Read Tzotzil 2 Samuel 3 Bible Online

2 Samuel 3 - Tzotzil bible

2 Samuel 3

¹Jal ta j'ech'el letovajic svinictac ti Saúl xchi'uc svinictac ti Davide. Ja'uc ti Davide yantic stsac yip ta ech'el. Svinictac ti Saule yantic xa slubtsajic ech'el.

²Xnich'nabtac ti David ti laj voc'uc ti c'alal oy ta Hebrone, xi s'elan c'ot ta pasel jech c'u cha'al li'e: Ti banquilale, Amnón sbi, squerem ol ti Ahinoam ti liquem talel ta Jezreele.

³Ti xchibale, Quiliab sbi, squerem ol ti Abigail yajnil to ox ti Nabal ti liquem talel ta Carmele. Ti yoxibale, Absalón sbi, squerem ol ti Maaca yantsil nich'on ti Talmaie, ajvalil yu'un ti Gesure.

⁴Ti xchanibale, Adonías sbi, squerem ol ti Haguite. Ti yo'obale, Sefatías sbi, squerem ol ti Abitale.

⁵Ti svaquibale, Itream sbi, squerem ol ti Eglae, yan yajnil xtoc ti Davide. Taje, ja' o laj voq'uicuc ti c'alal oy to ox ta Hebrón ti Davide.

⁶C'alal syaquilic ta leto svinictac ti Saúl xchi'uc svinictac ti Davide, yantic stsac yip ti Abner ta stojol svinictac ti Saule.

⁷Ti Saule, oy to ox jun sts'acal ajnil, Rizpa ti sbie, yantsil nich'on ti Ajae, ti laj yantsin ec ti Abnere. Xi lic sjajanta Abner ti Is-boset ta scoj taje: —¿C'u cha'al laj achi'in ta vayel sts'acal-ajnil ti jtote?

⁸Xi lic sjajanta Is-boset ti Abnere: —¿Mi yu'un ts'i'un ya'yel ochemun ta yajtunel ti Judae? Mu yanuc jol co'nton ta stojol Saúl ti ja' atote, ta stojol ti yuts' yalaltaque, ta stojol ti buch'utic lec xile. Mi ja'uc laj cac'ot batel ta yoc ta sc'ob ti Davide. Avi tana une, ta xaval ti laj jta jmul xchi'uc ti jun antse.

⁹¡Tsots ac'o xistsitsun ti Diose ti mi mu jpas ta stojol David ti c'usi albil yu'un ti Diose.

¹⁰Yu'un yaloj ti Diose ti ta stubbe sc'oplal ta ajvalilal snitilultac ti Saule, ti xc'ot xa ta ajvalilal ti Davide yo' jech ta xlic spas ta mantal sjunlej ti Israele, xchi'uc sjunlej ti Judae, ti ta xlic ta Dane, ti ta xc'ot c'alal to ta Beersebae!

¹¹Mi jbeluc oy c'usi laj stac' ti Is-boset ti va'i s'elan laj yal ti Abnere, yu'un toj ech'em xi'elal ta xa'i.

¹²Ja'uc ti Abnere laj stac ta iq'uel j'al-mantal j'ich'-c'opetic yu'un ti xi ac'o yalbeic ya'i ti Davide: “¿Buch'u van sc'an ta sbain ti jteclum li'e? Xi cac' quetic ta spasel ti tratee: Ti vu'une ta jpas ti bu c'alal xu' cu'une, ti ac'o junajuc sjol yo'ntonic ta atojol scotol ti Israele.”

¹³Xi laj yal ti Davide: “Lec ta xca'i ti jpastic ti tratee. Ja' no'ox ti xi s'elan sc'oplal sc'an pasele. Mu xatal ta jtojol ti mi mu'yuc avic'oj talel ti Mical yantsil nich'on ti Saúl ti c'alal ta xtal aq'uelune.”

¹⁴Ma'uc no'ox taje, xi laj yal ti David ti laj stac ech'el j'al-mantal j'ich'-c'opetic ti bat yalbeic ti Is-bosete “Ac'bun talel ti Mical ti cajnile, ti laj cac' vo'vinic ta lic sjol sc'unilic filisteoetic ti c'alal laj quiq'ue.”

¹⁵Va'i un, laj yal mantal ti Is-bosete, ti ac'o yich' pojbel talel yajnil ti xnich'on ti Lais ti ja' Paltiel sbie, smalal ti antse.

¹⁶Ja'uc ti Paltiele tijil batel ta spat, ti x'oc'olet ti c'alal to Bahurim ts'acal batele. Ti bu taje, c'alal albat mantal yu'un ti Abner ti ac'o sutuque, ja' o sut ech'el ti Paltiele.

¹⁷Laj taj une, ti Abnere xi laj yalbe ti moletic yu'un Israel ti c'alal laj sc'oponane: “Oy xa sc'ac'alil ti oy ta avo'ntonic ta xac'anic ta x'och ta ajvalil avu'unic ti Davide.

¹⁸Lec ti jech ta xanopique, yu'un ja' xa yorail avi tana li'e ti ac'o c'otuc ta pasele. Yaloj ono'ox ti Diose ti ja' ta sventa David ta spoj ti lum Israel ti ilbajinbilic yu'un ti filisteoetique, ti tsalbilic yu'un ti yajcontraique.”

¹⁹Ti Abnere laj sc'oponan svinquileltac ti Benjamín xtoque. Ts'acal to bat ta Hebrón yo' ta xalbe ya'i David ti c'u s'elan snopojic ti Israele, xchi'uc scotol ti snitilultac ti Benjamine.

²⁰Laj taj une, c'ot xchi'uc jtob ta vo' viniquetic ta Hebrón ti bu oy ti Davide. Meltsanbat sve'elic yu'un David ta sventa ti stuque xchi'uc ti svinictac ti xchi'ucanojan batele.

²¹Ts'acal to un, ti Abnere xi lic yalbe ya'i ti Davide: —Avie, ta xibat, chba jtsob scotol ti Israele yo' ta spasic trate xchi'uc ti Jcuch Abtele yo' jech ti Jcuch Abtele ta xlic spas mantal jech c'u cha'al oy ta yo'ntone. Ja'uc ti Davide lec laj sc'opon loq'uel ti Abnere. Xmuyubaj xa sut batel ti staoj xa ech'el yip yo'nton ta xa'ie.

²²Ja'uc ti Joabe xchi'uc ti c'u yepal nabalic ta stojol ti Davide, ta jech to yepal, c'otic ti c'alal sutic talel ti bu ayic ta joyetel ta xanobale. Ep ti c'usitic yich'ojanic talel ti laj spojbeic talel ti scontraique. Taj une, ch'abal xa tey oy ma' ti Abner ta Hebrón xchi'uc ti David une, ja' ti jun xa yo'nton loc' batel ti c'alal c'oponat batel yu'un ti Davide.

²³C'alal jech c'ot ti Joab xchi'uc ti c'u yepal ti yajsoldadotac xchi'ucanoj batele, albat ya'i ti laj xa sc'opon sbaic xchi'uc ajvalil ti Abner xnich'on ti Nere, ti jun yo'nton loc' xa batel ti c'alal c'oponat xa loq'uel yu'un ti ajvalile.

²⁴Va'i un, ti Joabe xi laj yalbe ti c'alal bat sq'uel ti ajvalile: —¿C'usi laj apas, Jcuch Abtel? Ay svu'lanot ti Abnere ti aq'ueloj bat avu'une.

²⁵¿Mi yu'un mu xana' ya'yel, Jcuch Abtel, ti Abner xnich'on ti Nere ti naca tal lo'lavanuque, ti naca tal spa'i c'usi ta xapase, ti naca tal xchiquinta scotol ti c'usi ta xapas ti Jcuch abtelote?

²⁶Loc' batel ti Joab c'alal laj yo'nton ta sc'oponel ti Davide. Laj stac batel j'al-mantal j'ich'-c'opetic yo' jech ta sa'ic ti Abnere. Mu ja'uc jutebuc sna' ti David ti ta joc' to Sirá sut talel yu'unique.

²⁷C'alal c'ot ta Hebrón ti Abnere, jech ti Joabe laj yic' batel ta xocon sti' ti ochebal yu'un ti jteclume, ti slecoj bat sc'opon sbaique. Ti bu taje, laj syayijesbe xocon ti cham yu'une. Laj spacbe sutel ti cham ti Asael ti xchi'il sbaic ta voq'uele.

²⁸Ts'acal to un, c'alal laj ya'i ti Davide, xi laj yalbe ya'ie: “Ti vu'une xchi'uc ti jvinictaque, ta sba ta sat ti Diose, ch'abal jmul ta j'ech'el ti jech laj yich' milel ti Abner xnich'on ti Nere.

²⁹¡Cajal c'otuc ta sba ti Joabe, xchi'uc scotol ti yalab xnich'nabe, ti malmunuc o ti ya'lelique, mi ja' ti c'a'emale, mi ja' ti coxovile, ma'uc ma' ti ch'ab xi sc'oplal ta xlajic ta milele, ta xlajic ta vi'nale!”

³⁰Ti Joabe xchi'uc ti Abisaie laj smilic ti Abnere, yu'un ti c'alal syaquil ti letovajel ta Gabaone, ti Abnere laj smil ti Asael ti ja' xchi'ilic ta voq'uele.

³¹Ts'acal to un, ti Davide xi laj yalbe ti Joabe xchi'uc ti c'u yepal ti xchi'iltac svoloje: “Ch'i'ic ta jatel ti ac'u'ique. Jatantic xa ac'u'ic lapic liquel. Oyucoxuc ta vul o'ntonal yu'un sme'inalil ti jlajel jtubel Abnere.” Tijil batel ti ajvalil David ta spat ti bu poybil batel ti animae.

³²Laj smuquic ti Abner ta Hebrone. Ti bu taje, lic smil sba ta oq'uel ti ajvalil ta sba smuquinal ti Abnere. Jech lic spasic scotol ti chi'invanejetique.

³³Va'i un, ti ajvalile xi lic sliques q'uejimol oq'uel sme'inalil ti Abnere: “¿C'u cha'al jech c'ot ta atojol ti lacham lalaje, Abner, ti mu'yuc xa jech buch'u xc'ot ta stojole?

³⁴Mu'yuc chucul ti ac'obe, mi ja'uc chucul ta carina taq'uin ti avacane. C'ot ta atojol lacham jech c'u cha'al ta xmilat yu'un ti jchopol o'ntonetique.” Ja' jech xtoc xnechet no'ox liquel ta oq'uel ti jteclum ta yoq'uitael ti Abnere.

³⁵Laj taj une, lic sc'anbeic vocol ti Davide ti ac'o ve'uc jutebuc ti mu to ta xmal ech'el ti c'ac'ale. Ja'uc ti David une xi laj sva'an sba ta yalele: —¡Tsots ac'o xistsitsun Dios mi ta jtun ta jlajes jutebuc pane, mi yan ti c'usi ta jlajes c'alal mu to ta xmal ti c'ac'ale!

³⁶Scotolic laj ya'ibeic xchiquinal, lec laj ya'iic. Scotol ti c'usi ta spas ti ajvalile, lec ta xilic ti jteclume.

³⁷Ti jech c'ac'al taje, lic sna'ic scotol ti israeletique ti mu'yuc stic'oj sba ti ajvalil ti cham ti Abner xnich'on ti Nere.

³⁸Laj taj une, ti Davide xi laj yalbe ya'i ti yaj'opisialtaque: —Ti c'ac'al avi tana li'e, xana'ic xa lec ti li' ta Israele, cham jun banquilal ti ich'bil ye sti'e.

³⁹Jech o xal ti vu'un une, manchuc mi ajvalilun ti t'ujbilun yu'un ti Diose, laj to me ya'yel ma' ti yipal une ta scoj ti ech'em xa'i sbaic xnich'nab ti Sarviae. ¡Ac'o tojbatuc yu'un Dios ti buch'u laj stic' sba ta spasel ti vi s'elan toj chopol c'ot ta pasele!