Read Tzotzil 2 Samuel 21 Bible Online

2 Samuel 21 - Tzotzil bible

2 Samuel 21

¹C'alal yorail ochem ta ajvalilal ti Davide, ayan vi'nal ti snitoj sba oxib jabil sjalile. Va'i un, ti Davide lic sjac'be ti Diose, ti xi tac'bat talel yu'une: “Ti vi'nal le'e, ja' ta scoj smilvanejal ti Saule xchi'uc ti yuts' yalaltaque, yu'un laj smilic ti gabaonitaetique.”

²(Yu'un ti gabaonitaetique ma'uc sts'unubaltac ti Israele, ja' scomelal jvoc' amorreoetic ti oy c'usi yalojic ta jamal ti israeletic ta stojolique. Ja'uc ti Saúl une laj snop ta stsutses ta j'ech'el ti oy ta yo'nton ti c'ajomal no'ox lecuc oyicuc ti Israele xchi'uc ti Judae.) Ti David une laj sta ta iq'uel ti gabaonitaetique,

³ti xi jac'batic yu'une: —¿C'usi stac' ta jpas ta atojolic? ¿C'usi xu' stac' ta jlecubtas ti bu soquem ti c'ope yo' lequil c'optabiluc steclumal ti Diose?

⁴Ti gabaonitaetique xi laj staq'uique: —Ti c'usi quechel cu'uncutic xchi'uc ti Saule, xchi'uc ti yuts' yalaltaque, ma'uc ta scoj taq'uin. Mi ja'uc ta jc'ancutic ti oy buch'u xcham junuc ta Israele. Ti Davide xi laj staq'ue: —Albeicun ca'i un cha'e, ¿c'usi stac' ta jpas ta atojolic?

⁵Xi laj stac' ti stuquique: —Oy jun vinic ti buch'u juteb ta yo'nton ta ox xistsutsesuncutique, ti snopoj ox ta xch'ay ti jc'oplalcutic ta sjunlej yosilal ti Israele.

⁶Le'e, ac'buncutic talel ta c'abal vuc-vo'uc ti snitilultaque. Ta sba ta sat ti Diose ta joc'ancutic ta te' ta Gabaa ta yosil ti Saule, ti buch'u t'ujbil yu'un ti Diose. Ti ajvalile laj xch'un. Laj yac'be ech'el ta yoc ta sc'obic.

⁷Le' une, c'uxubaj yo'nton yu'un ti Mefi-bosete, xnich'on ti Jonatane, smom ti Saule, ta sventa ti oy c'usi laj sva'an sbaic ta rextico ta yalel xchi'uc ti Jonatane.

⁸Manchuc mi jech, laj xchucbe talel chib yol ti Rizpae, xnich'on ti Ajae, ti laj yilic xchi'uc ti Saúl ti sbiinoj Armonie xchi'uc ti Mefi-bosete. Jech xtoc laj xchucbe talel vo'ob yol ti Merab yantsil nich'on ti Saúl ti laj yilic xchi'uc ti Adriele, xnich'on ti Barzilai ti liquel talel ta Meholae.

⁹Taje, laj yac' ech'el ta yoc ta sc'ob ti gabaonitaetique, ti ta sba ta sat ti Diose, bat sjoc'anic ta te' ta vitstic. C'ot ta pasel ti jmoj cham yucubalic ta sliquebal sc'ac'alil stsobel ti jchop o ta trigoe.

¹⁰Va'i un, ti Rizpae, yantsil nich'on ti Ajae, lic slap lajemal c'u'il sventa me'inal, ti xpatet ta sba jbej tone. Ta sliquebal no'ox c'ac'al stsobel jchop o ta trigo xpatet com ti bu taje, ja' to ti c'uxi yal talel ti vo' ta vinajele. Mu ja'uc xac' nopajuc batel ti jti'oval xulemetic ta c'ac'altic ti bu telel ti animae. Mu ja'uc xac' nopajuc batel ti jti'oval chonetic ti ta xtal ta ac'ubaltique.

¹¹Ti va'i s'elan ta spas ti Rizpa sts'acal ajnil Saule, albat ya'i ti Davide.

¹²Va'i un, ti Davide bat stsobbe talel sbaquiltac ti Saule xchi'uc ti xnich'on Jonatane ti oy ta stojolic ti jnaclejetic ta Jabes ti oy ta Galaade. Taje, laj yelc'anic talel ta yutil Bet-san ti c'alal laj sjoc'anic ti filisteoetic ti c'alal laj stsalic ti Saúl ta Gilboae.

¹³Laj taj une, laj yal mantal ti Davide ti ac'o stsobbeic batel sbaquiltac ti Saule xchi'uc ti Jonatane, ti ac'o stsobbeic batel sbaquiltac ti buch'utic laj yich'ic joc'anele.

¹⁴Sbaquiltac ti Saule xchi'uc ti Jonatane, bat smuquic ta smuquinal ti Cise, stot ti Saúl ti oy ta Zelae, ta sbanomil ti Benjamine. Jech laj yich' pasel scotol jech c'u cha'al laj yal mantal ti Davide. Ts'acal to un, lic a'yibatuc sc'op yu'un ti Dios ti xvocolet ta sventa ti slumale.

¹⁵Lic xcha'liquesic letovajel xchi'uc Israel ti filisteoetique. Laj stic' sbaic ec ti David xchi'uc ti yaj'opisialtaque, ti lub ta j'ech'el ti Davide.

¹⁶Le' une, jutuc xa mu mile yu'un jun inate' vinic ti sbiinoj Isbi-benobe. X'ech' ta lajuneb xcha'vinic (30) kilo yalal ti slanza yich'oje, xchi'uc xchuquinoj jun ach' espada.

¹⁷Ja'uc ti Abisaie, xnich'on ti Sarviae, bat stic' sba ta spojel scoltael ti Davide, ti stsacoj c'ot ti filisteo ti laj smile. Va'i un, albat yu'un svinictac ti Davide, ti jbeluc sc'oplal yac' ye ti mu xa xloc' batel ta ac'-letoe yo' jech mu xtub xojobal yutsilal ti Israele.

¹⁸Ts'acal to un, lic to letovajel ta Gob ta scontrainelic ti filisteoetique. Ti jech yorail ta vo'ne taje, ti Sibecai ti ja' husatitae, laj smil ti Safe, snitilul ti inate' viniquetique.

¹⁹Ti yan to scontrainelic stsaquel ta leto ti filisteoetique, ti ta Gob xtoque, ti Elhanane, xnich'on ti Jair ti liquel talel ta Belene, laj smil ti Goliat ti liquel talel ta Gate, ti co'ol to s'elan ste'el yoc jolobil smuc'ul sjol ti slanzae.

²⁰Ti ta Gate, lic to yan letovajel xtoc. Ti bu taje, oy jun vinic snitilultac ti inate' viniquetique, ti ech'em snatile, ti xi s'elane: Vaquib sni' sc'ob ta jujun ti sc'obe, vaquib sni' yacan ta jujun ti yacane, ti ja' chanib xcha'vinic (24) c'otem ta scotole.

²¹Ja'uc le' une, laj stsac ta c'op ti Israele, ti laj smil ti Jonatane, xnich'on ti Simeae, xchi'il ta voq'uel ti Davide.

²²Ti chanib inate' viniquetic taje, ja' snitilultac ti Refa ti liquel ech'el ta Gate, ti tsaqueic, ti lajic ta milel yu'un ti Davide xchi'uc ti yaj'opisialtaque.