosovtaque ay spajbeic sc'ac'al ti jts'unube?

³²Xi tac'bat yu'un ti Absalone: —Laj jtaot ta iq'uel yo' jech ta jtacot batel ta svu'lanel ti ajvalil ta yalbel ya'i ti mu'yuc c'usi bal o ti ta Gesur litale, ti ja' lec ti teyuc comcune. Yu'un ta jc'an ta jc'opon ca'i ti ajvalile, ti ac'o yal ti mi oy jmule, ac'o xismilun.

³³Va'i un, ti Joabe bat sq'uel ti ajvalile. Laj yalbe ya'i ti c'usi ta xal ti Absalone, tae ta iq'uel yu'un ti ajvalile. C'alal c'ot ti Absalón ta stojol ti ajvalile, snupilan xa banomil laj spatan sba ta lumtic. Ja'uc ti ajvalile, buts' xut xch'a.