Read Tzotzil 1 Reyes 7 Bible Online

1 Reyes 7 - Tzotzil bible

1 Reyes 7

¹Ja'uc ti Salomone lic sliques ta smeltsanel ti sna stuque, ti ta yoxlajunebal (13) to jabil c'ot ta tsutsel yu'un lec scotole.

²Laj smeltsan xtoc jbej na ti “Pimilal Te'tic yu'un Líbano” laj yac'be sbie. Ti na taje yich'oj vo'ob yoxvinic (45) metro ti snatile. Yich'oj o'lol yoxibal xcha'vinic (22.50) metro ti sjamleje. Yich'oj o'lol xchanlajunebal (13.50) metro ti stayleje. Icbil ta chanchol ch'ut te' oyetic, ti cajal ta sba ch'ut te' ts'am-te'etique.

³Ti ts'am-te'etic taje yich'oj vo'ob yoxvinic (45) ta bej ta scotol. Ti jujutele yich'oj vo'lajunbej (15) ta oy, ti c'otem ta oxchol ta scotole. Ta sba ti ts'am-te'e, naca ch'ut te' tenel-te' yich'oj ti nichimtic no'ox luchbil loc'tabile.

⁴Pasbil oxjil ventana ti meltsanbil ox-ox ta jujujot ti yelovalinoj sbaique.

⁵Scotol ti ti'nae, ti ventanae, co'ol sjamlejiquil meltsanbil, ti yelovalinoj sbaic ti oy oxib ta jujujote.

⁶Laj yac'be yoyaltac scot-cotil smac ti yich'oj o'lol yoxibal xcha'vinic (22.50) metro ti snatile. Yich'oj o'lol xchanlajunebal (13.50) metro ti sjamleje. Ti ta yeloval taje, laj smeltsanbe yoyaltac jun cotcot na ti laj yac'be yaxibe.

⁷Ma'uc no'ox taje, laj smeltsan Snail ti C'anob Partee, mi mo'oje, Snail ti Chapanobbaile ti bu xa spajeb ti chapanele, ti ta naca ch'ut te' stenel-te'al laj yac'be ti smac yolone.

⁸Ti bu nainem ta na ti Salomone, oy yamaq'uil ta spat, xchi'uc jc'ol ti co'ol pasbile. Yan ti jbej na meltsaj ta sventa yantsil nich'on ti faraón yic'ojbee, co'ol jech c'u cha'al meltsanbil ti yane.

⁹Scotol ti c'u s'elan laj yich' meltsanele, ti ta sliquebal ti stsaclebe, ti yelovaltaque, ti muc' ta amaq'ue, bats'i toyol stojol ti ton ta j'ech'ele. Yu'un anbil, bojbil lec ta sierra taq'uin ti tone yo' jech lec ta sta ti yav jujun ta yut ta spate.

¹⁰Yic ti sliquebal yoque, naca ton ta j'ech'el ti lec muc'tique, ti toyol stojol ta j'ech'ele, ti yich'oj o'lol yo'obal (4.50) metro ti sjamlej ti jlome. Yich'oj oxib metro oxchix xchi'uc jquejlej (3.60) sjamlej ti jlome.

¹¹Ti pac'bal ti laj yich' muyele, naca anbil ton ti lec bisbil c'u spimiquil yich'oj ti toyol stojole, xchi'uc naca ch'ut-te' ti te'etic tune.

¹²Ta sjoylej ti muc' ta amac' yu'une, ac'bil oxjil ton xchi'uc jil chantsel ch'ut te' co'ol jech c'u cha'al pasbil ta ochebal scot-cot nail xch'ulna ti Diose.

¹³Ti Salomone, ta Tiro to, laj yic' talel ti Hirame.

¹⁴Ti Hiram taje, ja' squerem ol jun me'unal ants ti liquel talel ta stojol snitilultac ti Neftalie, ti ja' jun bats'i jnaclej ta Tiro ti stote, ti xtojob lec ta yabtelanel ti c'anal taq'uine. Ti Hirame, baxbol xchi'uc oy lec sbijil ti xtojob lec ta yabtelanel ti c'anal taq'uine. Bat ta stojol ti Salomone, lic sliquesbe ti yabtel ti c'u s'elan sc'an pasele.

¹⁵Laj yunijes c'anal taq'uin ta sventa chib ti c'usi bal-bal ta sva'an muyele, ti yich'oj vaxaquib (8) metro ti stayleje, ti yich'oj o'lol svaquibal metro (5.50) ti sbalej liquem muyele.

¹⁶Ta c'anal taq'uin, laj yac'be xnichimal sjoltac ti bu c'ot ta tsutsele. Staylej ti xnichimaltac sjol ti jujune, yich'oj chib metro jch'ix xchi'uc jquejlej (2.25).

¹⁷Ma'uc no'ox taje, yu'un xi s'elan laj yac'be xchaj-chaj taq'uinal smac ti yich'oj xnichimaltac ti co'ol s'elan jalbil carina loc'tabile: Oy lec smac ti jujun xnichimaltac sjol ti oy ta toyole.

¹⁸Laj yac'be cha'chol sloc'ol sat granada ti chaj-chaj taq'uin yo' jech smacoj lec ti xnichimal sjol ti c'usi bal-bal va'ajtic muyele. Mu jeleluc xnichimal ti jujune.

¹⁹Jutuc mu chibuc metro staylej ti lirio nichim xa s'elan yilel ti bu c'ot ta tsutsel xnichimaltac sjol ti c'usi va'ajtic muyel ti oy ta sts'el scot-cotiltac ti ochebale.

²⁰Ta sjoylej svol-volil ti bu liquem muyel stsutseb xnichimaltac sjol ti nabal liquel ta xchaj-chaj taq'uinale, yich'oj lajunvinic (200) ta bej sloc'obbail sat granada ti naca ta cha'chol yich'oj ta joyob ti jujune.

²¹Ti Hirame lic sva'an ti c'usi balajtic ta ochebal sti' ti ch'ulnae. C'alal laj xa sva'an muyel ti bu ta xcome, ti oy ta stuq'uil bats'i c'obe, laj sbiin yu'un Jaquín. Ja'uc ti jun ti oy ta stuq'uil ts'et c'obe, laj sbiin yu'un Boaz.

²²Ti c'alal c'ot ta tsutsel ti abtele, lirio nichim xa s'elan yilel ti bu c'ot ta tsutsel xnichimaltac sjol ti c'usi va'ajtic muyele.

²³Ts'acal to un, ti Hirame laj smeltsan ta c'anal taq'uin jbej muc' ta pilail vo'. Set-set laj smeltsan. Yich'oj o'lol yo'obal (4.50) metro ti sjamlej sti' ta joyobe. Yich'oj chib metro jch'ix xchi'uc oxc'ob (2.25) ti stayleje. Ti sjamalil sti' ta scotole, yich'oj o'lol xchanlajunebal metro (13.50).

²⁴Ta joyob yolon svelbenal sti'il ti yavil vo'e, oy loc'tabil volajtic sat te' ti cha'ch'ix xchi'uc chanbej c'ob (45 cm.) snatil yiloj sba ta jujun lajlajunchol (10) ti jun no'ox snitoj sba xchi'uc ti yavil vo'e.

²⁵Taje, comon cuchbil yu'unic ta lajcha'cot loc'obbail tot vacaxetic ti meltsanbil ta c'anal taq'uine. Oxcot sq'ueloj ech'el ta stuq'uil yolon ti yolon xocon sloq'ueb c'ac'ale. Oxcot sq'ueloj ech'el ta stuq'uil yolon ti yac'ol xocon sloq'ueb c'ac'ale. Oxcot sq'ueloj ech'el ta stuq'uil sloq'ueb c'ac'al. Oxcot sq'ueloj ech'el ta stuq'uil smaleb c'ac'al. Ti svalopat oque, teq'uel ochel ta yolon, ti lec scomon cuchojic ti yavil vo'e.

²⁶Ti spimil meltsanbil ti jbej yavil vo'e, yich'oj jun papal c'ob (8 cm.). Ti sti'ile loc'tabil stsacleb xnich lirio nichim. Xch'am yu'un chanib yoxvinic ta mil (44,000) litro ti vo'e.

²⁷Ja' jech xtoc, ta naca c'anal taq'uin, laj smeltsan lajuneb ti c'usi jtunel ti oy c'usi ta scajanic teye, ti yich'oj balunch'ix (1.80 m.) ti snatiquile, jech xtoc ti sjamleje. Juteb xa stsul ta vuc-ch'ix (1.35 m.) ti stayleje.

²⁸Ti c'usitic jtunel laj yich' meltsanele, xi s'elan jech c'u cha'al li'e: Oy svelbenaltac polajtic stsacoj sba lec xchi'uc ti stenel te'altac ti stseque.

²⁹Ti xpech-pechul stenel te'al ti stsacoj sba xchi'uc ti stseque, tey loc'tabil sloc'ol ti leonetique, ti tot vacaxetique, xchi'uc ti c'usi oy xiq'uique. Ta yolon ta yac'ol ti bu loc'tabil ti leonetique, ti tot vacaxetique, ch'albil ta sloc'obbail guirnalda nichim.

³⁰Ti jujun ti c'usitic jtunele, yich'oj chanib scarosal ti meltsanbil ta c'anal taq'uine, xchi'uc stsacleb scarosal ti meltsanbil ta c'anal taq'uin xtoque. Ta sba ti bu ta scajanic c'otel stsacleb ti xlechleb vo'e, yich'oj lec chanib yictac ti naca ta c'anal taq'uin meltsanbile. Ta spat xocon ti yictaque, loc'tabil guirnalda nichim.

³¹Ti xlech-lechul sti' ti xlechleb vo'e, ch'amal yalel ta jun xot-xot taq'uin ti toyol muyel cha'ch'ix xchi'uc jquejleje (45 cm.). Set-set lec ti xlech-lechul sti'e. Jbej xa com mu teyuc oxch'ix xchi'uc jquejlej (68 cm.) staylej ti xboch-bochil yich'oje yo' jech lec tsinil ta xcom stuc. Ja' jech xtoc ti bu chotol ti xch'amleb sti'e, oy c'usitic loc'tabil. Ti yique ma'uc set-set, yu'un co'ol sjamlej xchanjotal yich'oj.

³²Ti chanib scarosaltac tselajtic muyel ta svelbenal sti'e, tsacalic lec liquel sc'atlomte'altac scarosal ta yolon ti bu chotol liquele. Jbej xa c'ob mu teyuc oxch'ix xchi'uc jquejlej (68 cm.) ti staylej tselajtique.

³³Ti scarosal taje, co'ol meltsanbil jech c'u cha'al scarosal ti carretae. Scotol naca ta c'anal taq'uin meltsanbil ti sc'atlomal stsacleb scarosaltaque, ti xot-xot taq'uine, ti bu ta xbalalij o ti stsacleb scarosale, xchi'uc oy lec smac yo' mu spits.

³⁴Ti chanib yictac ti oy ta xchanjotal xchiquine, jun no'ox snitoj sba.

³⁵Ti bu c'ot ta tsutsel ti sbae, yich'oj jch'ix xchi'uc jbej c'ob (22.50 cm.) ti xbalte-balte xa scojol-cojol pasbile. Ti yictac xpech-pech tenel-te'ale, xchi'uc ti bu yich'oj ti scojol-cojole, tsacal lec ta jun no'ox xchi'uc ti stsaclebe.

³⁶Jech ti Hirame laj xch'oj ta loc'tael ti c'usitic oy xiq'ue, sloc'obbail ti leonetique, ti xane, ti c'u yepal ta x'och yu'un ti xpech-pech tenel-te'al ti bu pajem ti scojol-coj xnichimal ac'bile. Ti bu xa xocol ta joyobe, naca sloc'obbail guirnalda nichim laj yac'be.

³⁷Ti c'usitic toj tunel laj smeltsane, slajunebal (10) co'ol s'elan ti stsaclebtac laj yac'bee. Scotol xcapij no'ox s'elanic, xchi'uc jmoj sbisoltac ti c'u s'elan meltsanbile.

³⁸Ja' jech xtoc laj smeltsan lajuneb c'anal taq'uin yavil vo'etic ti yich'oj balunch'ix (1.80 m.) ti jujune, ti x'och yu'un vaxaquib ciento xchi'uc chanvinic (880) ta litro ti vo'e. Laj yich' aq'uel ta sba ti lajuneb (10) ti c'usitic toj tunel laj yich' meltsanele.

³⁹Ti c'usitic toj tunele, vo'ob (5) laj yich' cotanel ta stuq'uil bats'i c'ob yu'un ti ch'ulnae. Vo'ob (5) xtoc ti xi ta stuq'uil ts'et c'obe. Ja'uc ti muc' ta yavil vo'e, laj yich' aq'uel ta xocon ch'ulna ti xi ta stuq'uil o'lol yu'unic ti yac'ol sloq'ueb c'ac'ale xchi'uc ti stuq'uil yolon ti yac'ol xocon sloq'ueb c'ac'ale.

⁴⁰Ja' jech xtoc ti Hirame laj smeltsan binetic, spulobiltac, xchi'uc muc' ta tazaetic. Taje, ja' jech laj stsutsesbe yabtel ti Salomón ti ta ch'ulna yu'un ti Diose.

⁴¹Ti c'usitic laj spase, xi s'elan xcholet jech c'u cha'al li'e: Ti chib bal-bal taq'uine Ti xnichimaltac sjol ti bu c'ot ta tsutsele Ti chib xchaj-chaj staq'uinaltac smac xnichimaltac ti oy ta toyole Ti chanib ciento (400) ta bej sloc'ol sat granada ti yich'oj cha'chol ta jujun chaj-chaj taq'uin ti smac' xnichimal sjol ti c'usitic bal-bal meltsanbile Ti lajuncot (10) ti c'usitic jtunel laj yich' meltsanele Ti lajuneb (10) yavil vo' ti laj yich' cajanel ta sba ti jujune Ti muc' ta yavil vo'e Ti lajcheb (12) sloc'obbail tot vacax ti ja' yicobinoj c'ote Ti binetique Ti spulobiltaque Ti muc'tic tazaetique Scotol ti c'usitic ta xtun ta xch'ulna Dios ti meltsanbat ti ajvalil Salomón yu'un ti Hirame, naca c'anal taq'uin ti lec sts'ababet yutsile.

⁴²

⁴³

⁴⁴

⁴⁵

⁴⁶Ti ta yosilal uc'um Jordán ti oy ta o'lol yu'un Sucot xchi'uc ti Saretane, naca ta tsatsal yi'al lum sts'ananobiltac laj yijubuc ti c'usi laj yac' ta unijesel ti ajvalile.

⁴⁷Ti ajvalil Salomone, toj ep ti c'usitic laj yac' ta meltsanel ta c'anal taq'uine, ti mu'yuc no'ox ta alel yu'un ti c'u yepal ta xtune.

⁴⁸Ja' jech xtoc ti Salomone xi s'elan laj yac' ta meltsanel ti c'usitic ta xtun ta ch'ulna yu'un ti Diose: ti oro altare, ti oro mexa ti ta xtun ta scajanobil panetic ti ta xc'ot ta yu'un ti Diose.

⁴⁹Ma'uc no'ox taje, ti spajlebtac cantilaetic ti naca ta lequil oro meltsanbil ti oy ta yeloval ti Bats'i Cuxul Ch'ul Cuartoe, vo'ob (5) oy ta stuq'uil bats'i c'ob, vo'ob (5) oy ta stuq'uil ts'et c'ob, naca oro ti xnichimaltac loc'tabile, ti lamparaetique, ti slots'obiltaque,

⁵⁰ti bisetique, ti xulobiltac xmechaile, ti muc'tic tazaetique, ti spulobiltaque, ti xchic'obiltac pome, naca ta oro meltsanbil. Ja' jech xtoc, ti stsacleb jujupech sti' ti Bats'i Cuxul Ch'ul Cuarto ti oy ta yut ti ch'ulnae, xchi'uc ti stsacleb jujupech sti'tac ti ch'ulnae, naca bats'i oro.

⁵¹C'alal tsuts scotol ti abteletic ti laj yac' ta meltsanel ta sventa xch'ulna Dios ti ajvalil Salomone, ti Salomone laj yich' batel ti c'usitic meltsanbil ta oroe, ti ta platae, ti xch'acoj ta sventa Dios ti David ti ja' stote. Laj stic' ochel ta yaviltac ti bu sq'uejleb ti c'usitic x'ayan yu'un xch'ulna ti Diose.