Read Tzotzil 1 Reyes 18 Bible Online

1 Reyes 18 - Tzotzil bible

1 Reyes 18

¹Ech' batel ti c'ac'ale. Yoxibal xa jabil ech'el, ta ts'acal to un, ti Diose bat sc'opon ti Elías ti xi laj yalbe ya'ie: “Batan ta stojol ti Acabe, yu'un ta xcac' taluc vo' ta banomil.”

²Ti Eliase bat, c'ot ta stojol ti Acabe. Ti vi'nal ta Samariae, toj tsots ta j'ech'el.

³Ti Acabe laj yic' talel ti Abdiase, ti buch'u sbainoj ti oy c'usi x'ayan yu'une, ti xi'taoje, ti sbic'tajesoj sba ta yich'el ta muc' ta j'ech'el ti Diose.

⁴Yu'un ti c'alal lic yac'anan ta milel yaj'alc'optac Dios ti Jezabele, ti Abdiase laj svol vo'vinic (100) ta vo'. Lic xch'ac ta cha'chop ta jujun lajuneb yoxvinic (50) ta vo' ta ts'acal to une, ti lic snac' ta chib nail ch'ene, ti laj yac'be ti c'u yepal ti c'usi ta stun ta slajesique.

⁵Ti Acabe xi laj yalbe ya'i ti Abdiase: —Chapano aba, ba jxanitic sbejel sbanomilal ti lume, xchi'uc scotol ti sat vo'etique, ti uc'ume. Jq'ueltic quic mi oy bu ta jtatic momoletic sventa ti ca'etique, ti mulaetique, yo' jech mu xchamic. Yan ti mi mu jechuque, laj me sc'oplal ma' ti chon bolometic cu'untic unbi.

⁶Ja' yu'un un cha'e, lic xch'ac sbaic ta jujun ta yosilal ti lum ti bu ta xba sq'uelique. Ti Acabe, yan o be ti bu bate. Ja'uc ti Abdiase, yan o be ti bu bat eque.

⁷C'alal ta xa xanav batel ta be une, ti Eliase loc' talel, tal snup ta be ti Abdiase. C'alal laj yojtiquin ti buch'ue, xi avan ti laj snijan xchiman sba ta stojole: ¡Vo'ot ca, yojtot Elías!

⁸—Ali vu'un la une —xi laj stac' ti Eliase—. Batan, ba albo ya'i ti avajval ti li' oyune.

⁹Ti Abdiase xi laj staq'ue: —¿Bu lijelav ti ta xavac'un ech'el ta yoc ta sc'ob ti Acabe yo' jech ta xismilun?

¹⁰Ta jamal ta xcalbot ava'i, ta sba ta sat ti Ajvalile, ti ja' Dios avu'une, ma'uc ma' ti mu junuc lume, mu junuc muc'tiquil lum ta sa'elot ma' ti cajval unbi. C'alal ta xtac'bat ti mu'yuc xayilique, ta x'albatic ti ac'o sva'anic ta rextico ti Dios ti jech mu'yuc xayilique.

¹¹¡Avi tana une, ta xac'anbun ti ac'o ba calbe ya'i ti cajval ti li' xa oyote!

¹²Ti c'usi ta xc'ot ta pasele, c'alal mi laj jch'ac jba batel li' ta atojole, ta xic'ot batel xcuxlejal ti Dios ti bu mi ja'uc xa ta jtaot ta sa'ele. C'alal xivilet xa batel ta yalbel ya'i ti cajvale, mi ja'uc xa ta staot ta sa'el, ta xismil un. Ti avajtunel li'e, ta sbic'tal ono'ox, lic xi'ta talel ti Diose.

¹³¿Mi yu'un mu'yuc albilot ava'i ti c'usi laj jpas ti c'alal yacal xa ta smilan yaj'alc'optac Dios ti Jezabele? Yu'un laj jnac' vo'vinic (100) ta vo', ti lajlajuneb yoxvinic (50) ta vo' laj jtic'an ochel ta chib nail ch'en, ti laj cac'beic ti sve'elic ti c'u yepal ta xtun yu'unique.

¹⁴¿C'u cha'al ya'yel avi tana un cha'e ta xavalbun ti ac'o ba calbe ya'i ti cajval ti li' xa oyote? ¡Ta j'ech'el unbi ta xismilun!

¹⁵Xi tac'bat yu'un ti Eliase: —Ta jva'an ta rextico ti Dios ti scotol xu' yu'une, ti ja' yajtunelune, avi tana li'e, ta jva'an jba ta stojol ti Acabe.

¹⁶Ti Abdiase bat ta sa'el ti Acabe yo' ta xalbe ya'i bu oy ti Eliase. Jech ti Acabe bat snup sbaic ta be xchi'uc ti Eliase.

¹⁷C'alal jech laj yile, xi laj yalbee: —¿Mi vo'ot xcaltic ti yacal ta xasoquesbe yo'nton ti Israele?

¹⁸—Ma'uc vu'un ta jsoquesbe yo'nton ti israeletique —xi laj stac' ti Eliase—, ja' ti vo'ot xchi'uc ti avinictac ta scoj ti mu xach'unbeic smantal ti Diose, ti laj abic'tajes abaic ta snijanel xchimanel abaic ta yich'el ta muc' ti ep ta tos sloc'obbailtac ti Baale.

¹⁹Taco batel avinictac ta stsobel scotol ti israeletique, ti baticuc ta vits Carmelo xchi'uc ti o'lol yo'obal ciento (450) ta vo' ti yaj'alc'optac ti Baale, xchi'uc ti chanib ciento (400) ta vo' yaj'alc'optac ti Aserae, ti ja' sbainoj ta smalq'uinel ti Jezabele.

²⁰Ti Acabe laj sta ta iq'uel scotol ti israeletique. Laj stsob scotol ti j'alc'opetic ti ac'o baticuc ta vits Carmeloe.

²¹Va'i un, ti Eliase xi laj yalbe ya'i ti lum ti nopaj ech'el ta sts'ele: —¿Bu to c'alal ta xac'an xac'ot ava'iic xchi'uc ti cha'tos snopobil avu'unique? Mi ja' bats'i Dios ti Ajvalil Diose, ts'acliic batel. Mi ja' Dios ti Baale, jechuc unbi, ts'acliic batel. Mi jbeluc c'usi laj stac' ti jteclume.

²²Ti Eliase xi lic yalilane: —Ti jech j'alc'opun yu'un ti Diose, jch'ul tuc xa no'ox ti li' to cuxulune. Ja'uc ti yaj'alc'optac ti Baale, oy o'lol yo'obal ciento (450) ta vo'.

²³Lec un cha'e, ac'buncutic talel cha'cotuc ch'in vacax. Ac'o st'ujic jcotuc ti stuquique. Sbic'tal bojilanicuc, ac'o scajanic muyel ta ba si'. Mu ja'uc ta sts'anbeic ti sc'ac'ale. Ta jchapan ec jcot ch'in vacax. Ta jcajan muyel ta ba si'. Mu'yuc buch'u ta jts'anbe ti sc'ac'ale.

²⁴Mi laj taj une, ta xlic staic ta c'oponel ti yajdiostaquique. Ta xlic jta ta c'oponel ti Dios eque. ¡Ti Dios ti ta stac' ti c'op ti ta stac talel c'oq'ue, ja' me ti bats'i Dios taj unbi! —Toj lec ma' taj ti va'i s'elan laj avale —xi laj staq'uic scotol ti jteclume.

²⁵Va'i un, ti Eliase xi laj yalbe ti yaj'alc'optac ti Baale: —T'ujic jcotuc ti ch'in vacaxe. Lic chapanic ba'yel, yu'un toj epoxuc. Mi laj une, xlic ataic ta c'oponel ti adiosique. Mi ja'uc xatilesic ti c'oq'ue.

²⁶Ja' yu'un un cha'e, laj stsaquic ti ch'in vacax ti ac'batique. Lic xchapanic. Xi lic yalic ti c'alal laj sliquesic ta sc'oponel ti Baal ti sjunul sob ic'lumane, ti jech yich'ojic o sta ti o'lol c'ac'al yu'unique: “¡Baal, tac'biluc ich'biluc c'otuc ta muc' ti jc'opcutic avu'une!” Ma'uc no'ox taje, yu'un xbitlajetic no'ox ta ac'otajel ta joyob ta altar ti laj sva'anic ta meltsanele. Mi jbeluc ti oy buch'u ta stac' talel ti sc'opojelique.

²⁷Sta xa ti o'lol c'ac'ale, lic labanvanuc ti Elías ti xi lic yalbee: —Tsots ac'o avavtaic, ja' dios ta xava'i une. Yu'un nan oy c'usi ts'ijil ta snop, mi ch'ayal yo'nton yu'un jtosuc yabtel, mi batem ta paxyal. Mi mo'oje, yu'un nan vayem ti sc'an tijele.

²⁸Jech ti stuquic une yac'ojbeic yipal ta avlajetel. Lic syayijesan sbaic ta cuchilu, xchi'uc ta yan o cuchilu jech c'u cha'al liquem ono'ox yu'unique, ti balom ch'ich' ta xcomique.

²⁹Ja'uc le' une, ech' ti o'lol c'ac'ale, staoj yav yac'ojbeic yipal ta avlajetel, ta bitlajetel ta ac'otajel jech c'u cha'al junuc chuvaj. C'alal c'ot xa yorail ta xich' aq'uel ti milbil matanale, mu'yuc xtac'bat ti sc'opique. ¡Mu'yuc buch'u laj stac'! ¡Mi ja'uc oy buch'u laj ya'i!

³⁰Va'i un, ti Eliase xi laj yalbe ti c'u yepal oyique: —Nopajanic talel li' ta jtojole. Ti c'u yepal oye nopajic batel ta stojol. Ti Elías une lic xcha'meltsan yaltar ti Dios ti jinem xae.

³¹Laj spet talel lajcha'bej ton jech c'u cha'al yepalic snitilultac ti Jacobe, ti biiltasat Israel yu'un ti Diose.

³²Lic smeltsanbe ta yaltar Dios. Laj spolbe sbeo'al ta joyob ta yoc ti altar ta ts'acal to une, ti x'och yu'un jtobuc (20) ta litro sat ts'unobale.

³³C'alal laj xa slatsbe lec ti si'il ta sbae, lic sbic'tal bojilan ti ch'in vacaxe, ti laj scajan muyel ta ba si'e.

³⁴Ta ts'acal to un, xi laj yale: —Nojesic ta vo' chanbejuc q'uib. Malic ta sba ti matanale xchi'uc ti si'e. Laj taj une, laj yal ti ac'o xa smalic jcojuque, ti c'ot xa ta xcha'cojale. Jech laj spasic ti stuquique, ti laj to smalic jcoj ti c'ot xa ta yoxcojale.

³⁵Xbalaq'uin no'ox ta xbein yalel ta joyob sba ti altare, xchi'uc noj ta vo' ti spul-pulil jots'bile.

³⁶Ti yorail xa ta xac' chic'bil matanal ti j'alc'op Eliase, nopaj ech'el ti xi tsots lic avanuque: “Ch'ul Ajvalil, Diosot yu'un ti Abrahame, ti Isaaque, ti Israele, ti xi'uc s'elan c'otuc ta pasel avu'un avi tana li'e: Vinajeso ti vo'ot Diosot yu'un ti Israele, xchi'uc ti vu'un avajtunelune, ti ta amantal atuc ti jech ta jpas scotol avi tana li'e.

³⁷Tsacbiluc, ich'biluc c'otuc avu'un ti jc'ope, Dios, tac'bun talel yo' jech ta sna'ic ti jnaclejetique ti vo'ot Diosote, ti ta xacha'tsob ta atojole.”

³⁸Ta jech to yepal taj une, ti c'oc' yu'un ti Diose, yal talel ti laj xchic' ti milbil matanale, ti si'e, ti tone, ti ts'ubilume, xchi'uc laj yules ti vo' ti ts'anal ta spul-pulil ti jots'bile.

³⁹Ti jech laj yilic scotol ti jnaclejetique, snupilanic xa banomil laj spatan sbaic ta lumtic ti xi laj yalique: “¡Ti Ajvalile, ja' Dios, ti Ajvalile, ja' Dios!”

⁴⁰Va'i un, xi albatic yu'un ti Eliase: —Tsaquic ya'i yaj'alc'optac ti Baale, ti mu junuc xcol avu'unique. Tsacbil c'otic yu'un ti jnaclejtique, ti ic'bil batic yu'un ti Elías ta uc'um Cisone. Laj yich'ic milel yu'un ti bu taje.

⁴¹Ts'acal to un, ti Eliase xi laj yalbe ya'i ti Acabe: —Batan ta ve'el ta uch' vo', yu'un xvinaj xa ta a'yiel ti xvo'o'et ta xtal ti banomilal vo' ta j'ech'ele.

⁴²Ti Acabe bat ta ve'el ta uch' vo'. Ja'uc ti Eliase muy batel ta vits Carmelo ti bu xa slajeb toyol ta j'ech'ele, ti snupilan xa banomil xquejelet xpatalet ta lumtique.

⁴³Va'i un, xi laj yalbe ti smosove: —Muyan batel le'e, q'uelo ech'el ta stuq'uil ti nabe. Muy ech'el, ti xi laj yal ta ts'acal toe: —Mu'yuc c'usi ta xvinaj. Xi albat ya'i yu'un ti Eliase: —Muyan batel vuc-cojuc.

⁴⁴Ta yuc-cojal une, xi laj yal ti mosovile: —¡Ti le' to ta nabe, yacal ta muyel ech'el uni toc ti jun ta c'abal s'elan yilele! Va'i un, ti Eliase xi laj yale: —Batan, ba albo ya'i ti Acabe ti ac'o stsoyanbe scarreta ti sca'e, ti batuc ta anil yo' jech mu xmaque ta be yu'un ti banomilal vo' ta xtale.

⁴⁵Ti Acabe muy ta scarreta, bat ta Jezreel. C'alal jech taje, ic'ub talel ta toc ti vinajele, yal tal ti banomilal vo' ta j'ech'ele.

⁴⁶Ja'uc ti Eliase, ac'bat yip yu'un ti Diose. Laj stsin lec ta chuquel ti sc'u'e, ti xbitet no'ox batel ta anil c'alal to Jezreele. Mu'yuc to xc'ot ti Acab ti c'alal c'ot ti stuque.