Read Tzotzil 1 Reyes 17 Bible Online

1 Reyes 17 - Tzotzil bible

1 Reyes 17

¹Ti j'alc'op Elías ti liquel talel ta Tisbe ta yosilal Galaade, xi laj yalbe ya'i ti Acabe: “¡Ta j'ech'el ta jva'an ta rextico ti Ajvalile, Dios yu'un ti Israel ti yajtunelune, ti mi mu xcale, mi ja'uc ta xac' jset'uc vo' ti jabil ta xtale, mu ja'uc ta xbaj jset'uc ts'ujul!”

²Jech o xal ti Eliase, xi albat yu'un ti Diose:

³“Loc'an batel li'e, xi xabat ta stuq'uil sloq'ueb c'ac'ale. Nac'o aba ta ch'in uc'um Querit ti oy ta stuq'uil sloq'uebal c'ac'al yu'un ti uc'um Jordane.

⁴Ti bu taje, ta xlic avuch' ti vo' ti oy ta uc'ume. Jech xtoc laj xa calbe ya'i mantal ti jojetic ta yich'belot batel ti ave'ele.”

⁵Ti Eliase jech laj spas jech c'u cha'al albat yu'un ti Diose. Bat, com nacluc ta sts'el ti ch'in uc'um Querit ti oy ta yeloval stuq'uil sloq'ueb c'ac'al yu'un ti uc'um Jordane.

⁶Ta sob ic'luman, ta mal c'ac'al, ta x'ich'bat batel pan xchi'uc beq'uet yu'un ti jojetique. Ja' ta spul yuch' ti vo' ta ch'in uc'ume.

⁷Ta jayib no'ox c'ac'al un, lic taquijuc ti ch'in uc'ume, ja' ti mu'yuc xa ta xac' ti vo' ta banomile.

⁸Va'i un, ti Diose xi laj yalbe ti Eliase:

⁹“Loc'an batel li'e, batan ta jteclum Sarepta ti oy ta Sidone, naclan ti bu taje. Laj xa jpas-mantal ta stojol jun me'unal ants ti nacal ti bu taje, ta yac'belot ti ave'ele.”

¹⁰Loc' batel ti Eliase, bat ta jteclum Sarepta. C'alal c'ot ta ochebal sti' ti jteclume, laj yil jun me'unal ants ti yacal ta stsob si'e. Va'i un, xi laj yavta ti laj yic' talele: —Avocoluc, ich'bun talel jutebuc vo' cuch' ta boch.

¹¹Bat xa ox yich' talel ti c'alal xi cha'avtaat yu'un ti Eliase: —Avocoluc, ich'bun talel jutebuc pan xtoc.

¹²Xi tac'bat yu'un ti antse: —Jamal ta xcal ta sba ta sat ti Ajvalil Dios avu'une, mi ja'uc oy jbejuc pan ti ta'ajem cu'une. Mu'yuc yan ti c'usi oy cu'une. C'ajomal no'ox oy juteb uni harina ti cac'oj ta yavile, xchi'uc juteb uni aceite ti oy ta jarrue. Yacalun ta stsobel yuni si'il caloj avie yo' jech xba jta'ajes ti ta jve'cutic xchi'uc ti cole. Mi laj jve'cutic une, ta xlic chamcuncutic ta vi'nal.

¹³Xi tacbat yu'un ti Eliase: —Mu loq'ueluc xaxi'. Batan ta xchapanel ti va'i s'elan laj avale. Ja'uc le' une, ti ninal harina ti oy avu'une, ba'yel xameltsanbun jbejuc uni pan ti xavich'bun talele. Xameltsan yan ta ts'acal to un ti ta xatunes xchi'uc ti avole.

¹⁴Yu'un ti Ajvalile, Dios yu'un ti Israele, laj yal ti mu xlaj ti harina ti oy ta yavil avu'une. Mi ja'uc ta xlaj ti aceite ti oy ta jarrue. Ja' to ta xlaj mi ta xac' taluc ti vo' ta banomil ti Diose.

¹⁵Ti me'unal antse bat, lic spas jech c'u cha'al albat yu'un ti Eliase. Ti stuque, ti yole, xchi'uc ti Eliase, oy ep c'ac'al ti ep sve'elique.

¹⁶Mi ja'uc laj ti harina ti oy ta yavile. Mi ja'uc laj ti aceite ti oy ta jarrue. C'ot ta pasel jech c'u cha'al laj yal ti Dios ta sventa ti Eliase.

¹⁷Ech' c'uc sjaliluc un, ta ts'acal to, yal ta chamel yol ti me'unal antse, ti tsots ta j'ech'el ti chamele, ti mu xa ja'uc xich' iq'ue.

¹⁸Va'i un, ti me'unal antse xi laj yalbe ti Eliase: —Xnich'on Dios, ¿c'u cha'al tal avoch'un ta c'op? ¿Mi yu'un tal avulesbun ta jol ti jmule, ti ta xcham avu'un ti cole?

¹⁹—Ac'bun talel ti avole —xi. Va'i un, pet xut ti olol oy ta sc'ob ti me'unal antse. Muy ech'el ta xcha'cojal na ti bu ono'ox oye. Lic spuch'an ta stem.

²⁰Ta jech yepal un, xi tsots lic sta ta c'oponel ti Diose: “Cajval, Ch'ul Dios, ¿mi ta to no'ox xavac'be yich' svocol ti me'unal ants li'e, ti c'alal li' jch'amunojbe ti sna ti ta xavac' chamuc ti yole?”

²¹Oxib velta ta anil laj slichan sc'ob ta stojol ti olole, ti xi tsots lic sc'opon ti Diose: “Cajval Dios, ¡ta jc'anbot vocol ti cuxesbun talel ti olol li'e!”

²²Ti Diose laj xchiquinta ti jech c'anbat vocol yu'un ti Eliase, ti c'ot ta pasel yu'un ti laj xcuxes talel ti olole.

²³Ta anil no'ox ti Eliase laj spet yalel ti olol ti oy ta xcha'cojal nae. Yal batel ta olon, ti xi laj yalbe ya'i ti sme' ti c'alal laj yac'be jelavele: —¡Q'uelo avil, cuxul ti avole!

²⁴Xi tac'bat yu'un ti antse: —Avi tana une, ta jna' ti ja' jun xch'ul nich'onot ti Diose. Ti c'usi ta xavale, yu'un ja' jech ta xal ti Dios ta melel cac'tique.