Read Tzotzil 1 Reyes 21 Bible Online

1 Reyes 21 - Tzotzil bible

1 Reyes 21

¹Ta ts'acal to ta sjalil un, c'ot ta pasel ti oy jun vinic ta Jezreel ti sbiinoj Nabote, ti oy yosilal yavil sts'unub uva ta jteclum taje, ta sts'el sna ti ajvalil Acab yu'un ti lum Samariae.

²Oy jun c'ac'al, ti Acabe xi laj yalbe ti Nabote: —Ac'bun yosilal ti ats'unub uvae yo' jech ta jts'un jts'unubal ec un, yu'un ta sts'el no'ox jna oy. Ta xcac'bot yan xq'uexol ti x'ech' to yutsil ta sventa le'e, mi mo'oje, ta xcac'bot ti c'u yepal ta xac'anbe stojol ta taq'uine.

³Ja'uc ti Nabot une xi laj stac'be ti Acabe: —Ma'uc calbe Dios ta xacac'be ti jrexto ti ac'bilun yu'un ti jtot jme'e.

⁴Vul o'nton xa, xtaqui capet xa ta xa'i sut ech'el ta sna ti Acab ta scoj ti va'i s'elan tac'bat yu'un ti Nabot ti mu x'ac'bat ti rextoil ti ac'bat comel yu'un ti stot sme'e. C'ot un, lic spuch'an sba ti joybijem xa sat sq'ueloj ech'el ta yibel nae, ti mi ja'uc sc'an xve'e.

⁵Va'i un, ti yajnil ti Jezabel sbie, nopaj ech'el ta stojol, ti xi albat yu'une: —¿C'u cha'al ya'yel un ti oyot ta vul-o'ntone, ti mu ja'uc xac'an xave'e?

⁶Ti Acabe xi laj staq'ue: —Mi lec ta xava'ie, laj jc'opon ti Nabot ta Jezreele. Laj calbe ya'i ti ac'o xischonbun ti yosilal sts'unub uvae. Ti mi mo'oje, laj calbe ya'i ti ta xcac'be yan xq'uexol ti xjelav to yutsile, ti mi lec ta xa'ie. Ja'uc le' une, mi ja'uc xc'ot ta yo'nton.

⁷Xi tac'bat yu'un ti yajnil ti Jezabel sbie: —¡Abainoj ta spasel ta mantal ti Israel ta xava'i une! Lican, ve'an quere, ech'uc xa ti slo'il avo'ntone. ¡Vu'un ta jchapanbe sc'oplal ta yu'ninbel yavilal sts'unubal uva ti Nabote!

⁸Ta ora no'ox lic sts'iba vun ta sventa sbi ti Acabe. Laj yac'be seyo ta sventa seyo ti ajvalile, ti laj stac batel ta stojol ti moletique, xchi'uc ta stojol ti banquilaletic ti nacalic ta jteclum ti bu nacal ti Nabot ta ts'acal to une.

⁹Ti jujulic ts'ibabil vune, xi ta xale: “Alic ti oy ictaej vaje, chotanic ta sba ta sat jteclum ti Nabote.

¹⁰Chotanic ta sts'el Nabot chib jut c'op rexticoetic ta ts'acal to une. Ac'o yalic ta jamal ti chopol ta xc'opoj ta stojol ti Diose, xchi'uc ti laj xa sbis ta cotol chaval ti ajvalile. Jochic loq'uel ta ts'acal to un. Pujbeic ton, milic ya'i.”

¹¹Ti viniquetic ti nacalic ta steclumal ti Nabote, ti moletique, ti banquilaletique, co'ol s'elan xi lic spasic ti c'u s'elan albatic ta vun yu'un ti Jezabele:

¹²Lic yalic ti oy ictaej vaje. Lic xchotanic ti Nabot ta sba ta sat ti jteclume.

¹³C'otic chib jut c'op rexticoetic ta ts'acal to un, lic yalic ta sventa scontrainel ti Nabot ta sba ta satic ti c'u yepal tsobolique. Jamal laj yalic ta j'ech'el ti chopol c'opoj ta stojol ti Diose, xchi'uc ta stojol ajvalil ti Nabote. Va'i un, laj xjochic loq'uel ta jteclum. Pujbil laj ta ton yu'unic.

¹⁴Laj taj une, laj staquic batel mantal ta stojol ti Jezabele, ti laj yich' pujbel ton ti Nabote, ti cham xae.

¹⁵C'alal jech laj ya'i ti Jezabele, xi laj yalbe ti Acabe: —Ba u'ninbo yosilal yavil sts'unub uva ti Nabot ti oy ta Jezreel ti mu sc'an ta xchonbot to oxe. Yu'un ti Nabote cham xa. Mu'yuc xa cuxul avi tana le'e.

¹⁶C'alal laj ya'i ti Acab ti cham xa ti Nabote, bat yu'ninbe ti yosilal sts'unub uvae.

¹⁷Va'i un, ti Diose xi laj yalbe ya'i ti bat sc'opon ti Elías ti liquel talel ta Tisbee:

¹⁸“La' ta anil, ba q'uelo ti Acab ajvalil yu'un ti Israel ti nacal ta Samariae. Avi tanae, oy ta yosilal yavil sts'unub uva ti Nabote, ti bat xa yu'ninbee.

¹⁹Xi xavalbe ya'ie: ‘Xi ta xal ti Diose: Ti jech laj xa amil ti Nabote, ti laj xa apojbe ti c'usi ja' yu'une, ti bu laj yich' lec'bel ta ts'i' ti xch'ich'ele, ta xich' leq'uel ta ts'i' ti ach'ich'el ec ti bu taje.’ ”

²⁰Ti Acabe xi laj stac'be ti Eliase: —Ti jech acontra une, laj ataun ta sa'el xcaltic ec un. Xi laj stac' ti Eliase: —Laj jtaot ta sa'el unbi yo' jech mu teyuc no'ox ta xapasolan ti spajebal o ti c'usi chopol ta sba ta sat ti Diose.

²¹Ja'uc tana le' une, xi ta xalbot ava'i ti Diose: ‘Ta jtac talel vocol ta atojol. Ta jtsutses ta j'ech'el scotol ti anich'nabe. Ta jmes ta tsutsesel scotol ti queremetic ti anitilultac ti oyic ta Israele.

²²Ma'uc no'ox taje, jech ta jpasbe scotol ti c'u yepal oy avu'un jech c'u cha'al laj jpasbe ti Jeroboam xnich'on ti Nabate, xchi'uc jech c'u cha'al laj jpasbe ti Baasa xnich'on ti Ahiase, ti laj sliquesbun sc'ac'al co'nton ta scoj ti laj sta smul yu'un ti Israele.’

²³Ja'uc ti Jezabele, xi albat sc'oplal yu'un ti Diose: ‘Ts'i' xa xve' o yu'un ti Jezabele ti javal ta yosilal ti Jezreele.’

²⁴Ti avuts' avalaltac ti ta xchamic ta yutil lume, ts'i' xa xve' o yu'unic. Ja'uc ti buch'utic ta xchamic ta osiltique, jti'oval mutetic xa xve' yu'unic.

²⁵(Mu'yuc xa yan ti x'ech' to chopol laj spas ta sba ta sat Dios jech c'u cha'al laj spas ti Acabe, ta scoj ti laj xch'unbe ti c'usi xal yo'nton ti yajnile.

²⁶Laj snijan xchiman sba ta yich'el ta muc' ti loc'obbailetique jech c'u cha'al ta spasic ti amorreoetique ti ta sba ta sat ti israeletic tenatic loq'uel yu'un ti Diose.)

²⁷C'alal laj ya'i ti Acab scotol ti va'i s'elan taje, lic xch'i' ta jatel ti sc'u'e. Lajemic xa lic slap ti sc'u'e. Laj yicta yot. Ja' jech ta xvay xchi'uc ti sc'u'e, ti xvulvun ta xa'i ti yo'nton yu'une.

²⁸Va'i un, ti Diose xi laj yalbe ya'i ti Eliase:

²⁹“¿Mi laj xa avil ti Acab ti biq'uit yac'oj sba ta jtojole? Ti jech biq'uit yac'oj sba ta jtojole, mu'yuc ta xcac'be svocol ti li' to cuxule, ja' xa smacoj ta xc'ot ti xnich'nabe.”