Read Tzotzil 1 Reyes 13 Bible Online

1 Reyes 13 - Tzotzil bible

1 Reyes 13

¹C'alal yacal ta xchic' pom ti Jeroboam ta sba ti altare, c'ot jun j'alc'op ta Betel ti tacbil ech'el yu'un ti Dios ti liquel ech'el ta Judae.

²Ta sventa smantal ti Diose, xi tsots avan ta scontrainel ti altare: “Altar, altar, ti Diose xi laj yale: ‘Ta sventa snitilul ti Davide, ta x'ayan talel jun olol ti sbiinoj Josías ti ta xchic' ta atojol ti paleetic yu'un ti jujun c'opojebaletic ti nopbil no'ox yu'un stuquic ti laj xa xchiq'uic ti pom ta atojole, xchi'uc ta xac'ot yu'unic ta xchic'obil sbaquiltac ti animae.’ ”

³Ta yorail no'ox ti jech c'ac'al taje, ti j'alc'ope xi laj yal ti laj yac' ta ilel ti smuc'ul stsatsale: “Ja' jech ta xac' ta q'uelel smuc'ul stsatsal ti Dios ti laj yal ti ta spase: Ti altar li'e ta xlilij. Ti stanil ti oy ta sbae, tan puc ta xvil batel.”

⁴C'alal laj ya'i ti Jeroboam ti laj yalbe sc'oplal altar ti oy ta Betel ti j'alc'ope, xi laj yal ti bich c'obtavan ta toyol ta altar toe: “¡Tsaquic ya'i le'e!” Ti sc'ob ti laj xbich ta toyole, te'lucan com o, mi ja'uc xa xu' ta xpux sutel.

⁵Ta jech to yepal un, lilij ti altare. Ti stanil ti oy ta sbae tan puc bat, co'ol jech c'u cha'al laj yalbe sc'oplal ti j'alc'op ti albat mantal yu'un ti Diose.

⁶Va'i un, ti ajvalile xi laj yal ti nopaj ech'el ta stojol ti j'alc'ope: —Avocoluc, c'opono ta jventa ti Ajvalil Dios avu'une yo' jech ta xpoxtaj ti jc'obe. Ti j'alc'ope laj sc'anbe vocol ti Diose. Sc'ob ti ajvalile poxtaj. Laj sta yav jech c'u cha'al ta ba'yele.

⁷Ti j'alc'ope xi albat yu'un ti ajvalile: —Batic ta jna yo' jech ta xcac'bot jutebuc ave'el, ti ta xcac'bot junuc amotone.

⁸Ja'uc ti j'alc'ope xi laj stac'be ti ajvalile: —Manchuc mi ta xavac'bun ololuc ti c'usi oy ta anae, mi ja'uc xbat jchi'inot. Mi ja'uc ta jve' bejuc pan. Mi ja'uc xcuch' vo' li'e.

⁹Yu'un xi laj yalbun mantal ti Diose: ‘Mi ja'uc xave' jbejuc pan. Mi ja'uc xavuch' vo'. Mi ja'uc xa ta xasut talel ta be ti bu la'ech' to oxe.’

¹⁰Ti j'alc'op une yan o xa be stam batel. Mi ja'uc xa bat ta sbelel ti Betele.

¹¹Ti jech yorail ta vo'ne taje, oy jun mol j'alc'op nacal ta Betele, ti lo'iltabat yu'un ti xnich'nab scotol ti c'usi laj spas ti j'alc'op ti liquel ech'el ta Judae, xchi'uc ti c'usi laj spas ta Betel ti jech c'ac'al taje, xchi'uc laj slo'iltabeic ya'i stotic ti c'u s'elan laj yal ti ajvalile.

¹²Xi jac'bat yu'un ti stotique: —¿Bu jotucal beal bat taj une? Albat ya'i yu'un ti xnich'nabe ti bu jotucal laj stam ech'el ti j'alc'op ti liquel batel ta Judae.

¹³Va'i un, xi laj yalbe ti xnich'nabe: —Lapbeic siya ti jburroe. Laj slapbeic silla ti sburroe, ti caji ech'el ti j'alc'ope.

¹⁴Bat sta ta be ti j'alc'op ti liquel ta Judae. Chotol ta yolon jpets tulan laj sta, ti xi laj sjac'bee: —¿Mi vo'ot ti j'alc'op ti liquelot talel ta Judae? —Vu'unun —xi laj staq'ue.

¹⁵—La', batic, ba jve'tic jbejuc pan ta jna —xi ti mol j'alc'ope.

¹⁶Ti j'alc'op ti liquel talel ta Judae xi laj staq'ue: —Mi ja'uc xu' xi'och ta ana ta xchi'inelot ta ve'el ta yuch'el vo' li'e.

¹⁷Yu'un ti Diose xi laj yalbun ta jamal ti mantale: ‘J'ech'el mi ja'uc xave' pan, xavuch' vo' ti li'e. Mi ja'uc ta xasut talel ta be ti bu la'ech' to oxe.’

¹⁸Ja'uc ti mol une xi lic yalilan ti naca ta sjute: —J'alc'opun ec jech c'u cha'al ti vo'ote. Ta sventa ti jun yaj'anjel Diose laj yalbun mantal ti ta xquic'ot batel ta jnae, ti ta xcac'bot ave'el avuch'ome.

¹⁹Ti j'alc'op ti liquel talel ta Judae bat xchi'uc ta ve'el, ta uch' vo' ta sna.

²⁰C'alal jmoj chotolic ta mexae, ti mol j'alc'op ti buch'u sut talel ta be yu'un ti j'alc'op ti liquel talel ta Judae, c'oponat yu'un ti Diose,

²¹ti xi tsots c'opoj ti mol ta stojol taje: —Ti laj yalbot ti Dios ti mu xave' xavuch' vo'e, mu'yuc xach'un ti jmantal laj yalbote.

²²Ja'uc le' une, lasut talel ta ve'el ta uch' vo' ti la'albat yu'un ti Dios ti mu jechuc xapase, mi ja'uc ta xba avich' muquel ti bu muculic ti amolmuc'totaque.

²³C'alal laj yo'nton ta ve'el ta uch' vo' ti j'alc'op ti liquel talel ta Judae, jech ti mol j'alc'ope lic slapbe siya ti burroe.

²⁴Jech ti j'alc'op ti liquel ta Judae bat ec. Ja'uc le' une, nupbil c'ot ta be yu'un jcot león ti mile yu'une, ti telel com ta bee. Ti burro une, ti leone cotajtic ta sts'el ti bu telel ti animae.

²⁵Taje, ja' o ech' jun chibuc jbeinel ti laj yilic ti telel ta be ti animae, ti cotol ti león ta sts'ele. C'alal c'otic ti jbeinel ta jteclum ti bu nacal ti mol j'alc'ope, laj yalbeic ya'i ti c'usi laj yilique.

²⁶Ti jech laj ya'ie, ti mol j'alc'op ti laj yalbe ya'i ti sut talel ta be yu'un ti june, xi avan: “Ja' ti jun j'alc'op ma' taje, ti laj sbajbe smantal ti Diose. Jech o xal ti Diose laj stac talel jcot león ti lilinat ta milele jech c'u cha'al laj yal ti Diose.”

²⁷Va'i un, laj yalbe ya'i xnich'nab ti lapbatuc siya ti sburroe, jech laj spasic.

²⁸Va'i un, ti mol j'alc'ope loc' batel ti telel ta be laj sta ti animae, ti cotol ta sts'el ti burroe, ti leone. Ti leone mi ja'uc slilinoj ta ti'el ti animae, ti burroe.

²⁹Va'i un, ti mol j'alc'ope laj spoy ti anima j'alc'op ti liquel talel ta Judae. Laj scajan muyel ta sburro. Sut batel xchi'uc ta slumal yo' jech ta xchabi, ta smuc.

³⁰Laj smuc ta smucobbail stuc, ti x'oc'olet xa ti xi laj yale: “¡Mu xa ono'ox cha'bel un, cuts' calal!”

³¹C'alal laj xa ox smuque, xi laj yalbe ti xnich'nabtaque: —C'alal mi lichame, muquicun ec jmoj xchi'uc ti bu laj jmuc ti yajtunel Diose. Jmoj me xamuquicun xchi'uc ti bu oy ti stuque.

³²Ta jbel sc'oplal, ta xc'ot ta pasel ta sventa smantal Dios ti laj yalbe sc'oplal ti altar ta Betele, xchi'uc ti contra x'ile ti jujun c'opojebaletic ti oy ta jteclumetic yu'un ti Samariae.

³³Manchuc mi jech un, mu'yuc laj yicta sba xchi'uc sbolil ti Jeroboame. C'ajomal no'ox lic sva'anan paleetic ta xch'ulna ti loc'obbail diosetic ta lume. Ti buch'uuc no'ox oy ta yo'ntone, ta xtiq'ueic ta pale yu'un ti Jeroboam ta sventa xch'ulna ti loc'obbail diose.

³⁴Ti jech laj yabtelan taje, ja' ta scoj ti laj sta smul snitilultac ti Jeroboame, ti c'ot ta tsutsel ti sc'oplalic ta j'ech'ele.