Read Tzotzil 1 Reyes 9 Bible Online

1 Reyes 9 - Tzotzil bible

1 Reyes 9

¹C'alal tsuts xa yu'un ta smeltsanel xch'ulna Dios ti Salomone, ti snae, xchi'uc scotol ti c'usi xal yo'nton laj sva'anane,

²ja' o laj yac' sba iluc yan velta ti Dios ta stojole jech c'u cha'al laj yac' sba iluc ta Gabaone.

³Va'i un, xi albate: “Ti xavocolet lac'opoj lati'in ta jtojole, laj xa ca'i. Laj xa quich' ta jventa ti ch'ulna ti laj ava'anbun ta jna sventa yo' bu ich'bilun ta muc' ta xic'ot sbatel osile. Ja' yu'un un, ta jchabi, mi ja'uc ch'aybaj xca'i.

⁴Mi jech ta xatuc'ulan aba ta jba ta jsat jech c'u cha'al laj spas ti David ti atote, ti mu yanijemucote, ti lec avo'ntone, ti ta xavac'be yipal ta spasel ti c'u s'elan laj calbote, ti ta xach'un ta spasel ti jbel ti c'usi albile, ti c'usi nopbil cu'une, toj lec ta j'ech'el.

⁵Ja' yu'un un cha'e, ta xcac' chotlan o ta ajvalilal ta stojol Israel jech c'u cha'al laj calbe ya'i ti David ti atote, ti laj calbe ya'i ti mu ono'ox sts'elbuj sc'oplal ti ta x'och ta ajvalil junuc ti snitilultaque.

⁶“Ja'uc le' une, mi ta xlic aq'uej abaic ta jtojol ti vo'oxuc xchi'uc ti anich'nabique, mi mu xc'ot ta pasel avu'unic ti jmantaltaque, ti jbel c'usi albil cu'une, mi ta xlic ats'acliic ta yich'el ta muc' ti yan diosetique,

⁷ja' jech ti vu'un eque, ta jten loq'uel ti israeletic li' ta banomil ti bu laj cac'beique. Ta jten loq'uel ta co'nton ti ch'ulna ti laj quich' ta ventae, ti j'ech'el labanbilic ta xc'otic ti Israel yu'un ti yan muc'tiquil lumetique.

⁸Ja'uc ti ch'ulna li'e, ta xc'ot ta pasel ti ta xlilije, ti ta sbusq'uij yalele. Scotol ti buch'u ta x'ech' ta sts'ele, ch'ayal ta xc'ot yo'nton ta labajel ti xi ta sjac'be sbae: ‘¿C'u cha'al le' une ti jech laj spasbe jteclum ti Diose xchi'uc ti ch'ulna li'e?’

⁹Va'i un, xi ta xtac'batic sutel ti sc'opique: ‘Le'e, ja' ta scoj ti laj sten ta yo'ntonic ti Ajvalil Dios yu'unique, ja' ti Buch'u laj sloq'ues talel ti smolmuc'totic ta Egiptoe. C'ot ta yo'ntonic ti lec laj ya'iic ti laj yac' sbaic ta tunel ta snijanel sbaic ta stojol ti yan diosetique, ja' ta scoj ti tac'batic talel ta stojolic muc' ta vocol yu'un ti Diose.’ ”

¹⁰Jtob xa ox jabil yech'el laj smeltsanbe xch'ulna ti Diose, laj smeltsan sna ti Salomone.

¹¹Ti Hiram ajvalil yu'un ti Tiroe laj yac'be c'usitic tun yu'un ti Salomone, jech c'u cha'al ti ch'ut-te'e, ti toje, ti oro ti c'u yepal ta xtune. Jech ec ti Salomone laj yac'be jtob ta chop jteclumetic ti Hiram ti oy ta yosilal Galilea.

¹²Ja'uc ti Hirame, ti c'alal bat sq'uel ti jteclumetic ti ac'bat yu'un ti Salomone, mu lecuc laj yil.

¹³Va'i un, xi laj yalbe ya'ie: “¿C'usi xa no'ox jteclumal le'e ti laj avac'bune, cuts' calal?” Jech o xal ti banomil ti bu oy ti jteclumetique, laj yac'be sbiin Cabul, ti ja' to jech sbiinoj avi tana le' une.

¹⁴Ti c'u yepal oro laj yac'be talel Salomón ti Hirame, oy oxmil xchi'uc lajuneb xchanvinic slajunebal ciento (3,960) ta kilo.

¹⁵Ja'uc sc'oplal ti tsots abtel laj yac' ta bainel ti ajvalil Salomón yo' jech ta xich' va'anel ti ch'ulna yu'un ti Diose, ta xich' va'anel ti sna stuque, ta xich' jemel ti yave, ta xich' meltsanel smocaltac ti jteclum Jerusalene, ti laj stic' sba ta xcha'meltsanel ti jteclum Hazore, ti Meguidoe, xi s'elan c'ot ta pasele:

¹⁶Ti faraón ajvalil yu'un ti Egiptoe laj to ox yu'nin ti jteclum Gezere. Ta ts'acal to un, laj stic'be sc'ac'al xchi'uc laj smil ti cananeotic ti ja' jnaclejetic yu'une. Laj yac'be comel ta smoton ti yantsil nich'on yajnil ti Salomone.

¹⁷Ja'uc le' une, ti Salomone lic xcha'meltsan ti lum Gezere, ti Bet-horon ti oy ta olone.

¹⁸Ma'uc no'ox taje, lic xcha'meltsan ti Baalate, xchi'uc ti Tamar ti oy ta sbajtical banomil yu'un ti Judae.

¹⁹Ma'uc no'ox taje, lic xcha'meltsan scotol ti jteclumetic sq'uejobiltac ti c'usitic ta xich' tunel lajesele, jech c'u cha'al snailtac ti carretaetic sventa ti pasob letoe, ti snailtac ti ca'etic ti ta xtun ta sventa ti letoe, xchi'uc ti c'usi sc'an xal yo'nton ta smeltsanel ta Jerusalene, ti ta Libanoe, xchi'uc scotol ti banomil ti bu c'alal smacoje.

²⁰Ja'uc ti amorreoetique, ti hititaetique, ti ferezeoetique, ti heveoetique, ti jebuseoetique, ti ja' comic ta naclej ti ma'uc israeletique,

²¹ti ja'ic xa ti snitilulic ti comic xa ta naclej xcaltique, ti mu'yuc stsutsesatic ta j'ech'el yu'un ti israeletique, tsots sujbilic ta abtel yu'un ti Salomone, ti ja' to jech oyic avi tana li'e.

²²Ja'uc le' une, mi junuc israeletic sujbilic ta tsots abtel ti mosovinbilique. C'ajomal no'ox ochic ta soldado, ta j'opisial, ta banquilal, ta banquilal jtunel yu'un soldado, ta banquilal jtojobtasvanejetic yu'un soldado ta sventainel ti carreta sventa pasob letoe, xchi'uc ti ca'etique.

²³Sc'oplal ti jq'uel-abteletic yu'un ti Salomone, oy o'lol svacvinic (550) ta vo' ta stojobtasel ti buch'u yacal ta spasic ti abtele.

²⁴Yantsil nich'on ti faraone, loc' ech'el ta Steclumal ti Davide, bat nacluc ta na ti bu laj smeltsan ti Salomón ta sventae. Jech ti Salomone laj snojes lec ta lum ti bu sc'an nojesele.

²⁵Oxib velta ta jabil ti Salomone ta xchic' matanal xchi'uc ti c'usi ta xich' svocol ta sventa ti lajesobil o'ntonal ta sba ti altar ti laj sva'an ta sventa ti Diose, xchi'uc ta xchic' pom ta stojol ti Diose. Ja' jech tsuts sc'oplal ta smeltsanel ti ch'ulnae.

²⁶Jech xtoc ti ajvalil Salomone lic smeltsan barcoetic ta jteclum Ezión-geber ta sts'el Elat ta sti'il Tsajal Nab ti oy ta yosilal Edome.

²⁷Ja'uc ti Hirame laj stac ech'el yaj'opisialtac, banquilal jtij-barcoetic ti xojtiquinic lec ti c'u s'elan ti nabe, jmoj abtejic ta barco xchi'uc yaj'opisialtac ti Salomone.

²⁸Va'i un, c'otic ta yosilal Ofir ti bu laj staic jutucuc xa mu chanlajunebuc ta mil (14,000) kilo ti oroe, ti laj yich'beic batel ta stojol ti ajvalil Salomone.