Read Tzotzil 2 Samuel 6 Bible Online

2 Samuel 6 - Tzotzil bible

2 Samuel 6

¹Ti lajuneb xcha'vinic ta mil (30,000) soldadoetic ti t'ujbilic ta Israele, yan to velta lic tsobaticuc yu'un ti Davide.

²Xvoletic loq'uel xchi'uc ti c'u yepal ti yajsoldadotac xchi'inoj ta Baalá ti oy ta Judae yo' ta xich' loq'uel ti xcaxa Dios ti scotol xu' yu'un ti chotol ta spas mantal ti bu va'al ti chib sloc'obbail ti ánjele.

³Laj stiq'uic ochel ta jun ach' carreta ti xcaxa Diose. Laj yich'ic batel c'alal to sna ti Abinadab ti oy ta stenlejal jol vitse. Ja'uc ti Uzae xchi'uc ti Ahioe, xnich'nab ti Abinadabe, ta xtojobtasvanic ta yiq'uel ech'el ti ach' carretae.

⁴Ti c'alal yich'ojic batel ta sna ti Abinadab ti oy ta stenlejal jol vitse, jba'be ech'el ti Ahioe.

⁵Ja'uc ti Davide, xchi'uc scotol ti israeletique, xq'uejinic, x'ac'otajic no'ox ti bu xa c'alal xu' yu'unic ta stojol ti Diose, ti co'ol ta xyal yoquic xchi'uquic ti c'u s'elan ta xich' tijel ti vobe, ti arpae, ti chij-chij taq'uine, ti c'usi yan stac' tijele, xchi'uc ti set-set taq'uine.

⁶C'alal c'otic ti bu ojtiquinbil smajobil ts'unubal yu'un Nacón ti xie, ti Uzae laj xach' batel sc'ob yo' ta xicbe xcaxa ti Dios ta scoj ti macal c'ot yacan ti vacaxe.

⁷Toj ilinel c'ot ti Dios ti jech laj stic' sba ti Uzae. Ta jech to yepal tubbat sc'oplal ti toj chamel c'ot yal ta lum ta sts'el xcaxa ti Diose.

⁸Lic svul yo'nton ti David ti tubbat sc'oplal yu'un Dios ti Uzae. Jech o xal ti bu taje, laj yac'be sbiin Peres-uzá, ti jech sbiinoj avi tana le'e.

⁹Ep lic xi'uc ti David ti jech c'ac'al taje, ti xi lic avanuque: “¡Mi ja'uc juteb ta xquich' batel xcaxa ti Diose!”

¹⁰Ti jech mu xa sc'an xich' batel xcaxa Dios ti David ti sbiinoj Steclumal ti Davide, laj yal mantal ti ac'o yich'ic batel ta sna jun vinic, Obed-edom sbie ti liquel talel ta jteclum Gate.

¹¹Oxib u com ti xcaxa Dios ta sna ti Obed-edome, ti laj sta ti ts'uiltasatic yu'un ti Diose xchi'uc ti c'u yepal oy ta snae.

¹²C'alal albat ya'i ti David ti ta sventa xcaxa Dios ep laj sta c'uxubinel ti Obed-edom xchi'uc ti c'u yepal oy ta snae, xchi'uc scotol ti c'usi x'ayan yu'une, xmuyubaj xa ti Davide bat sloq'ues talel ti xcaxa Dios ta sna ti Obed-edome, yo' jech ta xich' batel ti David ta jteclum ti yac'ojbe sbi Steclumal Davide.

¹³C'alal laj xa ox stec' vacteq'uel yoquic ti buch'u ta xich'ic batel ti xcaxa Diose, ti Davide laj yac'be yich' vocol ta smilel jcot tot vacax xchi'uc jcot tot chij ti lec jubemique.

¹⁴Ja'uc ti Davide slapoj ech'el ti luchbil jayal saquil c'u'ile, ti x'ac'otaj no'ox ti bu xa c'alal xu' yu'une.

¹⁵Ti jech yich'ojic batel ti xcaxa Diose, jech ti stuque xchi'uc scotol ti israeletique, xmuyubajic no'ox ta avanel xchi'uc ta yoq'uisanel ti oq'uesetique.

¹⁶C'alal c'ot ti xcaxa Dios ta Steclumal ti Davide, ti Micale, yantsil nich'on ti Saule, toj c'otel ta sat ti natic no'ox xbitbun ta ac'otajel ta stojol Dios ti David ti c'alal cujul laj sq'uel loq'uel ta ventanae. Toj c'otel ta yo'nton ti mu'yuc c'usi xa xtun o laj yil ta j'ech'ele.

¹⁷Ti xcaxa Diose, laj yich' ich'el batel. Laj yich' aq'uel ta yavil ta yut axibalna ti chapal xa ono'ox yu'un ta meltsanel ti Davide. Laj taj une, ti Davide laj yac' chic'bil matanal xchi'uc matanal sventa lajesobil o'ntonal ta stojol ti Diose.

¹⁸C'alal laj yo'nton ta yaq'uele, laj sts'uiltas ti jteclum ta sventa ti Dios ti scotol xu' yu'une.

¹⁹Scotol ti c'u yepal oy ti israel viniquetique, ti antsetique, laj yac'be ech'el jujubej pan, jujuti' beq'uet, jujubej pan ti capbil ta taquintasbil sat uvae. Ts'acal to un, scotolic sutic ech'el ta snaic.

²⁰Ja' jech ec ti Davide sut ech'el ta sna yo' jech ta sts'uiltas ti c'u yepal oy yu'une. Ja'uc ti Mical yantsil nich'on ti Saule, xi laj yal ti c'alal bat snup ta bee: —¡Sc'otebal xa o yilel ma' yuni c'oplal ti ajvalil yu'un ti Israel avi tanae, ti laj yac' ta ilel ta sba ta sat ti sme' mosovtac ti yajtuneltaque, ti ja' xa xchi'il c'ot ti buch'u mu sna xq'uexavique!

²¹Xi laj stac' ti Davide: —Jech xaval ava'uc ti li'ac'otaje. Le'e, ja' sventa ti Dios ti laj st'ujun stuque yo' jech laj jcuchbe yabtel ti atote, xchi'uc ti ta xic'ot ta jtsobvanej yu'unic slumal ti Israele. Jech o xal li'ac'otaj ta stojol.

²²Ti avaloj ti mu'yuc c'usi bal oe, ta xavil liquel ti x'ech' to ta jpase, ti ta xcac'be yipal ti xjelav to ta jpas liquel ti ta xc'ot ta pasel ti mu'yuc xa c'usi bal o ti jc'oplal yilele, ti ich'bilun ta muc' ta xic'ot yu'un ti me' mosoviletic ti laj ac'oplaltae.

²³Ti c'u sjalil cuxul ti Micale, mu'yuc xa laj yil mi junuc yol.