Read Tzotzil 1 Reyes 10 Bible Online

1 Reyes 10 - Tzotzil bible

1 Reyes 10

¹C'ot ta sni' ta xchiquin ti me' ajvalil yu'un Sabá ti laj ya'i ti puquem sc'oplal ta j'ech'el ti Salomón ti laj sta ta sventa ti Diose. Ja' yu'un un, tal sjac'be ti c'usitic vocol ta a'yibel ti smelole yo' jech ta sq'uelbe yo'nton.

²Jun no'ox yutsilic xvoletic vulel ta Jerusalén xchi'uc yajtuneltac, scamellotac ti xcuchojanic talel ti muil poxiletique, ti epal oroe, xchi'uc ti c'upil sba tonetique, lic xchap ti c'ot ta stojol Salomón ti c'usi snopoj ono'ox ta sjac'be ya'ie.

³Lec tac'bat sutel yu'un Salomón scotol ti c'usitic laj sjaq'ue. Mi ja'uc jbeluc ma' ti mu'yuc laj sna' ti c'usitic ta xjac'bate.

⁴C'alal laj yil ti me' ajvalil yu'un Sabá ti ech'em sbijil ti Salomone, ti c'u s'elan smeltsanoj ti snae,

⁵ti c'u s'elan yutsiquil ti sve'el ta slajes ti oy ta sba xmexae, ti c'u s'elan yutsil snaic ti yaj'opisialtaque, ti c'u s'elan oyique, ti c'u s'elan ti sc'u'ic ti yajtuneltaque, ti jbis uch'ubajele, ti ta xac' ti chic'bil matanal ta ch'ulnae, ch'ayal yo'nton ta xc'ot xchi'uc.

⁶Xi laj yalbe ya'i ti ajvalile: “Ti c'u s'elan laj ca'i sc'oplal ta jlumal ti avabtele, ti abijile, melel ono'ox ca'itic.

⁷Ja' no'ox xu' ta jch'un ti tal jq'uele, ti laj quil ta jba ta jsat jtuque. Ta melel unbi, mi ja'uc jutebuc o'lol ma' ti c'u yepal ca'binoj ti slo'iltaele, ti abijile, ti c'usi x'ayan avu'une, x'ech' to yepal ma' ti c'u cha'al ca'binoje.

⁸¡Mu'yuc xa ono'ox c'usi xal yo'ntonic ma' ti avajniltaque! ¡Xmuyubaj no'ox yo'nton ta xa'iic ma' ti avajtuneltac ti li' oyique, ti li' ono'ox oyic ta atojol ta xa'iic ti sbijil ti ac'opojele!

⁹¡Lequil-c'optabiluc ta j'ech'el ti Dios avu'une, ti lec laj yilot ta sba ta sate, ti laj stic'ot ta ajvalil yu'un ti Israele! ¡Ti jech ayanem ti syail xc'uxul yo'nton ti Dios ta sventa ti Israele, la'och ta ajvalil yu'un yo' jech lec ta xaventain, yo' jech oy stuq'uil ta xachapanvan!”

¹⁰Ti me' ajvalil une laj yac'be jelavel ti ajvalile, cha'vinic sc'an xc'ot ta xchanmilal (3,960) kilo ti oroe, epal muil poxiletic, xchi'uc c'upil sba tonetic ta ts'acal toe. Mi ja'uc oy bu c'otem ta Jerusalén jech yepal muil poxiletic jech c'u cha'al laj sq'uelan ti me' ajvalil yu'un Sabá ta stojol ti ajvalil Salomone.

¹¹Ja' jech xtoc ti jbolomajel ta barco yu'un ti Hiram ti laj staic ti oro ta banomil Ofire, laj yich'ic talel sándalo te'etic, xchi'uc ti c'upil sba tonetic ti bu to c'alal taje.

¹²Ta sventa ti sándalo te'etique, laj sjil ta cholel ta sventa xchac' te'al ti ch'ulnae, xchi'uc xchac' te'al ti sna ajvalile. Ta sándalo te' laj yac' ta meltsanel xtoc ti arpae, ti vob sventa ta stijic ti jbaj-vobetique. Mu bac'niuc xc'ot o, mi ja'uc oy xa bu xvinaj avi tana le'e, yepal ti sándalo te'etique.

¹³Ja'uc ti ajvalil Salomone laj yac'be ech'el ti me' ajvalil ta Sabá ti c'usitic c'anbat yu'une, xchi'uc ti c'u to yepal loc' ayan ta yo'nton stuc ti laj yac'be ech'el ta sventa smotone. Ti me' ajvalil une chi'inbil sut ech'el ta slumal yu'un yajtuneltac ta ts'acal to une.

¹⁴Ti jujun jabil ta xich' oro ti Salomone, ja' nan chibuc xcha'vinic mil (22,000) ta kilo.

¹⁵Ja' mu'yuc tsacbil ta atel ti patan ta stojic ti jchonolajeletique, ti jbolomajeletique, xchi'uc ti ta xaq'uic spatanic scotol ti ajvaliletic ti oyic ta Arabia banomile, xchi'uc ti ajvaliletic yu'un ti lume.

¹⁶Ti ajvalil Salomone laj yac' ta meltsanel lajunvinic (200) ta sep lec muc'tic macobbail ti ulesbil ta oro ti yich'oj vaquib (6) kilo yalal ti jujune.

¹⁷Laj yac' ta meltsanel xtoc vo'lajunvinic (300) ta sep macobbail ti lec no'ox tsayajtique, ti yich'oj nan o'lol xchibal (1.50) kilo ti jujune, ti ulesbil ta oroe. Bat yac' ta ti'na ti sbiinoj “Pimil Te'etic yu'un Libanoe”.

¹⁸Ja' jech xtoc laj yac' ta meltsanel jun muc' ta saquil chotlebal ta saquil baxton, ti laj yal mantal ti ac'o yich' bonel lec ta bats'i oroe.

¹⁹Ti muc' ta chotlebal taje, yich'oj vac-coj stec'obal. Setel yich'oj ti smac spate. Oy scajleb c'abal ta jujujot xocon ti chotlebale, ti cotajtic cha'cot sloc'ol león ta sts'ele.

²⁰Ta jujucoj tec'obal xtoque, cotajtic lajcha'cot sloc'ol león, ti jujucot cotajtic ta jujujot sti'il ti tec'obale. ¡Mu'yuc buch'u yan ajvaliletic smeltsanoj co'ol sba ti va'i s'elan taje!

²¹Ma'uc no'ox taje, scotol sbistac ti ajvalile, naca ta oro. Ti ta stunes ta na ti sbiinoj “Pimilal Te'tic yu'un Libanoe”, naca pulajtic bats'i oro xtoc. Mi junuc ta plata meltsanbil, yu'un tsulul to ox stojol ta j'ech'el ti c'alal ja' o yorail ti tiq'uil ta ajvalil ti Salomone.

²²Yu'un ti barcoetic ta Tarsis ti ja' yu'un ti ajvalile, jmoj xchi'uc ti barcoetic yu'un ti Hirame, jun velta ta xc'ot ta jujun to ox-ox jabil ti xcuchojic c'otel ti oroe, ti platae, ti saquil baxton ti ja' marfil sbie, ti maxetique, xchi'uc ti te'tical tuluc' mut ti pavo real sbie.

²³Ti ajvalil Salomone, jelavem cuchem yu'un ta sventa ti sc'ulejale, ta sventa ti sbijile, ja' mu sta scotol ti ajvaliletic ti oyic ta sjunul banomile.

²⁴Scotol banomil sc'an ta sq'uelic ya'iic, ti ta xa'i ya'iic sbijil ti ac'bil yu'un ti Diose.

²⁵Scotolic xi s'elan ta xich'beic batel smoton jujun jabile: ti platae, ti oroe, ti c'u'iletique, ti abtejebaletique, ti c'usitic oy smuil ta a'yiele, ti ca'etique, xchi'uc ti mulaetique.

²⁶Ti Salomone lic svol ta tsobel ti carretaetique xchi'uc jcajlejetic ta ca'. Oy yu'un jmil xchi'uc chanib ciento (1,400) ta cot ti carretaetique, xchi'uc lajcha'mil (12,000) ta vo' ti jcajlejetic ta ca'e, ti laj yac'be sventain ti bu tiq'uil ti carretaetic sventa ti ac'ob-letoe ta scotol ti jchabivanejetic yu'un ti Jerusalene.

²⁷Ti Salomone c'ot ta pasel yu'un ti epaj talel ta j'ech'el ti platae, ti co'ol s'elan ti tonetic sbuset ta Jerusalene. Sbuset no'ox yu'un ti ch'ut te'etic ta j'ech'ele ti co'ol s'elan jech c'u cha'al ti sbuset ti colem icux ti oy ta stenlejale.

²⁸Ti ca'etic yu'un ti Salomone, ti ta Muzrie, ti ta Ciliciae, ta xiq'uic talel ti jbolomajeletic yajtuneltac ti ajvalile, ti ta smanic talel ti bu taje.

²⁹Ti jcot carreta ti meltsanbil ta Egiptoe, vaquib ciento (600) ta sep plata taq'uin ti stojole. Ti jcot ca'e, lajuneb xvaxacvinic (150) ta sep plata taq'uin ti stojole. Scotol ti ajvaliletic yu'un ti hititaetique, ti sirioetique, ta smanic ta stojol yajchonolajel ti Salomone.